椰香班蘭雪芳蛋糕 Coconut Pandan Chiffon

        禮拜六果日教完琴之後，整咗椰香班蘭雪芳蛋糕，今次係收到 Winnie 媽咪嘅 order 而做嘅，用嚟做 Winnie 嫲嫲嘅生日蛋糕呀！因為上次 Winnie 拎咗我同佢一齊整果個班蘭雪芳蛋糕返屋企俾佢阿爸阿媽試，食過之後好鍾意，於是我就同 Winnie 講，佢哋想食就隨時開聲啦！

        今次呢個班蘭雪芳我加咗椰漿落去整，仲加重班蘭份量㖭，所以今次個蛋糕比起上次嗰個更加香濃，顏色更加靚，而且蛋黃刻意唔拂打得太多，因為我睇過有本書話，如果蛋黃越打到發白，蛋香味就越淡，所以我都想做個實驗試吓。果然真係好香，焗緊果陣都已經聞到好濃嘅蛋香味同班蘭味，到 Winnie 嚟到我屋企時，一入屋，佢就已經話好香喇！佢拎番屋企後，連上次試過後唔係咁鍾意食班蘭蛋糕嘅細佬都讚呀！不過亦可能因為蛋黃無乜打發，所以個蛋糕發得唔係好高，同埋 Winnie 話比較濕喎！

 

材料：             20 cm 模             17 cm 模 
蛋白                  180 克                  110克
糖                     90 克                    55 克
粟粉                 10克                     5 克
蛋黃                 70 克                    40 克
班蘭椰漿          90 克                    55 克
橄欖油              60 克                   36 克
低筋麵粉          90 克                    55 克

烘焗時間：       45 分鐘                 30 分鐘

- 先將麵粉過篩 3 次。

- 用電動打蛋器以低速將蛋白打至起泡，之後分次加入糖，用高速打至企身後，再
  加入粟粉繼續打至乾性發泡，做成蛋白霜。

 

- 蛋黃用低速略為打起，之後加入班蘭椰漿同油用，用打蛋器低速拌勻。

- 篩入麵粉，以低速拌勻後，改以中速攪拌成麵糊。

- 蛋白霜用膠刮分次拌入麵糊內，以切拌方式拌勻所有材料。

- 將已拌勻嘅麵糊倒入雪芳模內，然後放入已預熱 180 °C 嘅焗爐內焗熟。

 

- 出爐後就立即將蛋糕倒扣放涼，攤凍後脫模。 

 

 

今次脫模都算脫得靚喇，個表面好平滑，不過側邊始終
都係攪到 "碎濕濕" 咁，唔通真係要學 blog 友
A moon 咁徒手脫模先至夠靚！

 

唔知點解，每次用個大模嚟整都總係會有少少凹陷嘅呢！

 

 

比起上次，今次個顏色真係靚好多，不過窿窿比較大。

       

Notes：

- 蛋白霜做好之後，可暫時放入雪櫃內，以保持穩定性。

- 蛋白霜一旦變軟，可以用打蛋器再次打發至企身。

- 橄欖油可用任何液體植物油代替。

- 唔用椰漿的話，可直接用相同份量嘅清水代替。

P.S.  多謝哂  Winnie 幫我影個蛋糕切開後嘅相。