與 blog 友交流煮食心得，分享生活點滴。
前幾日，blog 友 Motonako. A post 咗篇關於煲飯嘅 blog，佢話可以煮出一粒一粒而又唔會過硬嘅米飯，咁神奇？所以今晚我就試咗用呢個方法去煲飯，果然唔錯喎！
啲飯真係一粒一粒得嚟，仲好軟熟 o架，一啲都唔硬喎！真係啱哂我同我老豆兩個，因為我要食硬飯，而我老豆就要食軟飯，所以呢個方法可以一次過滿足哂兩個願望！
依家就將煲飯嘅方法寫俾大家參考一下：
- 先將米洗乾淨，然後用滾水浸米約 15 至 30 分鐘。
- 之後就照平時煮飯方法照煮就得 o架喇。
Notes：
- 如果唔夠時間浸米的話，就可以直接用滾水煮飯。
星期一果日同 Winnie 喺 「POKKA CAFÉ」食完 lunch 之後，去咗新世界中心間「Towngas Avenue」兜咗個圈，睇咗佢想要睇嘅嘢之後，就過番去 「1881 Heritage 」果度影相。
點解無端端會有興趣嚟呢度影相呢？因為之前喺好友明仔個 blog 度睇到佢喺度影咗好多張好靚嘅夜景，好吸引，咁啱星期一又去開尖沙咀，梗係順便過埋去影相啦！學 Miss Cheng 話齋，我哋係鄉下仔嘛，出開城就梗係要用盡全日 o架啦！
1881 Heritage 原本係前水警總部嚟 o架，不過早前政府就搵咗
"李超人" 幫手做古蹟活化工作，將佢變成咗一座露天商場。
呢座就係前水警總部主樓喇，依家變咗做一間餐廳。
主樓旁嘅一個特色 balcony。
主樓對出果兩支炮都有保留到喺度呀！我依家正準備發炮 o架喇，
你哋小心被我擊中噃！
商場已經準備好聖誕裝飾佈置。
商場內除咗有商舖 …………
………… 仲有餐廳食肆 o添！呢個露天茶座好有 feel 呀！
呢座我諗應該係天文台其中一座建築物，點解？因為 …………
………… 屋頂有個用嚟測風向， Winnie 所謂嘅 "公雞" 風向儀囉！
你哋估唔估到呢個係咩嚟呢？係船上嘅桅杆？唔係 …………
………… 係用嚟懸掛風球 o架！你哋知唔知最埋果個圓形嘅係
幾多號風球呀？我好似未見過有圓形 o架噃！
呢棵百年老樹就一定要影啦！如果有 blog 友記得的話， 喺呢個商場施工其間，為咗保留呢幾棵古樹，用咗一個好特別嘅方法，將整棵樹淩空咁保留喺度，而喺棵樹下面個山丘就夷平咗，真係不可思議！所以 Winnie 一直都好記得呢個鬼斧神工！
呢座旋轉樓梯好靚，但其實就係一個美化咗嘅沉箱，用嚟鞏固棵古樹而 "特製" o架！試諗吓，之前施工時，根本係無呢個旋轉樓梯 o架，係後期喺棵 "凌空半天吊" 嘅古樹下起呢座樓梯，真係覺得好神奇！
喺呢個位置可以影到哂前水警總部主樓全貌。
落番去地面，地下竟然砌咗一幅地圖！
嗱，我同 Winnie 兩個都係住喺呢度 o架啦！死人 Winnie 幾衰呀，一路幫我影相一路喺度笑，話個 pose 好有監躉 feel 喎！！
佢梗係未死過定喇！！
從呢個角度望上去層次感好強，我覺得好靚，不過我就好想炸咗
後面個座大剎風景嘅 YMCA 囉！
我睇番明仔影啲相，佢去影相果晚，後面果堆人嘅兩旁係有瀑布
流水 o架！果個凸出嚟嘅弧形簷蓬頂係個水池嚟 o架！
