2009年7月8日星期三

烹飪課:印尼食品@煤氣烹飪中心 (補加相片)

        前幾日咪預告咗我會上堂學嘅,其實係去咗煤氣中心度學整印尼食品呀!今次係我人生中第一堂烹飪課,覺得好好玩、好新鮮,學完又有得食,幾好呀!咁今次有呢個機會,我又要多謝好友 Louisa 喇,因為係佢出錢請我上課 o架!


        雖然今次係我第一次上課,但係對課程嘅導師就一啲都唔陌生,皆因之前我同導師都已經成日喺個 blog 度傾偈 o架喇,佢係邊個,咪就係好多人都識Rachel Yau 囉!如果有睇開我個 blog  blog 友都應該見到「我的 blog友」一欄都加咗佢個 blog 條 link 落去。



 


        好啦,言歸正傳,今次個課堂都好趕、好緊湊呀,事關要喺兩個鐘頭內學整 3 個食品,包括印尼糯米雞、印尼沙爹雞同椰汁班蘭糕。一入到中心,個環境已經一啲都唔陌生,因為喺電視成日都見到蘇施黃同 Jacky Yu 喺度教煮餸嘛,見埋 Rachel 就更加份外 "親切",唔似以前去學嘢咁面對唔熟學習環境同唔識嘅老師。不過當我見到其中一樣嘢時我就有啲標汗,都幾驚,就係果把傳統嘅中式菜刀喇!我喺屋企係用西式廚刀,即刻尖尖長長果隻呢!因為比較輕身,同埋望落無咁恐怖;而傳統嘅中式菜刀一向喺我心目中都係好重、好利,專係啲街市佬、癲佬揸住嚟 "斬人" 果隻,所以真係有啲驚 o架!!不過死就死啦,學 blog 友阿 Yen 話齋,都係要豁出去 o架啦!


        個印尼糯米雞同印尼沙爹雞係實習食品,即係可以落手落腳煮,但個椰汁班蘭糕就淨係睇 Rachel 示範,不過我哋都有得試食 Rachel 整果個o架!



        呢個就係色、香、味俱全椰汁班蘭糕喇,係咪好靚呢,仲好好食 o添,煙煙韌韌,好香班蘭味同椰子味,正!咁啱之前我又買定6 吋方形 mousse 圈諗住要嚟整 brownie,依家又可以用埋嚟整呢個椰汁班蘭糕啦,遲啲有時間我一定會整,因為真係好好食,唔知心急Louisa 等唔等埋我同佢一齊整呢?我諗佢多數都等唔切 o架喇,實會自己整先!


        跟住就係學整印尼糯米雞同印尼沙爹雞,整個沙爹雞時我又要 "豁多次出去",因為平時喺屋企處理啲生肉時,我一定會戴手套,一來怕污糟,怕整到成手 "肥淋淋"、一陣味;二來因為我皮膚太乾,長期都會爆拆,怕會被生肉細菌感染之餘,之後要用洗潔精洗手時就越洗越乾,惡性循環,不過依家學嘢就無得再做 "少爺",唯有再次 "死就死,豁出去啦"!



        呢度啲沙爹雞串同沙爺醬係 Rachel 整嘅,老師整嘅,當然好味啦!



        呢兩串就係我即時試做嘅,都 OK 好食喎,不過個沙爺醬就唔夠時間煮,所以就將啲材料拎咗返屋企慢慢整,今晚整好之後我就會影低張相,掟上嚟俾大家 "品評" o架啦!不過喺堂上睇 Rachel 整個沙爹醬,原來都唔難整喎,試食咗佢煮嘅沙爹醬,好正、好惹味,有些少似印尼沙律 Gado Gado 個花生醬咁味


 



        最後就到印尼糯米雞喇,又係因為時間關係,堂上只可以蒸好啲糯米同煮好個餡料,一樣都係將啲半製成品拎咗返屋企,聽日有時間先包埋佢,到時再俾大家睇吓啦!當然,即時就梗係有得試食 Rachel 嘅手勢啦,同樣咁好食,加上我不嬲都鍾意食糯米整,所以我諗我得閒有時間就會整嚟食 o架喇!


