與 blog 友交流煮食心得，分享生活點滴。
好耐都煮過炒粒粒菜式喇，星期一果日我就用咗翠肉瓜做主材料嚟炒粒粒，加入咗少量柱侯醬，味道唔會太濃，但就為呢個菜式生色不少。
材料：
翠玉瓜
急凍粟米
甜菜甫
花生
蒜茸
調味料：
柱侯醬
紹酒
糖
鹽
麻油
- 花生去衣，放白鑊內炒香及炒至金黃色，備用。
- 粟米解凍後略沖水，然後汆水、瀝乾待用。
- 菜甫略為沖洗；翠玉瓜洗乾淨，將兩樣材料切粒。
- 燒熱油，爆香蒜茸後，加入菜甫同柱侯醬一齊爆炒。
- 加入翠玉瓜，與醬料兜炒均勻後，灒酒。
- 加少量水，冚上鑊蓋將翠玉瓜略為煮至軟身。
- 加埋粟米後炒多一陣就落埋鹽同糖，抄勻。
- 最後落埋已炒香花生，立即熄火，灑上麻油，兜勻即可上碟。
Notes：
- 想知道點樣可以易啲將花生去衣，請參考「花生去衣方法」。
- 相方便的話，可用罐頭粟粒米代替急凍粟米。
- 柱侯醬只為吊味，唔好落太多，否則就會失去翠玉瓜清新味道。
- 花生不要炒太耐，否則會變腍身而唔鬆脆。
今朝買完餸返屋企，一邊食早餐，一邊睇報紙，睇到衡仔攞到今年嘅「十大傑出青年」，一路睇落去，點知見到鋼琴老師鄭慧博士都榜上有名喎！真係戥佢開心喇！我自己都係第一次身邊有熟人咁 "巴閉" 攞「傑青」咋，我諗應該係我近幾年嚟最值得開心嘅一件事。
Miss Cheng，congratulation！！恭喜妳榮升做香港傑青！
酒我就唔飲 o架喇，依家就以一杯自製豆漿代酒，暫時喺網上慶祝先啦，到11月約妳同 Winnie 出嚟食飯時再同妳補番慶祝。
Cheers！Brava！！
今日係中秋節，首先喺度同咁多位 blogger 講聲中秋節快樂，一家人開開心心、團團圓圓！
雖然今日係中秋節，但我就自己一個人喺屋企過，因為老豆佢今日喺農場同個 friend 及一班幫手一齊做節。不過你哋唔好以為我好慘、好寂寞呀！因為我唔單只唔駛煮飯，仲樂得清閒，俾我有時間覆番哂唔同 blog 友嘅回應，因為之前好忙，根本無時間 check 吓 blogger 回應同 updates，積積埋埋有超過 50 個 blogger 嘅回應同 updates 喺我 e-mail 度未睇呀！
既然今日係中秋，咁就出番篇關於月餅嘅 blog 嚟應吓節啦！年年我屋企都唔會買月餅，因為唔會送禮。媽咪成日都話 "襯家兩面"，唔好攪咁多嘢啦，我哋都唔送番俾佢哋，費事又要回禮又封利事，又買生果，你俾我、我俾你，交換禮物咁，玩咩？唔好煩喇！大家有心就得喇。所以好多年都已經無呢個習俗啦！不過照舊仍會收到月餅，有時係阿馳公司拎返嚟，不過多數都係 Winnie 屋企多都食唔哂，會俾咁啲我囉，起碼好過丟咗佢咁嘥呀！
呢盒「聖安娜」係 Winnie 俾嘅。咁多間餅店之中，我不嬲對佢都無乜好感，所有 products 都差過人，但 Winnie 話今年有啲改善喎，試吓睇吓點！
呢盒「美心」都係 Winnie 俾嘅。美心一直都唔錯，keep 到水準！不過呢盒係我同 Winnie 獨有特別版，你哋夠眼利睇得出嗎？
呢個就比較特別，係一間好出名嘅齋舖「東方小祇園」 (呢，阿蘇最鍾意去食齋鹵味果間呢 ！) 出嘅藍莓果仁月餅。因為阿瑩知道我比較鍾意食五仁月或金華火腿月，所以送個俾我食囉！上年佢就喺「大同」度買咗個俾我，都幾好食呀！既然今次呢個係齋鋪整嘅，我就一定可以放心要嚟供佛啦！
