2015年6月11日星期四

蕎麥雜菜沙律

       禮拜一嗰日係 Charmaine 學校 study leave,所以佢提早咗朝早學琴,之後就可以去補習兼溫書,準備應戰大考。下晝突然間變得好得閒,所以決定去糧倉補給物資,順便買埋沙律菜。
 
        呢期藜麥 (quinoa) 大熱,個個都話要食 super food,但我一直都無試到,一來價錢唔平啦,但其實貴都唔係問題,最怕係唔啱食的話都唔知要唔要好,你知啦,呢啲健康食品唔係個個人都鍾意食㗎嘛,真係送都未必要㗎!!
 
        唔知點解,見到藜麥個樣成日都形住佢係好硬,唔易消化,食到頂心頂肺,呢個亦係我主要無買嚟試嘅原因。早前同 blog 友小月傾開,佢話寧願食蕎麥 (buckwheat) 好過,質地相對比較軟啲,易啲消化,咁啱糧倉都有得賣,而且價錢相對經濟好多,買包試吓整沙律先!
 
 
今次個沙律好多料,有薯仔、紅菜頭、青瓜、芽菜、
車厘茄、醃酸乾蔥、牛油果,當然仲有蕎麥啦!







見過有藜麥賣超過 $50 ,呢隻蕎麥就賣 $18 斤,
維起即係約 $13 ,經濟好多!
 
 
 
 
 
 
上網睇過有好多唔同處理方法,有蒸、有煮;有先用水浸、有唔浸水
直接煮,我呢次嘅做法係洗淨後先浸水一個鐘,之後放滾水
內煮,幾分鐘就已經煮腍,攤凍後放番入雪櫃,
雪過之後口感更加煙韌。






今次啲芽菜發得唔好,除咗因為啲綠豆有部份蛀咗之外,最主要
今次用個新筲箕發芽菜,筲箕底同盛水盤之間空位唔係
好夠,攪到啲根 "Au3" 爛咗,所以發育唔健全,一係
長唔高,一係就奀佻鬼命咁款!!後尾用
蒸架承高之後通風就好好多。
 
 
 
 
 
 
沙律材料豐富,加任何自己喜歡嘅 dressing 都一定好食。
 
 
 
 
 
 
買沙律菜時,秤好哂價準備俾錢時先發現原來新返咗冰菜,八卦
問吓價錢同食法,但個負責人見我無乜反應無諗住買,
於是佢就話搭一條俾我試吓,反正一樣價錢。果然
口感超爽脆,仲真係有少少鹹味哦!


12 則留言:

  1. 回覆
    1. 哈哈,係呀,係 "金" 呀,不過無第三聲個符號!!

      刪除
  2. 我也好有興趣自己發芽菜呀!你一天換幾次水的?

    回覆刪除
    回覆
    1. 妳都發啦,真係無乜難度,俾得起錢買有機綠豆好似靚啲!

      天冷就早晚各一次;依家咁熱就早、午、晚都要同佢沖涼喇!

      刪除
  3. 你好﹗其實藜麥的煮法都是要先浸水,煮熟後都係淋身的,不過真是有點類似草青味(不大懂形容)
    但如果做沙侓應無問題。但從經濟角度來睇,又真的蕎麥比較化萛呢。
    請問你的糧倉在哪裡?需要做會員嗎?謝﹗

    回覆刪除
    回覆
    1. Ada,我咁耐都未試過藜麥,就係因為太貴,感覺唔多值!

      哈哈,都係講笑咁講話係我個糧倉啫,其實係屯門一間糧油批發店,係人行入去都可以買嘢㗎!

      刪除
  4. 蕎麥麵食得多,但未試過就咁食蕎麥呢~~
    我好想試下冰菜呀,好得意咁!

    回覆刪除
    回覆
    1. 蕎麥原來可以咁食,唔係小月講我都唔知!!

      冰菜係個外表同味道比較特別,煮熟食係點就唔知喇!

      刪除
  5. 想知D冰菜乜價錢,除咗爽脆和有咸味,似那一類菜呢?

    回覆刪除
    回覆
    1. 我買嗰檔就跟其他沙律菜一樣,賣 $24 / 磅。

      似邊種菜呀 ……… 夾硬講就有點似茼蒿囉,不過就無嗰種特別味道。

      刪除
    2. 我買平D喎,我覺得質地似皇帝菜,但味就唔同囉。

      刪除
    3. 係囉,平六份一呀!

      皇帝菜我都一樣覺得似茼蒿哦,呵呵!^^

      刪除