呢排係咪成日都見我整啲 cream 嘅嘢食呢？哈哈！其實係咁嘅，上次同 blog 友幸福蠍講開買邊隻甜忌廉時，我順便問埋佢知唔知邊隻淡忌廉同樣無咁奶味，佢介紹我用「Anchor Whipping Cream」，話奶味最少 o架喇，咁聽到有呢個選擇，當然要試吓啦！但可惜「二記」只係得 1L 裝賣，無細啲 size 賣，咁都無辦法喇，要試就要買 o架啦！所以呢輪咪狂整用 cream 做嘅西點囉！幸福蠍仲好好人，教埋我開封後要用保鮮紙包實盒 cream，咁就可以擺耐啲。果然，包裝上寫明開封後要 3 日內用完，但直至依家，擺喺雪櫃都已經成果禮拜咁滯，都無變喎，呢個方法果然掂！坦白講，咁短時間要用哂1L cream，都真係幾高難度。
講番正題先，其實整雪糕先至係我買呢盒 cream 嘅重頭戲，真係為咗整雪糕先至買 o架咋！因為上次同 Winnie 貪得意亂嚟試整雪糕，整咗榴槤雪糕同藍莓雪糕，榴槤雪糕就梗係正啦，好食都暈！但係個藍莓雪糕我就頂唔順，可能藍莓本身唔夠濃味，加上隻 cream 真係勁重奶味 ( 因為之前我係買隻靚嘢「President」嚟整)，所以唔似榴槤咁可以蓋過 "朕" 奶味，所以我一路食，幾乎想嘔番哂出嚟，所以先至四出搜尋唔重奶味嘅 cream 囉！
之前一早已經搭 Winnie 喺書展幫我買本《我愛冰淇淋》，睇完成本書，我已經鎖定咗第一個要整嘅係抹茶雪糕，而且之前見到餅后 Vanlily 都係跟呢個 recipe 整抹茶雪糕，見佢都話好掂，咁我就更加相信我呢次無揀錯，所以就放心去整喇！
顏色對比好靚！雖然我已經專登去買個雪糕勺返嚟 "畢" 雪糕，
但係仍然唔識 "畢" 到一個靚靚雪糕球，有待改進！
材料：
綠茶粉 3湯匙
糖 2湯匙
豆漿 150毫升
蛋黃 2個
糖 (打蛋黃用) 70克
淡忌廉 150毫升
日式紅豆餡 適量
冰水 適量
以上材料份量可做約 4 - 5 人份量嘅雪糕。
食譜嚟自福田淳子嘅《我愛冰淇淋》。
抹茶雪糕
- 蛋黃同糖用電動打蛋器打到發白。
- 將暖豆漿逐小加入蛋黃糖霜中，攪拌均勻。
- 之後將混合物全部倒番入煲內，用慢火加熱，邊煮邊攪拌。
- 當混合物煮到濃稠時就熄火。
- 將綠茶粉同 2 湯匙糖拌勻，加小量蛋黃混合物落去，攪拌至綠茶粉同糖完全
溶解。
- 之後將綠茶混合物倒番入煲內，充分拌勻後，隔篩過濾到不銹鋼盤中。
- 不銹鋼盤座冰水，令混合物冷卻，之後放入雪櫃雪凍約 3 – 4個鐘。
- 淡忌廉座冰水用電動打蛋器打起至 7 成企身。
- 打起忌廉與綠茶混合物拌勻，用保鮮紙蓋好鋼盤放入冰箱。
- 30 分鐘後就拎番出嚟，用電動打蛋器打鬆，避免結冰變硬，之後放番入冰箱。
- 之後每隔 30分鐘就拎出嚟打鬆，重覆步驟約 3 - 4次，見混合物變成濃稠軟滑，
就可以將佢放喺冰箱裡雪硬，隨時可以食得。
紅豆蓉
- 將冰水逐小加入紅豆餡內拌勻，拌至適合濃稠度即成。
- 將紅豆蓉淋上雪糕伴食。
我今次整嘅係 double 份量，因為預埋阿馳同阿瑩果份。
綠茶同紅豆簡直係 perfect match，好食到震！
( Winnie 實話我黐線！因為佢最憎綠茶味，勁抗拒！) 我諗之後我會整好多呢對 "孖寶" 嘅食品，好似綠茶紅豆卷蛋啦、綠茶紅豆糯米糍啦、綠茶紅豆麻糬波波啦、綠茶紅豆雪芳蛋糕啦、綠茶紅豆乜乜、綠茶紅豆物物 …………… 真係多都數唔哂，不過整到先算啦，呵呵！
Notes：
- 原食譜係用牛奶而唔係豆漿。
- 將豆漿加入蛋黃糖霜時，切忌一次過倒入，因為咁樣會令蛋黃即刻凝固結塊。
- 將蛋奶混合物加熱有助消毒殺菌，但要留意切勿加熱太耐，蛋黃仍然會被煮熟。
依我經驗，呢個步驟就好似炸嘢咁，千祈唔好炸到金黃色先至撈起，因為食物本
身嘅熱力會繼續 "煮" 緊，所以顏色就會過深。同樣道理，當見到混合物已經濃
稠時先熄火，其實已經太遲，蛋黃亦然繼續受熱，最終都係凝固結成細粒狀。
- 綠茶混合物一定要過篩，因為唔多唔小都一定有小部份蛋黃凝固，加上綠茶同糖
如果溶得唔好，一樣會結粒、結塊。
- 根據福田淳子嘅提示，綠茶混合物必須充份冷凍，否則加入打起忌廉後就會凝固
唔到。
- 若閣下係用雪糕機製作，當綠茶混合物充份冷凍後，就可以直接與淡忌廉混合，
倒入雪糕機內開始攪拌而毋須預先將忌廉打起。
(Empty)
回覆刪除[版主回覆10/03/2009 01:11:00] 大家咁話，祝你同太太及家人開心慶團圓！
中秋節快樂!!
回覆刪除[版主回覆10/03/2009 14:42:00] 中秋節快樂！妳 喺 外國 (如果無記錯應該係美國，right？) 點渡過啊？氣氛好嗎？
我都有做mocha ice-cream, 我有減左d糖
回覆刪除[版主回覆10/09/2009 16:28:00] Mocha 雪糕？正喎！都係跟《我愛冰淇淋》整？