呢兩個「奇華」嘅「麥芽糖醇迷你高纖果仁月餅」係 Winnie 送 o架！我今次係用個「送」字，而唔係用個「俾」字，因為係佢出錢買，唔係人哋俾佢！佢知我都鍾意食五仁月，所以咪請我試食囉！
因為我 check 過呢個「麥芽糖醇迷你高纖果仁月餅」都係齋月餅，所以特別俾媽咪囉！一個月餅、一個生果、一杯清茶，就已經係我同媽咪一齊過節嘅方式！
而呢個「陶源酒家」嘅月餅就係我老豆個 friend 送俾佢嘅。「陶源」嘅鮑魚就夠哂出名，唔知月餅又掂唔掂呢？
最後呢兩包冰皮月餅就係我自己買嘅。因為以前食過「東海堂」嘅冰皮好好食，全家人都鍾意，見之前八達通 send e-mail 嚟話用「日日賞」$1 加 $38 就可以買到兩包冰皮，見咁抵，咪買兩包返嚟應吓節囉！一包係日本柚子冰燒月，另一包係綠茶紅豆冰皮月。
唔好以為，咁多月餅，得我同我老豆兩個有排都食唔哂呀，其實有一盒係 Winnie 搭我拎俾 Louisa 嘅，而我又會拎兩個俾阿馳同阿瑩，其他果啲又係迷你月餅，所以其實都唔係好多咋！等我逐一食完之後，到時再報告吓邊間好食，邊間唔好食；邊間有進步，邊間退步啦！
P.S. 原來我一直都唔知呢個世間上有樣叫做「奶皇月餅」嘅物體，直到早前睇報紙先知，真係孤陋寡聞！
不過當我知道之後，就有幸可以即刻食到呀！當然，又係好友 Louisa 請我食啦！試過原裝正版「九龍酒店」貨色，仲試埋報紙話成日俾人誤會係原創嘅「半島酒店」貨色 o添！邊隻好食啲？真係唔駛多講，肯定係「正貨」好食啲，因為「A貨」比較甜同漏，同埋個味道無咁「真實」，可能有用到香油啩，所以我自己就覺得「正貨」比較出色，話哂都係真正原創者嘛！
呢排係咪成日都見我整啲 cream 嘅嘢食呢？哈哈！其實係咁嘅，上次同 blog 友幸福蠍講開買邊隻甜忌廉時，我順便問埋佢知唔知邊隻淡忌廉同樣無咁奶味，佢介紹我用「Anchor Whipping Cream」，話奶味最少 o架喇，咁聽到有呢個選擇，當然要試吓啦！但可惜「二記」只係得 1L 裝賣，無細啲 size 賣，咁都無辦法喇，要試就要買 o架啦！所以呢輪咪狂整用 cream 做嘅西點囉！幸福蠍仲好好人，教埋我開封後要用保鮮紙包實盒 cream，咁就可以擺耐啲。果然，包裝上寫明開封後要 3 日內用完，但直至依家，擺喺雪櫃都已經成果禮拜咁滯，都無變喎，呢個方法果然掂！坦白講，咁短時間要用哂1L cream，都真係幾高難度。
講番正題先，其實整雪糕先至係我買呢盒 cream 嘅重頭戲，真係為咗整雪糕先至買 o架咋！因為上次同 Winnie 貪得意亂嚟試整雪糕，整咗榴槤雪糕同藍莓雪糕，榴槤雪糕就梗係正啦，好食都暈！但係個藍莓雪糕我就頂唔順，可能藍莓本身唔夠濃味，加上隻 cream 真係勁重奶味 ( 因為之前我係買隻靚嘢「President」嚟整)，所以唔似榴槤咁可以蓋過 "朕" 奶味，所以我一路食，幾乎想嘔番哂出嚟，所以先至四出搜尋唔重奶味嘅 cream 囉！
之前一早已經搭 Winnie 喺書展幫我買本《我愛冰淇淋》，睇完成本書，我已經鎖定咗第一個要整嘅係抹茶雪糕，而且之前見到餅后 Vanlily 都係跟呢個 recipe 整抹茶雪糕，見佢都話好掂，咁我就更加相信我呢次無揀錯，所以就放心去整喇！
顏色對比好靚！雖然我已經專登去買個雪糕勺返嚟 "畢" 雪糕，
但係仍然唔識 "畢" 到一個靚靚雪糕球，有待改進！
材料：
綠茶粉 3湯匙
糖 2湯匙
