西檸煎軟雞

        前幾日整完個藍莓檸檬蛋糕之後，用剩咗大半個檸檬，除咗用嚟沖檸檬茶之外，噚晚就用咗嚟整西檸煎軟雞。

 

材料：
急凍雞扒
粟粉
雞蛋
檸檬

醃料：
鹽
糖
雞粉
生抽
紹酒
麻油

芡汁料：
檸檬汁
白醋
糖
鹽
吉士粉

- 雞扒解凍後洗乾淨，用抹手紙索乾水，之後用醃料醃一個鐘以上。

- 雞蛋拂打成蛋液，將醃好嘅雞扒蘸上蛋液，再撲上粟粉。

- 燒熱油，先將雞皮果一面煎至金黃香脆，之後翻轉將另一面煎熟，盛起。

- 檸檬刨皮後，榨出檸檬汁，連同檸檬皮茸、白醋、糖同鹽一切煮滾。

- 吉士粉用小量水開勻後，倒入煮滾嘅汁料內埋薄芡。

- 將芡汁淋上已切件雞扒即成。

 

 

 

 

雞皮煎到脆卜卜，但雞肉就好鬆喎！

 

要清檸檬、清吉士粉，整呢個餸簡直係不二之選！

 

 

Notes：
- 雞扒唔駛撲上太多粉，否則就會食到一層厚厚嘅硬粉。

- 煮芡汁時可酌量加水以調校合適嘅稠度。