2011年9月29日星期四

但願如此!!

        前日收到 Ryan 個考琴成績單,不過我無即刻拆開,因為應承咗留番俾佢自己拆。噚晚拎張成績單俾佢自己親手拆開時,見到佢非常緊張,即使信封已經拆開咗,佢都唔係好敢睇,點知後尾發覺原來自己拎到 distinction 時,即時大嗌狂叫之餘,仲立即打電話俾媽咪報喜!我知道佢真係好開心,衝入房之後出番嚟見佢眼濕濕,就知佢自己都喜出望外,梗係啦,佢之前咁懶唔練琴,臨考前幾日先發力,有咁嘅成績真係估唔到!


        今朝一早收到 Ryan 電話,佢話Facebook 度寫嘢俾我,我睇完之後,到我估到估唔到咁細個人仔會寫一段咁長嘅文字多謝我:


關sir :
我很衷心感激你由2005年12月到現今, 一直也用心地教導我, 從來對我不離不棄, 就算我常常沒有認真地上堂, 也常常不聽你的話, 甚至常常激怒你, 你也願意耐心地教導我, 三次的比賽和今次的考試, 你都能選擇適合我的歌曲, 應該留意的地方, 令我每次也能有很好的成績. 我知我真的不聽話, 每次都是臨近比賽和考試, 才肯乖乖努力, 我知如果我肯一早乖乖努力, 成績應該可以更好, 今次考試能夠取得distinction, 你的功勞真的是最大, 三首考試歌能夠有27,28,29分, oral 也能差一分滿分, 如果scales & 我聽你話早一點練習, 也能取得更好的成績.
我希望自己由下星期三開始會用心上堂, 盡量不令你生氣.
Ryan 上



        平時同佢上堂真係勁辛苦,同佢一個上堂就等於上3 個學生咁樣,要勁大聲鬧,仲要拎埋籐條上堂,佢先可以 under control,我都同佢一家人講笑咁講,上下左右鄰居實覺得好出奇,點解逢星期三晚都聽到咁大聲 "狗吠聲" 嘅呢!?


        希望呢次考試成績可以俾到佢一個鼓勵,以後上堂真係可以認真兼俾心機啦!其實佢真係好有天份,平時勁懶練琴,學琴前一晚先練得半個鐘至九個字,到覆琴時當然表現唔好啦,但老實講,比起好多勤力練琴學生還要好呢!!你話死唔死呀!!所以之前我曾經同媽咪講過關於佢嘅學琴情況,媽咪雖然唔識彈琴,但聽完之後就話 Ryan 將會係我嘅 "代表作",但願如此啦!


5 則留言:

  1. 自己考到 distinction 會好開心, 如果教到一個頑皮學生考到 distinction重開心. 你好有耐心呀!  
    三首歌攞到 27,28, 29/30 都已經唔簡單, oral重 攞到 17分更難喇 ! 叻 !   
    [版主回覆09/30/2011 12:31:00]        我就係因為唔係好耐性先至咁惡鬧佢!         係呀,呢次重係佢第一次考試咋!其實佢真係好有天份,如果佢學唔好真係好 嘥 呢!

    回覆刪除
  2. 考試之麻, 又唔係上斷頭台..使鬼咁緊張咩...考唔到咪下次囉...依家班港童真係冇鬼用,點出大場面呀...平時又唔勤力練,又唔係有天份..考到都係僥倖咋....考唔到都預左啦...嘈都冇用架...
    [版主回覆10/01/2011 23:07:00]        唉,妳估個個都係咁有表演慾咩!         依家 啲細佬真係好難教,比起十幾年前教 嗰 啲學生真係差好遠!

    回覆刪除
  3. 我唔係話要佢有表演欲..係佢根本就係抱住僥倖既心態, 學琴最緊要多練...佢臨時抱佛腳 , 就算過左骨,都唔係真本事...
    [版主回覆10/01/2011 23:58:00]        我意思係,即使練到有幾好,有幾熟,無表演慾 嘅人就即刻見光死,緊張到呢 …… 表現即刻大打折扣。         所以咪唔想 啲學生成日都考試、比賽囉!寧願做好基本功,打好個底 先見人,每次練考試歌同比賽歌都 嘥好多時間,要完全放棄哂正常課程曲目咁滯!

    回覆刪除
  4. 練琴唔係為左表演,係一種修養...內在有咁既修養, 去到邊自然心定氣閒..為左考而考...根本質素唔夠.

    回覆刪除
  5. 恭喜恭喜!能教到一個有天份的學生真是很難得的。
    [版主回覆10/04/2011 01:27:00]        多謝妳呀熊貓泰山!

    回覆刪除