嘩，Winnie 做乜咁好笑呀？唔怪得之 Louisa 啱啱呢陣打電話俾我時問我做乜咁開心啦！可能係佢聽到 Winnie 啲笑聲呀！不過我都幾鍾意呢張相，因為好少會有機會影到真情流露嘅一刻！
本來諗住睇完 opera 出嚟再影埋夜景 o架，不過實在太夜，差唔多 11:00 pm喇，所以最後都無影到夜景，有少少遺撼，因為夜景同日景完全係兩回事嚟 o架！！
吞拿魚同薯仔係出奇地夾，非常好味！記得我第一次整吞拿魚薯仔菜式時，當啲吞拿魚一放落鑊度爆炒，啲香味真係好勁、好吸引，吸引到我老豆都要走入嚟廚房話好香呢！
材料：
罐頭礦泉水吞拿魚
薯仔
乾蔥頭
羅勒 ( Basil )
百里香 ( Thyme )
白酒
調味料：
鹽
糖
OK 汁
蛋黃醬 / 沙律醬 ( Mayonnaise)
芥茉醬
- 薯仔刨皮後切粒，炸至金黃色後瀝乾油份，備用。
- 罐頭吞拿魚先隔去水份；乾蔥頭去衣後切碎。
- 燒熱油鑊，先爆香乾蔥頭，加入吞拿魚，灒酒，盡量炒至乾身。
- 之後加入調味料，兜勻後，加埋之前預先炸好嘅薯粒同香草，兜炒至所有材料均
勻就得喇。
雖然菜式簡單易做，但味道就相當不錯，用嚟做伴菜都幾好呀！
P.S. 啲薯仔我係用微波焗爐個「健康油炸食物」功能焗 o架，只需加入少量食油與薯仔粒撈勻，之後放入焗爐內，一按制，就變成咁樣啦！真係好方便，最重要係唔駛我處理炸完薯仔果鑊油！
不過今晚一時手重咗，落多咗油去撈薯仔，所以有部份炸得過燶，變得焦黑！
星期一果晚約咗 Winnie、Louisa、阿聰同 Kenneth 一齊去睇 Mozart 嘅經典歌劇《魔笛 》( Die Zaubleflöte )， 原本 Li Kien 都有買飛睇，但佢真係唔舒服得好緊要，所以最終都係無去到。
揀得呢套 opera 睇，當然唔多唔少都係為咗聽夜后唱果首著名 aria "Der hölle rache" o架啦，我都唔例外， 因為我係勁鍾意聽花腔嘅！所以我都好鍾意聽 Rossini 嘅 opera，因為幾乎首首都有 coloratura 嘛！但係唱就唔係好識唱啦，唱到個肚啲肌肉都攰埋都唱唔好！ 不過今次就有少少失望，因為不但某些 performers 唱功唔係我心諗咁好，而且啲 costume 仲 ………… 我覺得係不倫不類囉！！成晚最欣賞嘅，當然係飾演夜后女兒 Pamina 嘅黃英啦，真係簡直係中國人嘅光榮！不過飾演捕鳥人 Papageno 嘅 Edelmann 都有不俗嘅演出，仲好生鬼攪笑！原來我哋睇果場仲有好友 Yuki 同師姐 Shanice 同台演出 o添！可能學佢哋講，我同 Yuki 識咗好耐，就算我哋坐喺 "山頂之癲"，無一個 performer 個樣可以睇得到，但都好易認出 Yuki 把聲，佢唱功都真係唔差，唔怪得之佢可以喺澳門「威尼斯人」度同 José Carreras 同台演出啦！能夠同 3 大男高音一齊演出，呢個經歷真係唔係人人都有機會。希望 Yuki 繼續努力，有機會成為香港嘅 Prima Donna 啦！
