與 blog 友交流煮食心得，分享生活點滴。
材料：
雪菜
新鮮淮山
五香豆腐乾
紅辣椒
蒜蓉
調味料：
鹽
糖
紹酒
雞粉
- 雪菜用清水浸 10 分鐘，洗乾淨，瀝乾水後切碎。
- 鮮淮山去皮，洗淨後切件；豆腐乾沖洗後切片；紅辣椒洗淨後切粒。
- 燒熱油，放豆腐乾落鑊略炒，盛起。
- 爆香蒜蓉同紅椒，之後落雪菜兜炒。
- 淮山落鑊，灒酒後不斷兜炒，之後將豆腐乾回鑊。
果然真係好爽口、好清甜，估唔到咁好食喎！
老竇就話都幾爽甜，好特別，不過就略嫌黐口少少喎！
- 如果想淮山保持白色的話，切件後可放入清水中，防止變色。
- 雪菜預先用清水浸過可減低鹹味。
呢個月咁鬼多紅假，仲要撞啱咁多日紅假都係喺中心教，僅餘幾個私人學生又出哂去旅行，攪到我都好似返寫字樓工咁放長假，呢個月收入大跌囉！！
材料：
合桃 50 克
無花果乾 25 克
香蕉 2 隻
雞蛋 1 / 2 隻
橄欖油 70 毫升
低筋麵粉 100 克
泡打粉 1 茶匙
糖 40 克
鹽 少許
肉桂粉 1 / 4 茶匙
黃糖 1 / 4 茶匙
- 合桃放入焗爐內用 140 °C 焗 15 分鐘至香，連同無花果乾一齊切粒。
- 雞蛋拂打成蛋液；麵粉同泡打粉過篩 3 次，加入糖及鹽混合均勻。
- 香蕉用叉壓爛成香蕉蓉，與蛋液及橄欖油拌勻。
- 將濕性材料倒入粉料混合物內快手拌勻。
- 拌入合桃及無花果乾後，將麵糊倒入紙杯內。
- 肉桂粉同黃糖拌勻成肉桂糖，均勻灑喺麵糊表面。
- 放入已預熱至 200 °C 嘅焗爐內焗約 20 - 25 分鐘即成。
肉桂糖落得重手咗，攪到個鬆餅面好似燶咗咁款！
其實呢個 muffin 係我買咗焗爐後第一個 “開齋” 作品：香蕉朱古力鬆餅嘅變
奏，回想起3 年前第一次玩烘焙時其實乜鬼都唔識，整 muffin 唔可以
攪拌過度呢個道理完全未聽過，所以當時嗰個香蕉鬆餅比較實。
依家整得多，知道個中道理之後，成品都有小小進步喇！
Notes： - 選用熟透梅花點香蕉製作鬆餅，不但可令鬆餅香蕉味更香濃，更可增加甜度，從而減少
- 攪拌麵糊時一定要輕手及快手，否則會令麵糊產生筋性，成品口感唔夠鬆軟。
嘅糖用量。
早前 Winnie 話俾我知，大少奶跟 Jamie Oliver 個食譜整咗個免發酵薄餅脆批，麵糰搓好之後，面頭放好餡料就可以放入爐焗，夠哂快手！
本來 Winnie 之前已經預備好哂材料準備實驗，點知，天有不測之風雲，佢突然間 “慘遭毒手”，仲慘到要打電話同我 “呻”， 喺咁嘅情況下，佢當然無做到實驗啦！
材料：
高筋麵粉 250 克
水 約 140 毫升
即用酵母 5 克
鹽 7 克
糖 7 克
橄欖油 1 1 / 2 茶匙
- 將所有材料混合攪拌，之後搓成光滑麵糰。
- 用擀麵棍將麵糰擀薄，鋪上適量餡料。
- 喺薄餅表面灑上少量橄欖油，放入已預熱至 250 °C 嘅焗爐內焗約 5 分鐘。
- 當薄餅邊焗至金黃色即可。
用咗較少水份嘅煙肉、京蔥同牛油果做餡，批面薄薄搽一層茄醬就可以了。
雖然實驗失敗，但我都唔覺可惜，因為其實我係唔太鍾意
食薄脆批，只係好奇想試試啫！
噚日放假喺屋企無乜特別嘢要做，手痕痕又想開爐整嘢食，於是噚晚就揀咗整蔬菜批。
