Vitas 係女聲男高音、假聲男高音、男聲女高音、定係男身女聲呢？

        今晚喺 Youtube 度無意間俾我發現到一段片，係一個勁靚仔嘅 Russian 歌手 ( 唔清楚係俄羅斯定白俄羅斯人喇 ) 演唱 Schubert 嘅經典藝術歌曲 Ave Maria ( 即舒伯特嘅聖母頌 )，但最出人意表嘅係佢用假聲唱之餘仲好鬼似女高音 o架：

 

       之後仲搵到佢唱一首意大利歌劇中嘅 aria ( 詠嘆調 )，係 Donizetti 嘅經典歌劇 Lucia Di Lammermoor 裡面果首  Il dolce suono：

 

        呢段都係唱同一首 aria，不過有埋中文字幕，同埋佢個樣成熟好多，肥仔咗好多：

 

        哈，剃咗頭嘅佢仲清秀啲喎！呢首就唱番俄文喇，所以我唔知係咩歌！記得聽吓佢嗌好高、好高、好高音果段呀：

 

        佢個名叫做 Vitas，喺 YouTube 度有好多佢嘅 clips，唔知係咪又試係我自己孤陋寡聞，其實佢係一個好出名嘅 performer 呢！！

香草蘋果炆肉排

        如果無記錯的話，香草蘋果炆肉排應該係我入廚史上第一個煮嘅餸，但係已經唔係好記得點解當時我會煮呢個餸呢！照計當時我仲係 "做仔" 嘅時候 ( 依家唔係 "做仔" 啦，係做咗一家之 "煮" 呀！)，有媽咪照顧三餐，無理由會入廚煮飯 o架！可能因為當時我八八卦卦咁入廚房問媽咪有冇嘢要幫手，咁媽咪就順勢叫我幫手煮呢個餸啩。當然，梗係媽咪要從旁指指點點啦，因為當時嘅我，入廚經驗絕對係 "零"！查實當時我只不過係一部 "人肉遙控煮餸機"，等媽咪可以一邊 "煮" 呢個餸，另一邊就準備其他食材。 

        自此之後，唔知點解，每次煮嚫呢味餸，媽咪都會將個 "重任" 放手交俾我去煮，可能我煮得好食啩，呵呵！  都隔咗好耐無煮呢味餸喇，既然又有幾個供完佛嘅蘋果，今晚就煮啦！

材料：
腩排
蘋果
蒜茸
乾蔥頭
百里香 ( Thyme )
羅勒 ( Basil )

