2009年10月8日星期四

白酒忌廉汁煮蜆 (已更改)

        前兩日我老豆拎咗啲蜆返嚟,今日我就試吓用西式方法去煮,睇吓似唔似 Louisa 煮得咁好食先!






材料:

油泡紅椒
蒜茸
新鮮羅勒 ( basil )

汁料:
清雞湯
白酒
淡忌廉


- 先用牙刷將蜆徹底洗刷乾淨。

- 燒熱油,爆香蒜茸及紅椒後,加入白酒,將酒精煮至完全揮發。

- 加入少量清雞湯,煮滾之後就加埋淡忌廉一齊煮。

- 汁料煮滾之後,就可以倒埋蜆落鑊,兜炒幾吓後就冚上鑊蓋,將蜆煮熟。

- 當所有蜆都開哂口之後,就代表已經煮好。

- 最後加入羅勒,快手炒幾吓就攪掂!

 

        ( 原來我又老人癡呆發作,做錯咗我個 friend 教我嘅步驟,所以有興趣煮呢個菜嘅 blog 友要留意番我個 friend loulou 嘅回應呀!)

老豆話啲蜆係個 friend 出深海撈返

 





為咗煮呢個餸,專登走去超市買樽白酒,對於唔飲酒嘅我,
加上我又唔識揀,當然求其買支平平哋算數啦!
呢支白酒賣十零蚊咋!而我盒用剩嘅
忌廉又有機會發揮佢嘅功用啦!

 
 
 
        蜆肉勁鮮甜,好食又唔會韌,但最正反而係啲汁,因為所有蜆肉嘅精華都落哂去,所以啲汁鮮甜無比,夾著輕微酒香加羅勒香味,再加上少少辣味,簡直好味都唔識形容! 所以剩咗嘅汁我已經留番起佢,諗吓要嚟煮咩好先!


Notes
- 因為蜆肉本身已帶有天然海水嘅鹹味,再加上清雞湯亦已經夠味,所以完全唔駛
  落鹽。


- 羅勒記得最後先,而且唔好煮太耐,否則香味好易煮到無哂。


P.S.  
有無留意到我盒 cream 用保鮮紙封住盒頂呢?呢個方法係 blog 友幸福蠍教我嘅,咁樣就可以保存得耐啲。我呢盒cream 已經開咗超過個禮拜啦,到依家都仲用得,無變壞到。不過我講啲更恐怖嘅嘢俾大家聽,我學生話俾我聽,佢暑假時開嚟用果盒 cream,到依家都仲擺喺雪櫃度,佢話 check 過無變壞喎!( 係咪真,有少少驚喎! )


5 則留言:

  1. 你都唔聽書,我係叫你爆吓D蒜茸,再落蜆炒一陣先落白酒,最後就落CREAM呀,你真係它人痴呆又發作啦!
    [版主回覆10/09/2009 22:24:00]        吓,我又記錯 steps?真係想死!!!  不過唔緊要啦,因為都好好食,連我老豆見到都即刻拎部手機出 嚟影低張相俾佢個農場 friend 睇呀!

    回覆刪除
  2. 喂,我啱啱介紹咗個烏冬比A-MOON呀,你話比佢聽有幾好食啦!
    [版主回覆10/09/2009 22:25:00]        好,等我 send 我果篇 blog 俾佢睇啦!

    回覆刪除
  3. 正呀!!!!!下次煮意粉可以咁整
    [版主回覆10/09/2009 22:27:00]        係喎,應該都幾好味!記得用番 啲 汁 嚟煮意粉呀,真係好鮮甜 o架!         不過妳要記得跟番我個 friend (留下個位 )講果個步驟整喎!

    回覆刪除
  4. 下次用煙肉代替蒜頭,比D耐性爆香D煙肉,再落蜆,就連油同鹽都唔洗比啦,重好食呀 !
    [版主回覆10/10/2009 01:20:00]        都好喎!不過都唔知仲有冇機會我老豆 攞 啲蜆返 嚟,街市賣果 啲唔敢食。    

    回覆刪除
  5. 一睇就知好味!!!!我好想食!!!
    [版主回覆10/10/2009 01:39:00]        係呀,真係好好食,連一向唔鍾意食西式 嘢 嘅 老豆都讚好食,食過不停呢!以妳咁叻 嘅廚藝,一定難唔到妳啦!快 啲試 吓整啦!

    回覆刪除