原本晏晝 Winnie 同我係約咗 Miss Cheng 一齊食 lunch 同佢慶祝嘅，點知佢真係忙到呢，連約好咗我哋都要推，咁無辦法啦，唯有等下次囉！( 點鬼知夜晚睇完 opera 之後，居然喺文化中心個大堂見到佢喎，佢話因為黃英俾飛佢睇喎，真係激死！！
) 所以咪得番我同 Winnie 兩個食 lunch 囉，佢就揀咗去佢嘅 favourite restaurant 「POKKA CAFÉ」，今次係去咗尖沙咀北京道果間。佢話因為之前喺網上見到呢間 Pokka 啲裝修好靚，好似好 grand 咁，於是就想去睇睇實景喎。
我自己就覺得裝修太 "花碌碌"，有啲眼花，反而幾鍾意呢
個壁燈佈置。
哈，我專登影呢個調味瓶 o架，因為明明鹽同胡椒係分開兩個樽，但 Winnie 因為一路同我講嘢，一路拎起個樽，唔為意之下，佢既然一手拎起哂兩個樽，仲想一齊倒落碗餐湯度 o添！好彩佢及時發現，如果唔係實鹹到黐線！
啲 "扮" 英式茶杯都幾靚呀！呢幅相其實係試機 o架咋，因為想叫 Winnie 示範一下佢嘅攝影技術，其實個景係離我哋座位好遠咁 zoom 埋佢 o架，都非常清楚呢！
呢幅都係出自 Winnie 嘅手筆。因為我唔識得用微距功能影相，
所以佢就示範俾我睇，教我點用，果然係好 sharp 呀！
好喇，講咗咁耐，係時候開餐喇！首先上嘅當然係餐湯啦，係雜菜青豆湯，有裸麥包仔跟住一齊上。個湯 OK，不過 Winnie 就略嫌多油。我就反而覺得個包唔知點解會整到咁鬼甜，都未食過啲咁甜嘅裸麥包，真係浪費材料！
餐湯都未飲完，跟住就見到杯咖啡嚟到。唉！又試老人癡呆，唔記得叫個 waitress 後上，卒之攪到我哋食完哂嘢之後 "凍冰冰" 咁飲。
Winnie 個 set lunch 先到，係香煎龍脷柳伴炸雞翼。佢 order 果陣時已經問明個 waitress 有無薯菜跟，個 waitress 好肯定咁話無，仲話佢可以 order 跟飯或意粉上。因為 Winnie 瞓醒起身已經好晏，所以無食早餐就出嚟，佢當然覺得肚餓啦！所以就 order 埋跟意粉上。點知個 set 嚟到一睇，墊底嘅薯菜好豐富，可以話係有齊哂五色蔬菜 o添！唉，都唔知依家啲後生點做嘢 o架！
呢個就係我 order 嘅茄汁焗雞扒飯。味道都唔錯噃，個茄醬唔會太酸，味道調得啱啱好，雞扒都算嫩滑，味道就一定唔會有任何要求 o架喇，因為一定俾急凍貨色你歎 o架啦！可能因為我始終唔係太好肉嘅關係，反而好欣賞啲雜菜喎，有紅蘿蔔、青椒等，最好食就係茄子，唔太硬又唔太腍，帶小小爽口，配埋茄醬一齊好好食。我喺屋企好難煮到呢隻口感呀！唔係因為我啲烹飪技術差，而係我要就我老豆，樣樣蔬菜都要煮腍啲，無計！
Winnie 個 set 就唔知幾銀啦，我個就盛惠 $75，算係咁啦，不過好耐都未試過食到咁滿足嘅 lunch 好耐啦！因為平時喺屋企餐晏一定唔會煮飯食，就算出街食都唔會叫飯食，豐富極最多都只係喺快餐店食過 tea set，因為我哋成家都唔係 "飯桶"，唔慣晏晝食飯，果日都係因為無得好揀先迫住要揀飯咋！所以食得好飽，就連睇 opera 之前約好咗 Louisa 三個人一齊去 Sheraton Hotel 間 coffee shop 求其食少少嘢頂肚，都唔係好食得落，因為仲未落隔。