醃料：
鹽
糖
生抽
老抽
紹酒
粟粉
油

調味料：
糖
OK醬
喼汁
鮮醬油
黑椒粉
肉桂粉

- 腩排洗乾淨，用醃料醃好；蘋果批皮、去芯，切件備用。

- 乾蔥頭去衣，切細成乾蔥茸。

- 燒熱油，爆香蒜茸及乾蔥茸，放腩排落鑊煎香，灒酒，兜勻。

- 加入蘋果炒幾下，之後加水，冚鑊蓋略煮。

- 加調味料及香草，兜勻後用慢火繼續炆。

- 當腩排熟透、蘋果炆至軟身入味，就可以熄火，上碟。

Notes：
- 蘋果煮熟程度可依個人喜好而調節，蘋果煮得越腍就越入味。

- OK 醬味道較酸，最好試完味之後先落糖。

- 肉桂可提升蘋果香甜味，係做蘋果菜式嘅最佳配搭。

豉椒味菜炒雞柳

       好耐都無煮過用鹹酸菜嚟整嘅餸喇，突然好想食，所以今晚就煮咗呢碟豉椒味菜炒雞柳，好惹味 o架！

材料：
急凍雞扒
青椒
鹹酸菜
洋蔥
蒜茸
油爆紅椒

醃料：
糖
雞粉
胡椒粉
生抽
老抽
紹酒
粟粉
油

調味料：
鹽
糖
紹酒
豆豉醬
麻油

- 雞扒解凍後去皮、洗乾淨，切去多餘脂肪後切成雞柳，用醃料醃好。

- 鹹酸菜用清水浸 15 分鐘，洗淨後切件，用少少糖醃一陣。

- 青椒洗淨、切件；洋蔥去衣，洗淨切件，備用。

- 燒熱油，爆香洋蔥同紅椒，跟住加入青椒同鹹酸菜，兜炒一陣間，盛起待用。

- 爆香蒜茸，落雞柳炒兩炒，灒酒，之後加入少少水，冚上鑊蓋，將雞肉煮至 8 成熟。

- 將配料回鑊，加入調味料炒勻，熄火後灑上麻油，即可上碟。

Notes：
- 鹹酸菜要先用清水浸一陣間，以減低鹹味。

- 豆豉醬可用原粒豆豉代替。

- 煮配料時唔好煮得太熟，否則回鑊再炒就會變得過熟，又黃又軟身。

椰香班蘭雪芳蛋糕再 encore！

        今次呢個 order 其實接咗好耐 o架啦，比起 Winnie 個 order 仲要早好多，但因為唔係咁方便買到班蘭葉，所以拖到依家先完成埋呢個 order。

         其實個 order 係老豆個農場 friend 叫我整個魔鬼蛋糕同班蘭戚風俾佢試嘅，咁既然整咗咁多班蘭椰漿喺度，咁就整個班蘭俾佢哋先啦！

        今日我用 17 cm 戚風模嘅份量做咗兩個細蛋糕，一個當然係俾老豆個 friend 啦，另一個就梗係留番嚟我同老豆品嚐啦，無理由整兩次自己都無得食 o架！  整完後試味加事後檢討都要啩！！

        上次幫 Winnie 整果陣，以為蛋黃無打發而令蛋糕唔係咁發得起，但原來係唔關事。今日再整時，就發現當蛋白霜拌入蛋黃班蘭混合物時，就立即聽到好細聲嘅 "吱吱咋咋"，不停咁響，原來係啲蛋白霜消緊泡呀！！所以我就快快手拌好之後就倒入模兼入爐焗，所以今次問題就唔係咁大，同埋唔會太濕。之前整 Winnie 個蛋糕係 20cm，用料自然比依家多，所以需要較長時間去拌勻，亦因為咁樣，蛋白霜消泡時間亦多咗，所以就攪到發得唔好囉！

焗緊蛋糕，清洗用具果陣時，突然間俾我諗到個蒸餸架
可以要嚟咁用！哈，真係方便。

 

唔知點解，一個焗得咁金黃，而另一個就焗得咁淡色呢！？ 
唔通個爐嘅火力咁唔平均？當然，靚啲果個就梗係要嚟
送俾人啦，所以就留番淡啲色果個俾自己食啦！

 

        嚟緊禮拜六仲會整多次 o添，呢次就係整俾老表 Lily 佢哋食喇，之前一早都已經講好咗會整俾佢哋 o架啦，不過唔知佢哋鍾唔鍾意呢？上次 Lily 話俾我聽，佢啲同事買過「美心」個班蘭戚風嚟試，佢哋話班蘭味難食到不得了喎！咁我聽到之後第一個反應係：吓，好難食！？

椰香班蘭雪芳蛋糕 Coconut Pandan Chiffon

        禮拜六果日教完琴之後，整咗椰香班蘭雪芳蛋糕，今次係收到 Winnie 媽咪嘅 order 而做嘅，用嚟做 Winnie 嫲嫲嘅生日蛋糕呀！因為上次 Winnie 拎咗我同佢一齊整果個班蘭雪芳蛋糕返屋企俾佢阿爸阿媽試，食過之後好鍾意，於是我就同 Winnie 講，佢哋想食就隨時開聲啦！

