2015年9月8日星期二

姬松茸豬骨煲節瓜湯

        見到我煲肉湯係咪覺得好出奇呢!?真係 N 世都唔會煲一次,因為怕麻煩嘛,又要洗肉,又要汆水,汆完水之後又要洗多個煲,煲完湯之後個煲又一定要用洗潔精洗先洗得乾淨,比起煲素湯真係多好多功夫,不過因為今日無太多時間留喺屋企預備餸菜,所以就用豬骨煲湯,有瓜又有肉食,可以煮少碟餸
 
 
咗豬骨、節瓜同姬松茸之外,我仲落咗枝竹、眉豆同生熟
薏米,都唔知夾唔夾喇,食唔痾、食唔死就得啦!






以前媽咪話過,枝竹個彎位比較難燜得腍,所以每次都會將個
彎位留起,儲夠一定數量就用嚟煲湯,咁就一定
得腍喇,我依家都係照版煮碗咁做呢!。
 





因為我比較晏起身,通常落得街買餸都已經十一、二點鐘,
去到超市都唔會再有西施骨賣,點知噚日居然又有得
賣喎!我比較鍾意用西施骨煲湯,因為比較多肉
之餘,脂肪都相對少,湯就唔會太油。
 





不嬲媽咪都話豬骨汆水一定要凍水落煲,佢又無講點解,
所以我都係照做,不過試過有次貪得意煲滾水
落豬骨,效果真係差好遠,煲一輪都唔會
好似依家咁多雜質血水出嚟。
 
 
 

10 則留言:

  1. 我都係凍水落咖,我諗係因滾水落就會立即收縮,D血水雜質就好難出來了。

    回覆刪除
    回覆
    1. 因為肉類血水都係含有蛋白質,一遇到高溫就會即刻凝固,黐番喺骨裡面,所以咪出唔到嚟囉!

      刪除
  2. 我依家反而多煲素湯。我下次回來都會買D姬松茸, 飲過都好香。

    回覆刪除
    回覆
    1. 我真係好少少會煲肉湯,真係十年都唔逢一閏!

      係呀,姬松茸煲湯真係好香,我試過用嚟煮 risotto,一樣超香呀!

      刪除
  3. Kestrel, 你竟然煲肉湯,我以為我眼花。 我都煲咗靈芝湯飲,都係菌類。XXD

    回覆刪除
    回覆
    1. 係哩,連 cici 妳都覺得出奇哩!! ;)

      妳果然鍾意飲湯,我一出篇關於湯嘅 post 妳就即刻有回應!

      刪除
  4. 煲湯落肉的,我都係用西施骨或豬展~~

    回覆刪除
    回覆
    1. 我唔會用豬腱煲湯,雖然煲完湯之後食得番,但湯就一啲甜味都無!老友話我知,佢個相熟肉佬話豬腱唔係用嚟煲湯,係用嚟燉湯㗎!

      刪除
  5. 我都係凍水落,汆水果煲水真係污糟到呢........
    西施骨好丫,煲完湯D肉仲食得

    回覆刪除
    回覆
    1. 係囉,之後洗煲超麻煩,因為啲血水雜質凝固咗喺個煲身,黐到實一實,一定要用鋼絲刷先攪得掂,所以我好少煲肉湯就係嫌麻煩囉!

      係呀,我就係呢個原因先買西施骨囉!不過我其實比較鍾意用瘦肉煲,因為幾乎無油咁滯,啖湯特別甜,煲完之後我都照食㗎!

      刪除