2011年5月16日星期一

綠茶豆腐布甸 Matcha Tofu Pudding

        上次去 Louisa 度開 party 時,明仔整咗個綠茶豆腐布甸,真係好食到震,連高手 Louisa 食完都即刻話要 recipe,可想而之係幾咁好食呢!呢個布甸不但只好食,仲勁容易整 o添,真係連細路仔整都絕無難度,做啱就係親子一齊做。一向對綠茶都有偏好嘅我當然要整番次慢慢歎啦!



材料:
豆腐                  200 克
綠茶粉              8 克
水                      250 毫升
淡忌廉              100 克
糖                      50 克
魚膠粉              8 克
日式紅豆餡      適量


- 將豆腐同綠茶粉放入碗內,用打蛋器混合拌勻,備用。


- 水同糖放入煲內,加熱至糖完全溶解。


- 之後將魚膠粉逐少加入,攪拌至完全溶解後,將淡忌廉倒入糖水內,拌勻。


- 當淡忌廉同糖水混合好之後就可以熄火,然後將佢撞入綠茶豆腐蓉度。


- 用打蛋器將所有材料徹底拌勻成布甸液,之後過篩兩次。


- 將布甸液倒入容器內,放入雪櫃雪至凝固即可。


- 食時可加紅豆餡拌食。



飯後同老竇一人一碗,好滿足呀!


 



吓個布甸幾幼滑!


Notes
- 鍾意的話,可用牛奶代替水;魚膠片代替魚膠粉。


- 我用嘅豆腐係豆腐檔賣嘅腍豆腐,因為個人覺得腍豆腐比盒裝豆腐香濃好多。


- 綠茶粉用量可依個人口味增減。


- 若紅豆餡係自家製作並存於冰格的話,解凍後可先加小量水開稀至適合濃稠度。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


11 則留言:

  1. 豆腐綠茶都唔係我杯茶
    [版主回覆05/16/2011 16:27:00]        好多人都唔鍾意綠茶,但我就好 buy,而且綠茶同豆腐都好有益,多吃無妨。

    回覆刪除
  2. 又好似幾正咁喎!啱晒呢個天時食!
    [版主回覆05/17/2011 00:01:00]        係呀,清爽、清新、清甜兼清涼!

    回覆刪除
  3. 可可貓的活板門2011年5月16日 下午9:30

    我都有綠茶粉, 可以try
    [版主回覆05/17/2011 00:02:00]         try la, try la!!

    回覆刪除
  4. 如果唔用魚膠粉或片,可以用咩野代替呢?
    日本個D寒天或者印尼店既"燕菜"唔知得唔得?
    [版主回覆05/21/2011 23:06:00]        我 諗妳梗係素食者喇!         如果唔用魚膠的話,妳可以用大菜或蒟蒻代替囉!不過質地會有些少唔同。魚膠係較軟身,大菜較爽口,而蒟蒻就比較煙韌。不過最近我個 friend 話俾我知,原來有素食魚膠呢樣 嘢,妳可以留意 吓。         至於寒天同燕菜,其實都係大菜 嘅一種,一樣由藻類提煉出來。

    回覆刪除
  5. 講到咁好食…又手痕!
    [版主回覆05/21/2011 23:01:00]        真係好好食 o架,個個食過都讚!今日我俾我表妹食,佢食第一啖就即刻讚喇!         你快 啲郁手 整啦!

    回覆刪除
  6. 嘩,你好犀利呀!咁都比你估到!
    一半半素食啦,真係好想試下整...
    [版主回覆05/22/2011 01:37:00]        嘻嬉,妳睇得我個 blog 少喇,我成日都會煮齋 o架!所以好清楚知道魚膠係唔可以食!         如果妳整好就記得同我分享一 吓個布甸質地呀!

    回覆刪除
  7. 請問你食譜嘅份量整到幾多杯架?
    [版主回覆06/05/2011 10:39:00]         Aiya, I can't tell you accurately. Besides these 2 bowls, the pudding was also made for 1 small square jelly cup & 1 pudding glass bottle.

    回覆刪除
  8. 你好, 想問下綠茶粉係邊度買呀? 你用咩牌子呢? 如果我無發蛋器, 就咁用 spoon 壓碎及搞拌豆腐和綠茶粉, 得唔得呢? 謝謝你^^
    [版主回覆06/15/2011 17:15:00]        綠茶粉好多地方都可以買到 o架,日式超市有得賣,妳亦可以去烘焙店買。不過,妳要留意價錢及產地,日本產綠茶粉會比較貴,但顏色會深綠 啲,台灣都有出產,價錢相對較平,顏色較淡,但味道都不錯呀!最高級 嘅綠茶粉應該係宇治品種。         用匙羹其實都無問題,不過妳要好有心機兼耐性囉!不過到最後一定要過篩喇,我自己用打蛋器整,過篩時都隔到好多渣,咁所以如果淨係用匙羹整的話,情況應該會更甚。但係如果妳唔介意布甸唔夠幼滑的話,其實可以唔駛過篩 嘅,食落口會粗 嚡 啲囉!