        今次呢個班蘭雪芳我加咗椰漿落去整，仲加重班蘭份量㖭，所以今次個蛋糕比起上次嗰個更加香濃，顏色更加靚，而且蛋黃刻意唔拂打得太多，因為我睇過有本書話，如果蛋黃越打到發白，蛋香味就越淡，所以我都想做個實驗試吓。果然真係好香，焗緊果陣都已經聞到好濃嘅蛋香味同班蘭味，到 Winnie 嚟到我屋企時，一入屋，佢就已經話好香喇！佢拎番屋企後，連上次試過後唔係咁鍾意食班蘭蛋糕嘅細佬都讚呀！不過亦可能因為蛋黃無乜打發，所以個蛋糕發得唔係好高，同埋 Winnie 話比較濕喎！

Kenwood 食物處理器

    平時我都好少送禮物俾人 ( 收人禮就多，哈哈！ )，更加唔好講話送禮物俾自己，機會幾乎係零！不過今次就破例買咗份 "大玩具" 俾自己，真係好 "大" o架！話時話，我發覺每次買嚫 "玩具" 俾自己都好鬼大份 o架喎，好似微波焗爐同鋼琴咁，真係超重量級呀！

今次件玩具係部食物處理器，上個禮拜六收到 o架喇！

你睇，係咪真係好大份呢！

 

    呢部食物處理器係 Kenwood FP920，應該係喺香港有得賣嘅型號之中最 top o架喇！之前 Louisa 一早已經買咗，我見佢有好多好好用嘅功能，包括切片、切絲、切條、榨汁，打蛋、搓粉、乾磨、攪肉等等，部機都只係賣 $1488，覺得都唔算貴，合理啦！所以一早已經決定要買 o架喇，因為整起嘢食上嚟真係慳到唔少時間、功夫同 "力水" 呀！原本諗住買部低啲 model o架，一來慳啲錢，二來就係依家呢個 model 其實同我屋企用緊果部攪拌機有好多功能都係重覆咗，但係當我睇過實物之後，發覺原來低啲 model 果幾部唔單只係功能少啲，連容量同摩打馬力都細好多，咁所以最後都係決定買番最 top 呢個 model 囉！而且又諗住依家用緊果部攪拌機始終都會有壞嘅一日，咁到時咪可以改用呢部囉！ 

    我買呢部機其實都幾抵呀，因為我有 Compass VISA，所以可以用「即享錢」去「豐澤」度買嘢當錢駛，原價  $1488，扣咗 $600 多啲「即享錢」，即係只需俾 $888 度就攪掂。而且屋企附近個屋邨商場最近又新開咗間「豐澤」，喺 1月8 號前買嘢滿 $1000，仲可以用張 $50 coupon  o添！

扣埋呢張  coupon 果 $50，係咪真係好抵呢，差唔多半價咁滯！

 

仲有本靚靚食譜跟機 o添！

 

本食譜係法國著名嘅「藍帶廚藝學院」所編寫 o架！

 

裡面嘅食譜都唔錯 o架，Louisa 都係咁話。

 

    唔知部機幾時剪采呢？而頭號處理嘅食物又會係邊樣呢？麵包？甘荀蛋糕？蘿蔔糕？蔥油餅？甜薯批？哈哈，我自己都未知呀！不過整乜都係假，最重要都係自己唔好懶，唔係部機買番嚟就得個擺字！！

    大家拭目以待啦！

外國嘅女高音唱中國嘅藝術歌曲會係點？

        睇吓呢段 video clip 咪知囉！

        我唔知佢本身唱得輕鬆定辛苦，但我就覺得佢唱得好似好辛苦囉！

       

