2015年6月21日星期日

五香素粽

        一直都唔係好敢自己包粽,因為怕包得唔好,烚完之後會漏料,浪費一番心機。早前 Facebook 「素食青年」群組內見到有素友包素粽,包得好靚,於是就請教佢點樣包粽,呢位素友真係好好,不單只無私地分享製作心得,細心指導,仲不斷送上溫馨提示,人家咁有心,我都唔可以辜負佢嘅好意,所以今日終於的起心肝嘗試包粽。
 
        想學識自己包粽,最重要唔係為咗滿足自己口腹之慾,而係可以包素粽供佛;再者,八年前嘅端午節經歷咗我人生中最黑暗、最低潮的好一段時間,所以我都想藉住一隻素粽表達自己心意。八年前嘅今日,俾我體會到中國人憑傳統經驗累積總結出的一句說話:「過唔到大時大節!!」身邊亦有親友係喺大年初一及冬至前後離開的呢!
 
 

材料:
糯米
紅豆
眉豆
開邊綠豆
粽葉
水草

調味料:

五香粉
香菇粉

- 糯米及豆類分別洗乾淨,用清水浸過夜,第二日將水倒去,再過一次清水,瀝乾。

- 粽葉同水草洗淨後放滾水內烚 5 分鐘,撈起瀝乾水份,將頭尾兩端略修剪成平口。

- 糯米、紅豆、眉豆及調味料均勻混合;開邊綠豆加鹽拌勻。

- 摺好粽葉成兜狀,先放入糯米豆,然後加入開邊綠豆,最後再鋪上糯米豆。

- 將粽葉摺好封口,用水草將整隻粽紮緊。

- 用真空煲內鍋煲滾水,將粽放入,翻滾後轉慢火烚 30 分鐘。
 
- 調至大火煲 10 秒鐘,然後放回真空煲外鍋,2 個鐘後粽就已經烚好熟透。

 
 
一切準備就緒,準備開工!
 





包粽時就真真正正知道咩叫做五花大綁,好似
同隻粽玩 SM 綑綁咁,慌死佢會爆開!
 
 




原來都真係有一定難度,因為無經驗,所以粽葉修剪得太細,
只可以包好少料,不過就錯有錯著,細隻比較易控制,
但唔知係咪買到嘅粽葉同水草唔係靚貨哩,
有啲會斷,而粽葉就好多塊都裂開,
攪到包少咗好幾隻呀!!
 





攪到剩番咁多料,唯有掟上冰格保存,下次再玩過啦!
 





一直擔心嘅事始終都有發生,一打開個煲就見到有一隻粽
爆開哂口,好彩啲料無走到出嚟,不過就
因為入咗水而將味道沖淡囉!
 





平時買粽返嚟烚好之後,最怕就係解開粽葉,攪到成手都係油,
所以今次刻意要做個實驗,無落肥肉之餘仲無落油
去撈米,結果係完全無分別呢!
 





禮拜五朝早約咗 LouisaErnest 媽咪同 Winnie 一齊見面
lunch因為我同 Winnie 都早到,所以先去街市買花,
Winnie 即係醒水知道咩事,所以要爭住俾錢,
我都唔同佢爭喇,因為係佢一番心意,
我代媽咪跟佢講聲多謝啦!
 
 
 
 
Notes
-
包入材料時記得將粽葉光滑一面向上,避免烚好之後糯米黐實粽葉。

- 粽烚好之後要立即撈起,趁熱加快粽葉風乾,否則水份難以完全蒸發,容易變壞。

- 若用明火烚粽的話,需時約 2 – 3 個鐘先可烚至熟透,視乎大小而定。



16 則留言:

  1. Kestrel,早晨!
    haha......都話您得㗎啦!
    拍掌拍掌......
    嗯! 有隻爆開,我諗係d葉剪得太短,有今次嘅經驗相信您下次會包得更靚更好!!
    繼續加油努力!!!!!!

    hahaaaa......剛發現我昨早留言嘅嘢都無係您blog度,好奇怪?????!反而係我Email度就通知我係您blog度有新嘅留言,好奇怪哦!

    回覆刪除
    回覆
    1. 嚴格嚟講真係唔掂㗎,根本完全都無形狀可言,完完全全埋到欄綁得埋就算喇!!!

      係囉,無經驗即係無經驗,以為見剪完仲有番咁上下長,但原來一對摺就得番好短喇!多謝妳鼓勵呀 CM!

      Google blog 係間唔中神神哋㗎!

      刪除
    2. haha......加油!!!!!!

      嘻嘻……我個人認為用線代替水草易控制!
      下次您可以試用下。

      刪除
    3. 我買咗紮水草返嚟今次先用得幾條,有排先用完 lu!

      刪除
  2. haha.....!真係超奇怪囉??!
    剛才我又試過去昨日留言那篇blog度再留言,又出現以上我提及嘅問題喇!
    啊! 問題出在哪!

    回覆刪除
    回覆
    1. 我估應該係個 server 問題,唔關妳事。

      刪除
    2. 係囉,都唔知發生咩嘢事!!!!!!
      在您那篇blog度留言,係無發佈,只是在Emial度通知我已在您那篇blog度發佈了。
      係哦! 咁您Email有冇收到呢?

      刪除
    3. 我覆咗妳喇,妳 check 吓 e-mail 啦!

      刪除
  3. 第一次包已經咁靚,係好叻了。
    古語有話:每逢佳節倍思親,逢年過節我都有D感觸,不過,隨着歲月的過去,亦給自己開解,要活在當下,珍惜現在所有。

    回覆刪除
    回覆
    1. 其實真係好樣衰㗎,只係我擺好個靚位先影相咋,哈哈!! ^^"

      係㗎,我依家最怕就係母親節囉!不過都過咗咁多年喇,算係平伏心情之餘,已經無咁傷痛喇!

      刪除
  4. Kestrel, 第一次包已經好叻呀,畀個叻你! 繼續努力

    回覆刪除
  5. 回覆
    1. 其實只可以叫做包得埋咋,完全無形狀可言呢!

      刪除
    2. 冇散開就叫成功架啦~~~^^

      刪除
    3. 哈哈,雖然係,但真係好樣衰囉,得呢隻見得吓人咋!! ^^"

      刪除