批底
材料：
牛油 50 克
低筋麵粉 200 克
鹽 8 克
冰水 80 毫升
雞蛋 1/2 隻
- 牛油切成細粒，之後加入麵粉同鹽，用手指將摔成麵包糠狀。
- 雞蛋拂打成蛋液，加入冰水拌勻。
- 將蛋液加入牛油粉粒內混合，搓成麵糰。
- 麵糰用保鮮紙包好，放入雪櫃雪 2 個鐘。
- 將麵糰拎出，用擀麵棍將麵糰擀薄至約 4 毫米厚。
- 將撻皮鋪入已搽油嘅撻模內，用手按壓至緊貼撻模後，用叉喺表面拮窿，備用。
批餡
材料：
西蘭花
紅燈籠椒
雞髀菇
乾蔥頭
雞蛋 3 隻
水 50 毫升
調味料：
鹽
黑椒粉
乾羅勒
- 西蘭花用洗米水浸洗乾淨，之後切細件。
- 燈籠椒及雞髀菇洗淨後切粗粒；乾蔥頭去衣後切圈。
- 將西蘭花同雞髀菇預先汆一汆水，瀝乾後連同燈籠椒及乾蔥圈放上撻皮上。
- 雞蛋同蛋黃拂打成蛋液，加水及調味料混合，之後倒入撻內。
- 放入已預熱至 220 °C 嘅焗爐內焗約 25 分鐘至蛋液凝固及表面金黃。
- 出爐後立即脫模，放上架上攤凍即可享用。
Notes：
- 搓批底麵糰時切勿太過用力，否則會將麵糰壓得太實，焗出嚟嘅批底唔夠鬆脆。
- 西蘭花用洗米水浸洗可以將表面白色物質輕易洗掉。
- 雞髀菇汆水後除可煮至半熟外，亦有助入爐烘焗時減少出水情況。
想整薑餅好耐，上年年尾已經想整，不過怕大家誤會我係因為聖誕節而整，所以最終都無整到。之後就一直好忙喇，直到今個月先叫做好少少，之但係早排天氣又勁潮濕，100% 相對濕度都試過，咁點整呀！？唔通真係呢頭出爐，嗰頭就即刻受潮咩，咁就真係搵工夫嚟做囉！！
材料：
腰果 80 克
低筋麵粉 315 克
薑粉 1 湯匙
梳打粉 1 茶匙
肉桂粉 1 / 2 茶匙
鹽 1 / 2 茶匙
牛油 100 克
糖 180 克
固體菜油 85 克
雞蛋 1 隻
水 1 湯匙
金黃糖漿 4湯匙
- 腰果洗乾淨，用抹手紙索乾水份，放入焗爐用 140 °C 焗約 20 分鐘至香味出，然後切碎。
- 所有粉類同鹽過篩 3 次。
- 牛油室溫放軟，之後加入糖及固體菜油，用電動打蛋器打至發白。
- 雞蛋加入拌勻，再分次拌入水同糖漿。
- 將粉類倒入牛油霜內，用膠刮切拌成麵糊，再加入腰果碎拌勻。
- 將適量麵糊用手搓成球狀，放上已墊牛油紙嘅烤盤上，之後略為壓扁。
- 放入已預熱至 180 °C 嘅焗爐內焗約 8 - 10 分鐘。
- 曲奇於烤盤上略為放涼後先至移到架上攤凍。
Notes：
- 可全用牛油 200 克代替固體花油；金黃糖漿則可用蜜糖代替；而水就可用牛奶代替。
- 曲奇麵糰放上烤盤上時，記得預留位置俾麵糰膨脹。
有陣時啲嘢真係可遇而不可求，你要專登去搵佢時就未必搵到，但無諗起佢時又會俾你發現到。
材料：
豆腐 100 克
南瓜 150 克
高筋麵粉 200 克
低筋麵粉 80 克
老麵 100 克
酵母 5 克
鹽 5 克
蛋液 40 克
糖 25 克
水 約 50 毫升
橄欖油 15 克
- 豆腐快手汆一汆水；南瓜去皮、切粒，隔水蒸正腍身。
- 除橄欖油外，所有材料放入食物處理器內攪拌成麵糰，後加入橄欖油搓勻。
- 拎出麵糰，放上已灑粉嘅枱上，繼續搓揉及摔打成光滑麵糰。