班蘭椰漿

        係東南亞食品中，好多時都會用到椰漿同班蘭葉，而將呢兩樣食材夾埋一齊嚟用，呢個配搭簡直就係 "天作之合"，不論係聞嘅味道定係食嘅味道，都係非常之夾。

        今日我就整定啲班蘭椰漿，方便隨時拎出嚟用，做各式甜品、糕點都唔錯㗎！

送俾 Michelle 嘅新居入伙曲奇

        之前我咪話禮拜一果日由朝到晚都匿喺個廚房度做到無停手嘅，點解我要咁 "犯賤，攞苦嚟辛" 呢？

        原因係因為學生 Michelle 最近搬咗屋，我又唔知買乜俾佢哋做入伙禮物好，如果開口問佢哋想要啲乜，我知道答案係問咗都等於無問，所以都係慳番唔問口問！坦白講，今次佢哋雖然係細屋搬大屋，並無 "唔見一籮榖"，但其實唔係一件值得開心嘅事，所以我就突然間諗到不如送盒自家製嘅朱古力曲奇俾佢哋，等佢哋可以甜一甜，開心吓啦！咁所以我咪要趁禮拜一果日 day- off 得閒，pre-bake 一次個 chocolate lace crisps 囉！有起咩事上嚟，都有番幾日俾我實習嘛！

 

        我專登去烘焙店度買咗個禮盒，包裝得靚靚先送俾 Michelle 一家，希望佢哋鍾意我呢份小小心意啦！

      因為上次試食過，覺得味道好甜，所以今次將糖粉嘅份量減少咗 60 克，撲喺面嘅糖霜都減少埋，今次甜度就啱啱好啦，不過亦因為少咗糖霜嘅關係，所以曲奇面嘅裂紋就無咁出，變相無咁靚囉！

        有興趣整呢個曲奇嘅朋友就 click 上面 chocolate lace crisps 個字啦！ 

女高音王若詩所演譯嘅《踏雪尋梅》

        後生一輩可能唔係好知邊個係王若詩，雖然我都唔係好老，但係我之所以識得呢位歌唱家，係因為媽咪話俾我聽嘅。

        好記得細個果陣，媽咪有一本厚過電話簿嘅歌書 ( 其實我到依家都仲有 keep 住呢本歌書 )，裡面有一首歌叫做《歸來吧》，就係由王若詩所唱嘅，我當時就唔係好知呢首係咩歌，但後來學咗聲樂之後，就知道原來即係國語版嘅經典意大利藝術歌曲 Torna a Sorriento ，亦即係 Come Back to Sorrento，中譯《重歸蘇連托》。

        媽咪仲話過俾我聽，佢後生果陣時，曾經聽過王若詩唱《踏雪尋梅》，佢話當時王氏所演譯嘅方式，同我哋平時聽到嘅好唔同。由於媽咪唔係音樂人，所以佢唔係好識點樣演譯番俾我聽，就算識唱，當時佢都唔係記得好清楚點唱喇，佢淨係形容到俾我聽，當歌詞唱到第四次「響叮噹」時，王氏將最高果粒音重覆唱咗幾次，唱出嚟好似鐘聲咁樣。由於媽咪呢番話，我一直都好好奇，好想知道王若詩係點樣唱呢首歌呢！但因為以前資訊科技未有咁發達，又唔係咁容易搵到錄音，所以一路都 "緣慳一面"！

        直到今日晏晝，喺 YouTube 度搵嘢時，無意中俾我搵到《歸來吧》呢個 video，而且仲係由王若詩唱 o添，咁我梗係第一時間 click 嚟聽啦！聽緊首歌果陣，仲俾我喺 "Related Video" 一欄度見到有《踏雪尋梅》o添呀！嘩，簡直係開心到好似發現寶藏咁呀！！！！ 咁我就梗係即刻 click 嚟聽啦！聽完之後，就完全明白哂媽咪嘅形容喇！原來王氏係 repeat 咁去唱果幾粒高音去模仿「叮噹」鐘聲，之後仲接住唱咗一段 cadenza-like 嘅花腔，真係好新鮮、好好聽喎！依家你哋都聽吓呀：

        今日真係好開心呀，除咗因為卒之都俾我還咗心願，聽到呢位前輩歌唱家咁特別嘅演譯之外，仲俾到我一種好特別嘅感覺，覺得係媽咪陪我一齊上網，專登喺 YouTube 度搵到呢段 recording 出嚟俾我聽番，真係感覺又開心，又 warm！

        媽咪，我卒之都可以分享到妳對呢首歌嘅感覺喇！如果妳依家仲喺我身邊，肯定聽完之後我哋會有好多交流 o添呀！