2011年4月6日星期三

我是世界上最幸福的人………

        噚晚睇電視時,無意中睇到中央電視台重播一個中俄跨國尋親節目《等著我》,真係好感人,可惜我只係中段先開始睇,不過唔緊要,因為有有心人已經將整個節目掟咗上 Youtube,有時間可以慢慢睇番。


        節目主要係幫中國人同俄羅斯人尋找失去聯絡嘅親朋戚友,我噚晚所睇到嘅片段,有子女尋父母、有未拍過拖嘅 "情侶" 尋找失去聯絡另一半、有交流生尋找當年一齊讀書嘅校友、亦有當年曾經短暫時間係 "孤兒"  嘅去尋找奶媽。當中每個故事都的確係好感人,尤其係當雙方同台見面時,真係好激動,更會喜極而泣。




        呢case 係一位中年男仕尋找媽咪,當年佢要同家姐跟媽咪一齊去蘇聯,點知中途爸爸趕到,將佢帶走,從此就跟媽咪、家姐分開,過往媽咪屋企坐開嘅椅一直留空,事主一直等媽咪返嚟坐,點知一等就等咗五十五年,當年六歲嘅小男孩如今已是一名白髮中年人,幸好,俄羅斯方面真係幫佢搵得番媽咪,當佢媽咪上台同佢相認時十分激動,就連中央電視台嘅主持人董卿都話,雖然佢已經係一個白髮中年男子,但當見番媽咪之後,都亦然係一個小孩咁立即跪下,攬住媽咪雙腳不斷咁喊,可想而知,當事人對母親嘅思念係幾咁深!


 



        而呢個 case 就係一位中年女仕,父親係中國人,母親係蘇聯人。事主當年一歲大時,外婆帶佢返烏克蘭探親,點知因為一啲事故返唔到中國,從此就與父母相隔兩地,外婆臨終時交低一些文件,係證明佢同父母嘅關係及當年嘅出生地,事主就係拎住呢啲文件搵俄羅斯電台人員幫手尋親,亦都係好好彩,幫佢搵得番媽咪,但原來爸爸就等唔到呢一刻,早些日子已經離開咗,當媽咪知道咗女兒下落之後,同樣十分激動,泣不成聲,大家上台相認時,當然亦非常激動,完全唔識講嘢,當事人就連企喺隔離果兩個人係邊個都唔知,直到媽咪向她介紹,先知道原來係自己嘅親生細佬妹!


 




        跟住呢個 case 就仲經典,當年嘅一個中國青年相識了一位熱愛中國文化蘇聯少女筆友,不斷書信來往,慢慢由筆友發展成情侶,但由始至終都未見過面,後來,少女嘅爸爸發現到書信字裡行間有著愛情字句,於是就將中國青年寄俾佢個女嘅信通通收起,從此兩人失去聯絡。事主一直以來都喺度等緊呢位少女,直到五十多歲時先成家立室。現年已經七十六歲嘅 "青年" 覺得不明不白,為解開心中嘅謎,所以就請電視台幫手搵果位少女,當然,又係一個成功case 啦!不過,當事主喺台上見到對方之後,覺得唔似係事實,仲話果位老婦個樣真係生得好似當年果位少女,主持人董卿就即刻話:「咩叫做生得好似呀,佢根本就係果位少女,唔通你唔相信嗎?」於是 "青年" 就問咗對方幾個問題,果位老婦全部答中哂,佢先至真係相信眼前就係當年嘅筆友。


        雖然我講嘅呢三個 case 都係成功幫到事主,但唔係每一個 case 都成功,好似果位搵奶媽嘅女仕就暫未有回音,希望佢可以早日達成心願!


       感性嘅我,當然係一路睇就一路喊啦,就連主持人及兩國嘅現場觀眾,男女老幼都不停流淚,因為大部份嘅個案都已經係事隔五十幾年,咁樣都能夠搵得番自己想搵嘅人,真係絕對係奇蹟!難怪多位事主都不約而同咁話,自己係世界上最幸福人!


        老實講,如果香港都有呢個媒體平台,我都一定會申請,希望可以幫我搵得番媽咪,但係,我都好清楚知道,我可以跪低攬住媽咪雙腳做個 "世界上最幸福人",根本係無可能 ………


6 則留言:

  1. 能夠同親人團敍, 佢地真係幸福!
    [版主回覆04/07/2011 01:46:00]        無錯,真係恨死隔離呀!

    回覆刪除
  2. 相隅半世紀..終於等到重聚一日...如果另一方面都可以咁有人性...就真係一天都光哂....
    [版主回覆04/07/2011 01:49:00]        見到佢 哋可以同親友重聚,真戥他們高興呢!         " 另一方面都可以咁有人性...就真係一天都光哂.... "         妳係想講咩呀?

    回覆刪除
  3. very touching...
    lets hope that there will be no more unwilling separations in this world.
    hughug!
    [版主回覆04/07/2011 01:54:00]        Of course, we don't want to see any separation in the world. However, we can't control it. We need to treasure our beloved family and friends.

    回覆刪除
  4. 人權 ....唔好成日無情情以莫須有既所謂罪名拉人...拆散美好家庭...
    [版主回覆04/07/2011 14:20:00]        唉, 啱 啱先有個藝術家又遭殃!

    回覆刪除
  5. 單是睇內容, 我都好感動. 分開50年, 要趕快追回時間喔
    [版主回覆04/07/2011 14:21:00]        所以要珍惜眼前人呀!妳有時間睇番個節目啦,真係好感人!

    回覆刪除
  6. 呢度冇得睇。多得你分享我上左YOUTUBE度睇。好感人!
    [版主回覆04/09/2011 15:50:00]        唔駛客氣,我就係因為覺得節目有意義兼好感人,所以咪同大家分享囉!

    回覆刪除