2012年7月21日星期六

久違了的食味


記得我細個嗰陣,媽咪間唔中就會用霸王花煲湯,嗰陣時好鍾意食霸王花㗎,覺得好有質感,特別最鍾意食中心嗰條花蕊,因為特別 滑劣劣,感覺好得意。可能媽咪都知道我鍾意食,所以每次都專登夾條花蕊俾我食㗎!

 



但係唔知點解,之後媽咪一路都無再用
霸王花煲湯,唔知係咪因為無得賣呢?自從我 in charge 個廚房之後,其實我都一直有搵霸王花嚟買,想搵番啲回憶,重溫兒時味道嘛!但真係搵極都搵唔到,可能有但我遇唔到啩,直到最近,卒之俾我見番佢喇!

 


雖然霸王花係乾品,但唔知點解,一見到呢隻霸王花就覺得好新鮮,
而且香氣仲非常濃郁
㖭呀!







見唔見到呀?最面頭嗰條咪就係花蕊囉,真係好滑、好好食㗎!
我今次仲加咗菜乾、猴頭菇、雪梨同雜豆一齊煲,
雖然係齋湯,但都好清甜㗎!

3 則留言:

  1. 緊張大師-小女人2012年7月21日 下午8:20

    我鐘意齋湯,個個都話要加肉才甜,其實唔係,素湯有素湯的清甜味,呢個我都鐘意但不能用霸王花,我受唔到,但菜乾可以加雜豆來煲,好正呀
    [緊張大師-小女人回覆07/30/2012 13:10:28]對,我們努力加油,合十感恩,阿彌陀佛!
    [版主回覆07/29/2012 23:41:10]係,有好過無!!
    師兄,加油呀!
    阿彌陀佛!
    [緊張大師-小女人回覆07/28/2012 14:08:55]同意,大家要比時間耐性慢慢修行,但有個心總比無好,共勉之朋友
    [版主回覆07/27/2012 15:36:46]因為佛壇上放上一個念佛機,係長期播放住,有時知道自己誦經唔專心時就即刻聽住念佛機,希望可以專心番啲,但唔駛幾耐個心又即刻飛咗去第二度,睇嚟要心如止水,六根清淨,對我嚟講都有啲難度!
    [緊張大師-小女人回覆07/25/2012 21:48:11]我真係同你一模一樣呀,自從我跌倒後就開始係咁啦,平日我打坐唸經,現因盤骨問題我不能打坐,那都不應是大問題,但我完全就係你講緊的狀態,根本這半年我無好好地唸到經,只能靠聽佛歌來舒緩一下.
    [版主回覆07/25/2012 20:06:47]唉呀,我都係,每日做早晚課時,口就念念有詞,但個心就胡思亂想,一陣間就諗住煮咩餸、一陣間就諗起不快事、有時有諗緊歌詞、有時就………唉!!
    [緊張大師-小女人回覆07/24/2012 20:52:38]但到現在我離佛好似好遠咁,現在不能專心唸經,心好亂同唔靜,好燥好煩同好火,我現在無可能唸到經,個腦同思想都走離了.......
    [版主回覆07/24/2012 12:07:49]嘩,妳咁後生就結婚同皈依,妳咪仲有佛緣過我啦!我都係被我媽咪 "夾住" 去皈依咋!
    可能妳變成熱底呀!所以鍾意凍飲。
    [緊張大師-小女人回覆07/24/2012 10:39:22]我二十歲左右就皈依當時奶奶話要生小朋友所以無受五戒,但到今天我都無再想受五戒.你好有佛心同佛緣,因為你本性不喜愛吃肉實是感恩同福氣.我同你一樣,細細個開始大熱天時都係熱檸水.......係現在老了反而變了會飲凍品,因為實在太熱,醫生話我身體有變化才會如此.
    [版主回覆07/23/2012 19:36:21]係咪因為今年皈依呢?
    查實好多人都係食肉獸,不分男女,都唔鍾意食蔬菜,係我比較奇特啲啫!妳知嗎,我由細到大都唔係太好肉類,又唔鍾意食煎炸嘢,鍾意熱飲多過凍飲,有次同學生一齊食嘢,佢見我 order 熱飲,即刻話我咁滋補喎!!
    [緊張大師-小女人回覆07/23/2012 10:38:05]我係近今年才這樣,我起初唔知,同媽媽買肉,腳一踏入肉店馬上聞到好嗅的腐屍味,又想嘔,咁立即出去在門等媽媽,頂唔順呀?我都唔想但無法,現在弄肉食最好一邊整一邊唸經.好難得你自動吃素,我老公就喜歡食肉....唉....初一十五肯陪我都好好啦
    [版主回覆07/23/2012 01:03:03]咁我對肉類又無敏感嘅,不過我唔係太好肉類啫,鍾意食蔬菜多啲!
    其實我都好怕洗肉類㗎,有時真係聞到 "朕" 味就反哂胃,去街市經過肉檔更甚,所以我只會到超市買豬肉,覺得衛生小小!以前媽咪食全素時都無要我哋跟佢一齊食,我哋只係每個月食十日齋,依家我自己就揀初一、十五食囉!
    烚完豆嘅水好甜,所以我都會留作其他用途。
    我都食湯渣㗎,我多數都會當餸食,唔會倒㗎,咁就唔會浪費兼折墮喇!
    [緊張大師-小女人回覆07/22/2012 08:40:33]皆因你同我一樣對肉有敏感(對素會好多),我家人不能不吃肉,我去買時或洗煮時我會聞到異臭味好想嘔,但無奈暫時我自己不能全面素食(身體健康問題,雖要某些徹量元數)而家人我又無本事要他們吃素,但現在比以前好,到初一,十五家人都陪我,這是進步.我喜歡用不同雜豆煲湯,之後我會吃湯渣,又飽又美味
    [版主回覆07/21/2012 22:25:09]我煲嚫肉湯都唔甜,但一煲齋湯就甜到好似落糖!
    點解唔食得?太寒涼嗎?
    其實係將烚完豆嘅水留起,用嚟煲湯咋!