    回覆刪除
  9. Hihi~ 謝謝你的詳細回覆^^ 昨晚我已經首次試做了綠茶豆腐布甸啦, 都幾好味! 第一次做都算係咁, 但仍有不足之處! (我初入廚, 連煮餸都未學好, 就學做這個布甸啦! 之前我連普通布甸都未做過!)  因找不到台灣綠茶粉, 所以我在Jusco買了這款京都宇治 綠茶粉 (大圖的第2包~ 好似叫伊右衛門), 打開包裝已經聞到很香濃的茶味! 由於家中無磅, 我買了2磚街巿腍豆腐, 大概一公斤! 所以, 我便把你的材料份量全部x5倍 (但唔知係咪所有材料都適合這樣x5倍), 故部分材料份量也加減了! 最後做了9個砵仔糕size+2個飯碗布甸!  材料份量如下, 請你給點意見, 尤其魚膠粉及綠茶粉份量如何調節呢? Thanks!  因我無發蛋器, 但我有超級耐性和心機 , 把豆腐先切碎, 再用spoon壓到勁碎, 最後 還用湯殼協助, 一邊 過 篩, 一邊 磨細d豆腐碎, 還把布甸汁過篩 3次! 所以布甸 質感很細滑, 也好吃! 只可惜魚膠粉太多, 令布甸太硬, 而綠茶粉又下得不夠, 真敗筆): 豆腐2磚 綠茶粉50克 水 1300ml 淡忌廉 400克 糖 100克 (唔敢x5倍咁多, 怕太甜) 魚膠粉 50克 北海道紅豆
    [版主回覆06/19/2011 16:27:00]        Hi Linda, 好高興見到妳咁認真去整呢個布甸, 喺用具唔齊備 嘅情況 下仍然咁有耐性堅持做到最好,我對妳認真 嘅態度非常敬佩!能夠食到妳親手整呢個布甸 嘅人,絕對係佢 嘅福氣,非常幸福呀!         討論番個成品,妳講 嗰隻綠茶粉係咪純綠菜粉成分,絕無溝入其他材料呢?因為如果將綠茶粉用量乘大 5 倍都只係 40 克,但妳已經用多 10 克,理應好濃綠茶味,所以我想綠茶味唔夠應該係綠茶粉的問題,可能呢隻味道比較清淡,妳不妨去「 二德惠 」度買綠茶粉,我用 嗰隻台灣綠茶粉就係 喺 嗰度買 o架。         至於成品比較硬,除 咗因為妳落多 咗魚膠粉之外,淡忌廉 嘅用量妳都減少 咗, 喺液體材料減少下又增多魚膠粉用量,所以就變得硬好多!         其實每次要將原食譜份量增多的話,只要將所有材料用量跟比例同樣乘大相同倍數即可,所以糖 嘅份量同樣乘 5 都唔會有問題,因為其他材料都同樣增加嘛!而且綠茶粉係帶有少少苦澀味,糖 嘅用量太少的話未必會好食哦!         以上只係小弟小小愚見,妳唔駛一定要跟住咁做 o架!最重要係累積自己 嘅經驗,綜合成一個附合自己口味 嘅食譜。         希望妳能夠堅持自己 嘅認真 ,將來妳 嘅廚藝 一定會大有進步! P.S.  如果第一次試整 嘅食物, 我自己 習慣會先做少少份量作試驗,起碼失敗時都唔會浪費食材、時間、金錢同心機嘛!所以妳可以考慮買少少豆腐或將用剩 嘅豆腐用 嚟煮 餸,萬一失敗都唔會 嘥料嘛 (我係一個孤寒財主,哈哈! )。

    回覆刪除
  10. 綠茶粉: http://www.tsujiri-net.jp/enjoy/time.html
    [版主回覆06/19/2011 16:33:00]        之前綠茶粉條 link 俾 咗 妳,應該係呢條: http://www.twinsco.com/GenCategory.php?cat_id=42         另外我用 嘅 日本綠茶粉係呢隻: http://hk.myblog.yahoo.com/kestrelkwan/article?mid=3886

    回覆刪除
  11. Hi Kestrel,  謝謝你的讚賞 ^^ (我好比心機,用左3個幾鐘去做呢個布甸架!)  但我更敬佩你對廚藝的熱誠! 初時唔知, 後來看看下你的blog才知你係男仔, 仲識煮咁多好味野, 真係犀利! 你的家人和朋友都好幸福,可以日日食到好味野!! 咁我又唔知我隻綠茶粉有無混埋其他成分喎,因我唔識看日文! 至於你隻二德惠綠茶粉, 係咪買"茉莉綠茶"個隻? 因我上它的website, 只看到茉莉綠茶粉及梅子綠茶粉...我明天或會出荃灣分店買, 不久的將來要做一次成功的綠茶豆腐布甸! 我會按照你的意見, 跟住你做一樣的份量先,累積經驗, 符合口味才再做多d!
    [版主回覆06/28/2011 02:41:00]        因為近排比較忙,要咁遲先覆到妳,真係唔好意思!         咁睇 嚟妳為 咗呢個布甸真係花 咗唔少心血用精神喎,真係值得嘉許!         其實幾乎行行 嘅勁人都係男性,尤其係大廚,好似無得幾個係女性,所以我呢 啲小人物真係唔見得人架!         至於妳講 嗰兩隻綠茶粉,只係用 嚟沖茶飲,同埋我懷疑只係屬於中國青茶一類,並唔係日本綠茶。我用開 嗰隻係呢隻呀: http://www.twinsco.com/GenProduct.php?pdtcode=441012         希望唔好因為我遲覆妳而累妳買錯啦!         繼續努力,加油呀!!憑住毅力,妳一定可以做到做好味 嘅綠茶布甸 o架!

    回覆刪除