係喎，順便喺度多謝埋 Louisa "萬歲" 嘅 chicken ceasar salar 同 fish & chips 先！
之前喺 blog 友 A moon 個 blog 度睇到佢上咗大師 Johnny 嘅蛋糕課，之後同佢傾開關於 Johnny 嘅嘢，仲俾咗香港電台好耐之前一個叫做《闖出我未來》嘅電視節目條 link 佢，個節目係拍攝 Johnny 去法國參加一個享負盛名嘅糕餅比賽，同大師交流之外，順道取經，將新嘅 idea 帶返香港，叫 A moon 有時間就睇吓啦！
點知咁啱 Johnny 又路經 A moon 個 blog，知道原來港台無刪除到段片，佢都好開心段片可以 "重見天日"，仲喺佢自己個 blog 度專登多謝我 o添！嘩，我真係受之有愧喎！！！
因為我真係純粹出於便心，等 A moon 可以睇到大師參加果個大賽實況，都無做過啲咩，點知就無心插柳，先幫到 Johnny 咋！所以我都想喺度同 Johnny 講聲，真係唔好太客氣！
媽咪都曾經講過，如果只係做小小嘢就可以令到人開心，何樂而不為呢！今次我真係深深體會到，因為我覺得我自己根本乜都無做過兼無出過力，都可以令到人開心，呵呵！
之前媽咪唔舒服嘅初期，其實我已經開始正式幫手煮飯，果陣時仲係好生手，始終都仲有媽咪喺我後面 "垂簾聽政"，所以對煮食仲係未有深入研究，媽咪教我點做就跟住做吧。
記得一次，媽咪真係完全放哂手等我自己攪掂，果晚，我就係整蒸水蛋。看似簡單不過嘅家常餸菜，我都有本事失敗，蒸極都唔可以凝固，於是就梗係立即求救啦！後來媽咪話番俾我聽，我先知原來加水嘅份量係有一定比例 o架！
聽媽咪講，如果蛋液跟水嘅比例為 1：1，咁就一定成功，但如果想有更加嫩滑嘅質感，就要再加啲水 o添，但係，最多都只可以加一倍半份量嘅水，亦即係蛋液與水嘅比例為 3：2，再多的話，就會好似我之前咁，蒸極都唔會凝固 o架啦！
仲有，我記得媽咪話過一定要用凍滾水，如果就咁用生水會做唔成喎！不過到依家我都唔敢試，唔知係咪真係唔掂呢？
自此之後，我就永世都記得呢個蒸水蛋嘅 "黃金比例"！所以有時做嘢真係唔駛太介意失敗，失敗過後汲取經驗，咁樣印象就更加深刻。
教咗琴咁耐，我都好少會因為學生嘅表現而會開心，可能係因為我啲學生都唔係太有天份果隻啦！但最重要嘅係，我一直都覺得，學好鋼琴根本就係佢哋嘅份內事，係佢哋嘅責任，所以彈得好，根本唔需要開心。
但噚日就有啲唔同，我真係由心咁開心出嚟，仲係同一日內有兩件事發生 o添！
開心事件 (一)
噚日喺快餐店排隊等買嘢食時，無聊望吓個電話，發現原來收到個 SMS message 都唔知，之後打開一睇，原來係我其中一個 8 級學生 send 俾我嘅，佢話俾我聽佢啱啱考完琴試出嚟，佢好開心遇到個好考官，但在此之前，佢遇到一個好老師，所以要特別多謝我！我睇到呢到，我真係好開心。
開心，唔係因為佢讚我好，唔係因為佢識刷鞋，而係開心佢明白我、了解我，無因為我經常鬧佢而唔鍾意我！坦白講，佢絕對唔係一個叻學生，又無天份，又無時間練琴，我收佢學費又唔係特別高，無得睇錢份上，俾著第二個，根本唔會再教佢，真係啋你都傻！但我仍然堅持繼續教佢，唔介意佢接收到幾多，總之，我會無私咁完完全全 share 哂我嘅嘢俾佢，點解？因為佢都一樣咁堅持，堅持自己嘅理想，堅持自己鍾意嘅音樂！！佢對音樂嘅熱誠，絕對不下於當年嘅我！
