抹茶馬卡龍 Matcha Macaron

話說近排經常整布甸，而整嚫布甸都一定會用到一至兩隻蛋黃，咁即刻話，會有蛋白剩啦，依家冰格都儲咗差唔多十隻蛋白喺度，係時候要清倉啦！

 

另外，好耐之前買落包假白朱古力到依家都成包喺番度咁滯，每次做裝飾都只係用得嗰少少，都唔知幾時先用得哂！如果係好食的話，咪就咁食咗佢算數囉，弊在佢又勁甜、勁難食喎，真係都唔知點處置好。突然間諗起本洋菓子食譜有教整一個 macaron 係用白朱古力嚟做餡，咁就真係好到加零一喇，因為不但可以幫手纖滅咗啲假白朱古力，仲同時間幫手清一清蛋白，真係一舉兩得，正！

 

    所以，呢個 macaron 可以話係清貨尾之作呀！！

 

抹茶朱古力醬

材料：
抹茶粉     1 / 2 茶匙
熱水     1茶匙
白朱古力   40 克
淡忌廉     30毫升

- 抹茶粉用熱水開勻；朱古力切碎後，連同其餘材料倒入容器內隔水加熱。

- 攪拌至朱古力完全溶解後，移離熱水攤凍，放入雪櫃雪至凝固。

 

 

抹茶馬卡龍

材料：
杏仁粉    42 克
抹茶粉    3 克
糖霜 70 克
蛋白 35 克
糖    15 克

- 杏仁粉、抹茶粉同糖霜過篩，備用。

- 蛋白用電動打蛋器打至起泡，之後將糖分 3 次加入，打至 9 成企身。

- 將粉糖混合物倒入蛋白霜內，用膠刮拌勻及輕輕按壓。

- 當粉糊變得柔滑並出現光澤時，就可以停止攪拌。

- 將粉糊裝入唧花袋內，之後喺已墊牛油紙嘅烤盤上唧出粉糊。

- 靜置一旁，直到粉糊表面變得乾爽不黏手為止。

- 將焗爐預熱至 200 °C，之後降至 170 °C，放入粉糊焗 2 分鐘。

- 打開爐門降溫，並將烤盤前後掉轉，用 130 °C焗 5 分鐘。

- 當裙邊出現之後就用錫紙鋪上烤盤面，繼續焗多 20 – 25分鐘。

- 出爐後小圓餅直接於烤盤上攤凍，之後搽上抹茶朱古力醬即成。

以上材料份量可做直徑 4 厘米小圓餅約 8 個。

 

食譜出自福田淳子嘅《我愛和風洋菓子》。

將一張已畫有圓圈嘅紙墊喺牛油紙下面，方便唧出大細相若嘅形狀。
你睇，我真係唔係好識揸唧袋 o架，唧到鬼五馬六！

對於個焗爐嘅 40 °C 發酵功能，小弟真係非常讚賞，除咗冬天整麵包時
唔駛等發酵等到頸都長之外，將盤馬卡龍粉糊放入去焗十零分鐘，
表面已經乾哂，一啲都唔黐手，以後都唔駛怕潮濕天氣
整唔到 macaron 喇！

嘩，居然全部都焗到有裙邊喎！雖然唔係太靚，但我已經好滿足喇！

一邊食住抹茶 macaron，一邊歎杯 Winnie 喺日本帶返嚟嘅綠茶，
簡直係絕配啦！

Notes：

- 原食譜有加入 1 / 2 茶匙乾燥蛋白製作蛋白霜以增加穩定性。

- 食譜中提到，按壓蛋白霜可以使其發泡一致，此步驟叫做 macaronage。

- 烤盤上鋪上錫紙可以避免烤燶餅面。