豆漿 150毫升
蛋黃 2個
糖 (打蛋黃用) 70克
淡忌廉 150毫升
日式紅豆餡 適量
冰水 適量
以上材料份量可做約 4 - 5 人份量嘅雪糕。
食譜嚟自福田淳子嘅《我愛冰淇淋》。
抹茶雪糕
- 蛋黃同糖用電動打蛋器打到發白。
- 將暖豆漿逐小加入蛋黃糖霜中，攪拌均勻。
- 之後將混合物全部倒番入煲內，用慢火加熱，邊煮邊攪拌。
- 當混合物煮到濃稠時就熄火。
- 將綠茶粉同 2 湯匙糖拌勻，加小量蛋黃混合物落去，攪拌至綠茶粉同糖完全
溶解。
- 之後將綠茶混合物倒番入煲內，充分拌勻後，隔篩過濾到不銹鋼盤中。
- 不銹鋼盤座冰水，令混合物冷卻，之後放入雪櫃雪凍約 3 – 4個鐘。
- 淡忌廉座冰水用電動打蛋器打起至 7 成企身。
- 打起忌廉與綠茶混合物拌勻，用保鮮紙蓋好鋼盤放入冰箱。
- 30 分鐘後就拎番出嚟，用電動打蛋器打鬆，避免結冰變硬，之後放番入冰箱。
- 之後每隔 30分鐘就拎出嚟打鬆，重覆步驟約 3 - 4次，見混合物變成濃稠軟滑，
就可以將佢放喺冰箱裡雪硬，隨時可以食得。
紅豆蓉
- 將冰水逐小加入紅豆餡內拌勻，拌至適合濃稠度即成。
- 將紅豆蓉淋上雪糕伴食。
綠茶同紅豆簡直係 perfect match，好食到震！
( Winnie 實話我黐線！因為佢最憎綠茶味，勁抗拒！) 我諗之後我會整好多呢對 "孖寶" 嘅食品，好似綠茶紅豆卷蛋啦、綠茶紅豆糯米糍啦、綠茶紅豆麻糬波波啦、綠茶紅豆雪芳蛋糕啦、綠茶紅豆乜乜、綠茶紅豆物物 …………… 真係多都數唔哂，不過整到先算啦，呵呵！
Notes：
- 原食譜係用牛奶而唔係豆漿。
- 將豆漿加入蛋黃糖霜時，切忌一次過倒入，因為咁樣會令蛋黃即刻凝固結塊。
- 將蛋奶混合物加熱有助消毒殺菌，但要留意切勿加熱太耐，蛋黃仍然會被煮熟。
依我經驗，呢個步驟就好似炸嘢咁，千祈唔好炸到金黃色先至撈起，因為食物本
身嘅熱力會繼續 "煮" 緊，所以顏色就會過深。同樣道理，當見到混合物已經濃
稠時先熄火，其實已經太遲，蛋黃亦然繼續受熱，最終都係凝固結成細粒狀。
- 綠茶混合物一定要過篩，因為唔多唔小都一定有小部份蛋黃凝固，加上綠茶同糖
如果溶得唔好，一樣會結粒、結塊。
- 根據福田淳子嘅提示，綠茶混合物必須充份冷凍，否則加入打起忌廉後就會凝固
唔到。
- 若閣下係用雪糕機製作，當綠茶混合物充份冷凍後，就可以直接與淡忌廉混合，
倒入雪糕機內開始攪拌而毋須預先將忌廉打起。
今晚食飯時睇到電視播緊國慶慶祝節目，五光十色，場面熱鬧，但心裡頭就好有感觸！
祖國六十大壽，絢麗璀璨，色彩繽紛；
妳又係六十大壽，但就暗淡無色！
祖國六十大壽，全國同胞上下歡騰，熱烈慶祝；
妳又係六十大壽，但我知道妳唔會貪心，只需要有我一個陪喺妳身邊已經足夠，但可惜，我做唔到！
前後只係相差一個月，無多無少，真係啱啱只得一個月之差，境況就大大不同！
要見番妳，一定要盡我所能，將今世修好，但都唔係保證我一定可以得到接引。能夠一心不亂，向著目的地進發，當然係好事。但，我怕到時我嘅意志無妳咁堅定，路上迷途，亂跟人走，咁就真係嗚呼哀哉！
好在每年妳的生日，Winnie 都會陪我一齊去探妳，至少，我可以 "不愁寂寞"，唔會愔然神傷。呢個知己好友，真係唔話得！
到我離開時，如果身邊有人陪住的話，我好希望佢哋可以好似我當年咁樣，聞到一陣濃烈嘅檀香味，如果佢哋仲聽到大鑼大鼓聲，咁就真係「阿彌陀佛」嚟接引，真係可以腳踏蓮花上路，重逢嘅日子不遠了！
