2011年8月7日星期日

軟心朱古力 (咖啡味) Bonbons au chocolat moulés (Coffee Flavor)

    之前講過,上次整完咖啡味朱古力磚之後,要等到秋天先可以再整,因為依家天氣勁熱,朱古力喺雪櫃拎出嚟無幾耐已經開始溶,切好後好難定形。但原來都可以繼續整喎,只要將佢做成倒模朱古力軟心內餡,咁咪得囉!





朱古力軟心


材料:
朱古力   50 克
淡忌廉   40 毫升
麥芽糖   5 克
即溶咖啡粉   1 湯匙
咖啡酒   1/2 湯匙

- 將淡忌廉、咖啡粉同麥芽糖倒入煲內加熱。


- 當咖啡粉同麥芽糖完全溶解並與淡忌廉拌勻後,倒入朱古力內。


- 攪拌至朱古力完全溶化及與忌廉混合好後,拌入咖啡酒,即成朱古力軟心。



朱古力外殼


材料:
調溫朱古力   100


- 先將 2/3 份朱古力座熱水溶化至 45 - 50°C


- 加入剩餘1/3 份朱古力,攪拌至溶化,待溫度降至 28 - 29°C。


- 再次將朱古力漿加熱至 32°C 左右,完成朱古力調溫。



組合


- 朱古力漿倒入模內,填滿整個模後翻轉,將多餘朱古力漿倒出。


- 用抹刀刮去朱古力模表面多餘嘅朱古力漿,將模反轉放喺牛油紙上,靜置 5 分鐘


- 當朱古力漿凝固後,將朱古力軟心放入唧袋,再將之唧入模內約九成滿。


- 將模枱面輕敲,釋出朱古力軟心內多餘空氣,之後再用抹刀略為刮平。


- 放入雪櫃內雪約 5 分鐘至軟心表面凝固後,將外殼朱古力漿倒入,填平無個模格。


- 用抹刀刮去朱古力模表面多餘嘅朱古力漿。


- 放入雪櫃內雪約 30 分鐘至空全凝固後即可脫模。


以上材料份量可做朱古力 12 粒。






Louisa 專登喺佢公司拎個全新朱古力模借俾我用,佢話呢個比利時模好貴,
因為唔係用塑膠造,係用動物骨膠做成,所以非常容易脫模,
而且成品仲會比較 "令" 身 o添!



 





靚模即係靚模,一反轉就已經自動甩哂出嚟,完全不費吹灰之力!
雖然成品外觀有少少瑕癖,但第一次整已經成功,算係咁喇!



 





見到個軟心咁濕潤就知道天氣有幾熱啦,睇番第一幅相,
朱古力表面凝結哂水珠 o架!


 


Notes
- 若用微波爐加熱朱古力的話,最好以每次 10 秒時間將佢溶化,以免燒焦。


- 咖啡粉及咖啡酒用量可依個人口味增減。

- 若要測試朱古力是否成功調溫,可用刀尖蘸少少朱古力漿,之後放入雪櫃內,若
  果能夠在幾分鐘內凝固,兼且表面有光澤,即代表調溫成功。


    你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


4 則留言:

  1. 嘩!!!~ 好靚啊!!!~
    [版主回覆08/09/2011 17:55:00]        多謝讚賞呀!

    回覆刪除
  2. 咁 easy....我又要試整至得, thank for sharing!!!!
    [版主回覆08/09/2011 17:56:00]         咁整好之後記得掟相上 blog 公諸同好呀!

    回覆刪除
  3. 真係熱到古力都溶???
    [版主回覆08/09/2011 18:01:00]         係真 o架,無呃妳!整 嗰 日原來成 35 °C 呀!我見 啲 朱古力表面佈滿水氣,咁咪就咁放 喺 枱面 "攤熱",回室溫兼無水氣先放入盒保存啦,點知,到我準備放番入盒時,用筷子輕輕一夾,個外殼軟哂,仲有少少穿 o添呀!!!  妳話呀,真係熱到人都癲呀!

    回覆刪除
  4. 真係會癲架, 我只可以接受26C左右, 再熱D就真係要食人,哈哈.  我希望暑假快点完. D人以為我儍架.
    [版主回覆08/10/2011 19:43:00]        所以我最鍾意就係秋天囉!比較清涼,又唔太凍;爽得 嚟又唔會太乾, 舒服好多!

    回覆刪除