    回覆刪除
  2. 霸王花好似成日都見喎...係咪藥房都有架...應該唔算難買野啦
    [版主回覆07/21/2012 22:27:06]我喺藥房同藥材舖就唔見有得賣喇,可能收埋嚟賣啦,要問先有。我係喺「樓上」買㗎!

    回覆刪除
  3. 乾貨 -- 街巿雜貨舖成年有得賣. 超巿間中都見有,0係賣豆呀煲湯料包呀果一排架度.
    鮮(花)貨, 間中於菜檔有賣(唔會檔檔有, 但一兩檔賣本地農作既會有). 不過真係係好間中先見有.
    街巿有D檔係專賣類似生草藥既, 你都可以問下佢咩月份有鮮貨買.
    [版主回覆08/11/2013 20:51:23]真係多謝妳的好介紹,我又學到嘢喇!
    因為一向乾品都會比新鮮食材香,冬菇、螺片、蠔豉等都係呀!
    [F回覆08/11/2013 17:43:11]P.S. 鮮花用於滾湯 (入水 7-8mins. max.), 乾花用於煲老火湯.
    [F回覆08/11/2013 17:39:54]我見過, 但無買黎用, 所以無法比較味道. sorry.

    source(有圖) :
    http://life.dayoo.com/meal/201008/11/84454_13556553.htm
    [ 干霸王花煲的汤,总觉得味道甘甜。而鲜霸王花煲成的汤,更有鲜花的清香和甜美。
    据行家介绍,选择入汤的鲜霸王花,最好是含苞待放,将开未开之时最适合。如果选择太小的霸王花,入汤会有涩味;花开得越大,其鲜味就逐渐减少。等到霸王花完全绽放时,就只适合晒干了。含苞待放的霸王花,花房翠绿欲滴,胀得鼓鼓的,包含无限生命力,远看就像绿色的火炬。 ]

    給你這樣問一問, 令我也生出好奇, 或者日後有機會再見到鮮品會買來試試. 不過我不是常到街巿, 要看緣份了.
    [版主回覆08/04/2013 17:11:46]鮮品霸王花真係未見過喎!咁妳用過未?會唔會比起乾品無咁香呢?

    回覆刪除