生日，真係咁值得慶祝嗎？我會慶祝另一個日子囉！
我嘅好友、死黨、學生、親友、甚至相熟 blog 友，都已經好清楚知道我點解會寫 blog，就算係一般 blog 友路過，一睇見 blog 頂個 banner，就已經估到係咩嘅一回事。
前幾日 blog 友毛豆就同我分享咗 3 首新詩，名為《母難日》。一睇個名已經估到係啲咩，所以其實已經做好哂心理準備，但係只係睇咗第一首詩嘅頭兩、三行文字，我已經控制唔到，眼淚直流！
3 篇新詩都好真實，好 touching，如非作者余光中同是 "過來人"，根本無可能寫得咁 "到"。真的，唯有經過 "母難日" 嘅朋友，先會感受到同樣的 "震撼"！咁有意思嘅詩句，我想喺度同大家分享一下。
《母難日三題》 余光中 (一) 今生今世 我最忘情的哭聲有兩次 (二) 矛盾世界 快樂的世界啊 悲哀的世界啊 矛盾的世界啊 每年到母難日 但是她住的地方 我該怎麼回答呢 若斷若連的臍帶 新詩雖然很感人，很有意思，但希望你 / 妳睇完之後唔會有好似我一樣震撼嘅 "共鳴"！
一次， 在我生命的開始
一次，在你生命的告終
第一次，我不會記得，是聽你說的
第二次，你不會曉得，我說也沒用
但兩次哭聲的中間啊
有無窮無盡的笑聲
一遍一遍又一遍
回盪了整整三十年
你都曉得，我都記得
當初我們見面
你迎我以微笑
而我答你以大哭
驚天，動地
最後我們分手
我送你以大哭
而你答我以無言
關天，閉地
不論初見或永別
我總是對你以大哭
哭世界始於你一笑
而幸福終於你閉目
(三) 天國地府
總握著電話筒
很想撥一個電話
給久別的母親
只為了再聽一次
一次也好
催眠的磁性母音
不知是什麼號碼
何況她已經睡了
不能接我的電話
「這裡是長途臺
究竟你要
接哪一個國家？」
天國，是什麼字頭
地府，有多少區號
那不耐的接線生
卡撻把線路切斷
留給我手裡一截
算是電線呢還是
就算真的接通了
又能夠說些什麼
「這世界從你走後
變得已不能指認
唯一不變的只有
對你永久的感恩」
新詩轉載自 http://blog.kej.tw/。
P.S. 再次多謝毛豆嘅誠意分享、關心、同鼓勵。
噚晚阿馳 call 我，問我今晚得唔得閒做節食飯，咁 "橋" 我又 dayoff，摘日就不如撞日，所以今晚就出咗街食飯，唔駛自己煮。
都係同往時一樣，近近哋去番海趣坊間「二宜樓」度食，唔駛煩！碼頭區佢都算叫做 OK 喇， 話哂「新星」集團衰極都有個譜。
餐牌封面係座客家圍屋，好客家 feel 呀！
先嚟一個客家雜菜煲，係用咗典型嘅客家用料 — 蝦米同土魷加
時菜，湯底好似有啲藥材味，最特別係加咗客家鹹肉落去。不過
唔知點解會有番茄！？
呢碟係蜜桃咕嚕肉，味道 OK，不過就唔係平時果種一嚿嚿肉，
而係一片片，好怪！
西蘭花炒帶子貴妃蚌，都幾好味。
呢個煲仔菜係豆豉雞煲，係我覺得最惹味嘅一個餸，底下爆香
咗嘅乾蔥頭好正，好香口，而雞肉又煮得啱啱好，滑而不嚡。
少少辣，好送得飯。
呢碟係秘醬蒸魽魚。
阿馳係第一個食，之後佢同我哋講，叫我哋食完之後睇吓有咩意見。我聽完之後好驚，佢咁講一定唔慌好啦！原來啲肉好 "削"，唔夠實淨，無乜味，仲有少少腥 o添！不過係我心目中都唔係最差個樣。
最差果樣反而係碗紅豆沙！唔夠甜味之餘，仲要有種好似 "打芡"
嘅感覺，杰杰地，勁唔好食！
天氣變得清涼乾燥，最好就係整番