之前講佢學習嘅弱點，佢自己都絕對好清楚，對如我呢個咁好火兼脾氣唔好嘅 "藝術家"，佢真係受我唔少氣，俾我鬧咗唔知幾多次，但對我都毫無怨言 ( 可能只係我自己單方面咁諗，佢心裡頭其實好憎我，呵呵！) 可能係因為佢都好清楚我份人，我雖然係好惡，但我唔係隨便鬧人，老實講，我同我媽咪都一樣，俾我哋鬧得嘅人，其實喺我哋心裡面所佔嘅地位一定唔低，無番咁上下地位，根本唔值得我哋去鬧佢、去緊佢。我相信，我呢個學生就完全明白呢一點，所以先會咁容忍我、包容我，我都要喺呢度同佢講聲：Lo Ming，so sorry for my bad temper！
記得佢之前有次仲好攪笑咁問我，點解見我鬧其他學生，但係就唔鬧佢，希望我都可以鬧吓佢 ( 呢個世界真係有人咁犯賤，鍾意俾人鬧！？講笑吧 ！) 佢嘅意思，相信大家都已經好清楚。
一個咁識體諒自己，咁欣賞自己嘅學生，一百個之中，又有得幾多個呢？
開心事件 (二)
一向都唔係好鍾意學琴嘅 Arthur，噚日居然令到我好開心，真的，我真係好開心！
由我初初開始接手教 Arthur 時，我完完全全 feel 到佢係被迫學琴，因為佢上堂時真係好 hea，好唔願意去練習一啲相對以前較為難嘅片段；feel 到佢係好抗拒學琴，因為每次無論同佢傾得幾投契，無論玩得幾開心，做好哂一切 warm up 工作，只要講一聲「好啦，我哋上堂喇！」，佢就即刻表演國粹 — 四川變臉，由好開心、好 relax，即刻變到好無癮、好無奈；feel 到佢係好怕學琴，因為佢之前個阿 sir 係非常之惡，惡過我都不在話下，就連 Louisa 都好怕佢，跟本唔敢同佢接觸 ( 哈，原來我都唔係好惡啫！) 所以初期同佢上堂時，佢都長期同我講佢有幾怕之前個阿 sir。
因為各種原因，加上 Louisa 同我事先已經講好佢對 Arthur 嘅要求同期望，我就知道我要點去同 Arthur 相處，點樣去教佢。時間慢慢咁過，一路以嚟，我都睇到佢喺學習上嘅改變同成長。由開始同佢練習考試歌，佢無論接觸到咩曲目，彈過抑或未彈過都好，佢總係會先講句：「咁難，我實唔得啦！」但係慢慢、慢慢咁耐心教佢，忍氣吞聲咁對佢 ( 因為我知道我自己惡，但我唔可以用呢招對佢，因為佢之前一直都唔多接納學琴，某程度上都係因為之前個阿 sir 太惡，令佢更加抗拒 )，卒之見到佢有改善，而且仲慢慢對彈琴建立起自信，連 Winnie 幫佢考過幾次 mock exam，都話佢唔太差，一定會 pass，就連佢自己一直最驚嘅 sight-reading，依家都可以彈得有板有眼，拍子準確不在話下，就連音準都好咗好多，甚至可以一粒音都無彈錯，我真係覺得好安慰，起碼，對 Louisa 都叫做總算有個交代吧！