 




        落咗堂之後,我同 Louisa 就梗係搵埋 Rachel 影番張相留念啦!


 



        咁難得見到 Rachel,我呢個小 fans 就當然把握呢次機會,帶埋之前買落 Rachel 寫嘅《為您做甜品》俾佢簽名啦!最衰 Vanlily 無出書啦,如果唔係,上次約佢拎玻璃曲奇時又拎埋本書俾佢簽名。


 



        Rachel 仲好好人,好有心思咁寫咗幾隻字俾我:"Happy cooking!嘢食真係幾開心 o架,Yeah!所以下禮拜一我又會好開心喇,因為又整嘢食囉!整咩?咁大家就拭目以待喇。


 



        上完堂之後,我同 Louisa 就一齊返咗去佢屋企,正當我同 Arthur 上緊堂時, Louisa 就立即入廚房繼續完成埋堂上未整好嘅半製成品。整完出嚟都幾得 o架!之後我就幫佢擺到靚靚嚟影相,你哋睇,係咪好得呢! Louisa 話我將啲食物全部放哂喺塊蕉葉上面好 gimmick 喎!



P.S.  當 Louisa 煮完個沙爹醬時,佢就同我講:「哎,我哋唔記得拎埋啲沙薑粉同芫荽粉返嚟呀!」我哋兩個食過個醬之後,都發現個味道真係差咁啲,事關沙薑粉個味好濃、好搶嘛!點解我哋咁失策 o架!


6 則留言:

  1. 十分欣賞你去深造廚藝! 我未的起心肝學廚呀!
     
    Rachal Yau我都久仰大名, 不過未有機會跟她學嘢. d 沙爹好正呀!!
    [版主回覆07/10/2009 01:02:00]        唔好話深造,都係純粹玩 吓、見識 吓、同見 吓偶像咁 啫!                  係哩,淨係睇都知道正啦,呵呵!  
            你睇 啱課程,夾 啱時間咪都去玩 吓囉! 嚟緊 Margaret Fu 會教整麵包呀!

    回覆刪除
  2. Hello,  你好,
    沙爹雞可唔可以教我點整 。
    多謝 !
    [版主回覆07/10/2009 01:15:00]        其實都無問題 嘅,不過材料比較多,工序煩覆,好難 喺度講清楚每個步驟俾妳聽,同埋唔知可唔可以將煤氣中心個食譜 post 出 嚟 噃!因為有版權問題。

    回覆刪除
  3. 喂,你下星期一去整咩呀?
     
    [版主回覆07/10/2009 16:25:00]        哦, 喺 屋企同 Winnie 一齊整 嘢食 啫,呢個懶鬼居然都自動獻身叫我同佢一齊整 嘢食,妳可知果樣 嘢幾咁吸引呢!我 哋整乜 嘢,攪掂 咗先再向外公佈啦,費事揚哂開去之後又失敗收場,到時就瘀到爆!

    回覆刪除
  4. 請問貴唔貴一堂呢? 仲有可唔可以攞走d野食呢? 你在家中再整過都相當唔錯哦.. 好勁呀你!
    [版主回覆07/10/2009 16:21:00]        每個課程都唔同學費 o架!妳可以上番煤氣個官方網站睇睇。         其實所有食材都應該係堂上煮起 o架,不過因為時間唔夠,所以我先將所有材料帶返屋企完成埋佢囉!所以我唔係返屋企再整多次,係 喺 屋企完成埋堂上未完 嘅 "功課" 咋!
     

    回覆刪除
  5. 癲佬 多數揸牛肉刀架! Rachel 成套書我都簽晒名呀! 七月仲有免費示範班添....I just can't wait to see her there.
    [版主回覆07/11/2009 17:10:00]        妳 喺 美國買佢套書定返開 嚟香港時買 o架?妳識佢,梗係幫妳簽哂名啦!

    回覆刪除
  6. 啲書全部香港買架........ 我同你都識佢架噃!
    [版主回覆07/13/2009 00:53:00]        係識佢,不過唔係朋友果隻嘛!妳同佢熟先可以搵到佢兼叫佢幫妳簽哂名嘛!

    回覆刪除