- 將麵糰滾圓，放入已灑粉嘅兜內，用保鮮紙包好，發酵約 1 個鐘。
- 將麵糰排氣後再次滾圓，放番入兜內發酵 30 分鐘。
- 再次排氣，並將麵糰平均分割成 2 份，滾圓後鬆弛 15 分鐘。
- 麵糰排氣後做形，放上已墊入爐防黏蓆嘅烤盤上，最後發酵約 45 分鐘。
- 放入已預熱至 180 °C 嘅焗爐內焗 15 分鐘。
Notes：
- 老麵製作方法，請參考燕麥包食譜。
- 由於南瓜同豆腐嘅濕度相當之高，所以建議先唔加水搓麵糰，甚至連南瓜同豆腐都唔好一
次過加入，視麵糰濕度再加水調節。我呢次不但無落到水，就連南瓜同豆腐都用唔哂，麵
糰已經夠哂水份。
- 即使麵糰濕度啱啱好，但會越搓越濕，所以必須酌量加入高筋麵粉以搓至唔黏手為止。
喺上年年尾嘅某一日，返到屋企開信箱時，發現管理處放咗張紙條喺我信箱，話我有份郵件寄存喺大堂 “實Q” 度，叫我憑紙條前往領取。“實Q” 叔叔俾咗一盒嘢我，大約係半張 A4 紙咁大、1 cm 厚，真係好好奇，薄薄一盒會係咩呢？
返到屋企拆開嚟睇，原來係一盒「李錦記」乾燒明蝦醬，當時真係覺得好神奇，無端端點解「李錦記」會送份方便醬包俾我呢？唯一解釋係，應該係我好耐好耐之前曾經去過佢個網站度唔知做乜，會送番份禮俾我，但相信應該事隔久遠，加上我老人癡呆嚴重，完全無記憶喇！
無端端免費得到份醬料包，梗係唔好浪費啦！
材料：
急凍蝦仁
急凍帶子
急凍青口
翠玉瓜
蒜片
乾蔥
調味料：
鹽
乾燒明蝦醬
辣椒醬
紹酒
粟粉
麻油
- 海鮮料解凍後清洗乾淨，蝦仁挑去蝦腸；帶子快手汆一汆水，瀝乾備用。
- 翠玉瓜洗淨，去頭尾，之後切件；乾蔥去衣後略沖洗，然後切圈。
- 燒熱油，放翠玉瓜落鑊兜炒，落少許鹽後加水冚蓋煮一陣，之後盛起待用。
- 爆香蒜片同乾蔥，將蝦仁及青口落鑊兜炒，灒酒後炒至八成熟，。
- 加1湯匙水，乾燒明蝦醬及辣椒醬拌勻。
- 將帶子及翠玉瓜回鑊，兜炒均勻後用粟粉水埋薄芡。
呢盒方便醬應該係外銷到日本，包裝盒全部都係日文。
盒內包括一包乾燒明蝦醬及一小包辣醬。
味道唔錯喎，好香番茄味，酸甜中帶少少辣，夠哂惹味呀！
材料：
南瓜 600 克
栗子 約15 粒
洋蔥 1 個
乾蔥 3 - 4 粒
肉桂粉 1 茶匙
豆蔻粉 1/4茶匙
烚栗子水 500 毫升
清雞湯 300毫升
白酒 250毫升
淡忌廉 150毫升
鹽 少許
胡椒粉 適量
- 南瓜去皮、去瓤，之後切細件，蒸至腍身。
- 栗子去殼、去衣，烚熟後瀝乾，水留用；洋蔥及乾蔥切粒，備用。
- 燒熱油，爆香洋蔥、乾蔥及栗子，加入南瓜粒，兜炒數分鐘。
- 加入肉桂粉及豆蔻粉，拌勻。
- 將烚栗子水、雞湯及酒加入，煲滾後轉慢火煲 45 分鐘。
- 湯煲好後，倒入攪拌機內攪打至所有材料完全混合及幼滑。
- 將湯倒番入煲內，再次煮熱，並且拌入淡忌廉。
- 最後加鹽及胡椒粉調味即可。
老竇都讚個湯好飲，當我話俾佢聽啲材料後，佢就即刻話：「嘩，
用上咁多材料，唔怪得之咁清甜啦！」
Notes：
- 若果烚栗子水唔夠的話，可以直接加入清水至 500 毫升。
- 栗子最好買較為腍的一種，方便攪打成蓉。
- 栗子去殼去衣方法，可參考《栗子去殼及去衣方法》