嚟緊禮拜五就正式考琴試，所以噚日就係考試前最後一次上堂聽佢彈考試歌，當然，水準唔會太差，但總怕會臨場失準，所以我長期性都同學生講，要預咗考試當日表現會有 50% discount。上完堂之後，Arthur 居然同我講咗一樣嘢，佢話佢自己其實知道自己首考試歌彈得唔好，咁我就問佢，咁點解明知道都唔做好呢？佢就話佢依家已經改唔到，跟住我就問佢點知道自己有問題，佢話佢因為練琴時喺個琴嘅反影睇到自己手指啲動作做得唔好，攪到啲音黐實哂，唔夠清晰！嘩，我聽完之後，真係好突然，完全無諗過佢會由唔願學琴變到自覺去了解自己做得唔好嘅地方，唔單只咁，上完堂之後仲同我傾吓佢考完試之後想學啲咩新歌，俾著係你，聽到佢呢番話，會唔會非常感動呢？我真係開心到唔識講嘢！
到 Louisa 夜晚返嚟，我都有同佢講番成件事，點知 Louisa 又再講多樣嘢俾我聽，原來 Arthur 佢自己都有同人講佢點 plan 佢嘅鋼琴考試，仲話考完 8 級會考埋 diploma！聽埋呢句，我個心就更加開心，更加甜到 "漏" 啦！估唔到佢短短一年間就有咁大轉變！當初我同 Louisa 相量俾佢考試，其實都只係想佢有個學習目標，有點學習推動力，如今，我嘅目的可以話已經達到。
希望 Arthur 真係可以繼續 keep 住呢道 "火"，慢慢學好鋼琴，咁我就可以多個目標人物俾我去 share 我嘅學習心得，就算佢未必做到我嘅 "代表作" ( 當年我媽咪就係咁去形容 Ryan o架啦，因為以前嘅 Ryan 真係好乖、好叻、好聽話，但係依家就 …… 唉！) 但我都希望真係可以陪佢考埋個 diploma 囉！
Arthur，good luck to your piano exam on Friday！
Winnie 對呢個玻璃曲奇果然情有獨鍾，佢話今次要整嚟送禮，除咗係整俾佢班好朋友之外，其實最主要係整俾 Miss Cheng，因為下禮拜一約咗 Miss Cheng 見面食 lunch，順道慶祝佢成為傑青，所以 Winnie 噚日就過嚟我度又再一齊整曲奇喇！
今次整得比較順利同比較 "四正"，因為有咗上次嘅經驗喇嘛！但
最重要都係天氣涼咗好多，個麵糰無溶得咁快。
呢啲全部都係由曲奇麵糰中心 cut 出嚟嘅，細細塊好得意呢！
Winnie 話要將所有戰利品 "哂冷" 喎！係咪好有 Vanlily 嘅大製作
feel 呢，呵呵！
因為真係有好多人要送呀，除咗 Miss 同 Winnie 嘅 "六姊妹" 之外，下星期一去聽 opera 時又會送埋俾 Li Kien、阿聰同 Kenneth，佢仲順便俾埋俾 Gordon、我老豆、阿馳同佢女朋友，咁當然要俾埋佢自己屋企人食啦！咁係咪要大製作至掂呢！
Pack 好哂入密實袋，唔怕受潮，又方便送禮。
Miss Cheng 果份就梗係要特別包裝啦！
個包裝袋係之前喺吉之島 $10 店買，貪佢簡而清，好大體，但最重
要係鍾意佢果句 "Especially for you"，好有意思，送禮最啱！
P.S.
- 噚日除咗整曲奇，我哋仲整咗芒果布甸呀！
- 噚日真係要多謝哂 Winnie 幫我洗哂所有用具呀！
因為天氣太乾燥，我濕水洗嘢洗得耐，啲手指裂到七彩，一路整曲奇一路流血，
嚇死佢！ 所以佢話叫我唔好再掂水同洗潔精喇，全部用具等佢洗就得。今次我
都老實不客氣咁等佢做喇，因為真係痛得好犀利！
Winnie, thank you very much!
