2013年6月9日星期日

橙香南瓜伯爵雪芳

一直都覺得雪芳蛋糕比較難去做裝飾,當然,如果抹上打發忌廉之後就可以有多啲變化,但查實唔係太多人鍾意食 cream 囉,尤其係送禮,如果對方唔鍾意的話,咁就真係浪費心機,自己白做功夫之餘,對方又未必欣賞。但係自從上次整過抹茶豆腐雙色雪芳之後,發覺效果都唔錯,即使唔抹 cream 都唔算太差,都見得吓人。


 


聽日我約 Li Kien 一齊去探陳老師,自從佢搬咗新居之後,一直都未有機會去拜候佢,而且早前佢結婚時我原本係會出席佢個婚禮,點知又嚟嚴重感冒,又係失埋聲嗰隻哩,雖然個人狀態無乜事,但費事儀式進行時又咳又打乞嚏咁失禮啦,最後都係無去到!所以要整番個蛋糕做伴手禮至得呀!








材料:
熱水 55 毫升
伯爵紅茶葉 1 湯匙
南瓜 50
橙汁 30 毫升

低筋麵粉 80
蛋黃 3
60
橄欖油 35 毫升
橙酒 1 茶匙


橙皮茸 1 個橙份量
蛋白 4

-
先將 1/2 湯匙茶葉加入熱水內攪拌,冚蓋焗 3 分鐘,之後用茶隔過濾,攤凍備用。



-
南瓜切粒,隔水蒸至半腍狀態,趁熱用叉壓爛,加入少量橙汁拌成南瓜蓉。



-
用膠刮將蛋黃打散,加入 20 拌勻,加入橄欖油攪拌勻均後平均分成兩份。


-
將剩餘茶葉放入攪拌機內打碎,連同 30 毫升紅茶加入其中一份蛋黃混合物內。



-
另一份則加入南瓜蓉、剩餘橙汁及橙皮茸,攪拌均勻。



-
麵粉過篩 3 次後平均分成兩等份,分別加入兩款蛋黃混合物內,攪拌成麵糊。


-
蛋白用電動打蛋器打至起泡,之後將剩餘糖分 3 次加入,打成八成企身蛋白霜。



-
將蛋白霜平均分成兩份,分別拌入兩款麵糊內。



-
將兩款麵糊交替地倒入模內,然後喺枱面輕敲數下,釋出較大氣泡。



-
放入已預熱至 180 °C 嘅焗爐內焗約 30 分鐘,出爐後立即倒扣攤凍。



-
脫模後即可享用。


 


以上材料份量可做直徑 17 厘米蛋糕 1 個。





激死人喇,偏偏個蛋糕係要嚟送禮,脫模時先至整爛咗個蛋糕面!!
伯爵紅茶味
嘅位置完全無事,全部出事都係南瓜麵糊嗰啲位置,
我懷疑可能係因為多咗南瓜蓉會比較吸油,攪到
唔夠油份而黐模,下次再整多次時試
扣減油用量,睇
吓會唔會好啲先!








唉,無理由做完一大輪功夫唔送俾人㗎!唯有遮遮掩掩啦,
希望兩位老師唔好介意喇!








Notes
-
南瓜勿蒸得過腍,否則會大量出水;而橙汁用量則視乎南瓜蓉嘅濃稠度而調整

-
若茶葉本身已經好碎的話,可用咖啡濾紙過濾茶液。



-
如果過濾後的紅茶份量太少的話,可加清水至 30 毫升。



- 蛋白霜拌入麵糊時,最好先取少部份與麵糊徹底混合,令到兩者密度拉近,易於拌勻。

2 則留言:

  1. 應該那那聲整過個嘛.....
    咁都比你遮倒........你都得架喇!
    不過好食就可以撘夠嘅!!!
    [F回覆01/01/1970 08:00:00]F

    回覆刪除
  2. 緊張大師-小女人2013年6月11日 下午1:08

    點解你可以分到個界咁清楚既,好似有野分開來焗,好明顯呀.真係好靚.其實呢個模型唔扮都咁靚,我送給朋友無加東西上去的,食其蛋糕的美味,滿分
    [緊張大師-小女人回覆06/16/2013 18:41:50]我都有咁樣既經驗越緊張越容易爛,,,,壓力問題
    [版主回覆06/13/2013 22:46:03]咪就係咁先激氣嘛!
    [緊張大師-小女人回覆06/13/2013 08:58:43]唔會,爛少少唔阻個蛋糕味道只是外觀,當然個樣靚就最好,但始終手作功夫一定偶有閃失的..你平日那些咪整得好好,但總係送人那些會出事,我都有這情況出現
    [版主回覆06/12/2013 02:49:53]只係我用嘅兩種麵糊顏色對比比較大,望落咪好明顯囉!
    妳整嘅蛋糕好完整嘛,我呢個整爛咗,唔整色整水都唔得啦!

    回覆刪除