2014年8月7日星期四

班蘭咖吔椰檳 Pandan Kaya Coconut Loaf

        成日都話最怕就係食港式 牙印包,尤其係雞尾包,真係避之則吉!本身個餡味道已經唔多討好,包質仲軟身到不得了,一啖咬落去時,個牙印深到呢 …… 都唔知落咗幾多油去整!!但都有例外呀,有兩款港式包我都幾鍾意食,就係菠蘿包同椰檳,因為不單只食落香口,最重要係佢哋包質都係比較乾身,咬完都見唔到牙印!
 
       早前 Ernest 媽咪送咗樽喺大馬帶返嘅班蘭咖吔俾我,其實我都好耐無食過吔呢樣嘢,因為好細個時媽咪都曾經買過嚟搽麵包食,嗰陣時我覺得好難食,唔知係因為細個唔識食呀,定係嗰隻所謂 名牌整得唔好食喇,總之就係印象麻麻啦!但係呢次嘅班蘭咖吔令我改觀,無咗當年我食到嗰種怪味之外,仲多咗一份班蘭嘅清香㖭!今日就用佢整番個椰檳俾Ernest 媽咪做回禮。
 


湯種

材料:
高筋麵粉      16
水                 80 毫升

- 將麵粉同水倒入細煲內,用中慢火邊加熱、邊攪拌直至達 65 ℃ 並變得稠身。

- 熄火後攤凍,待用。


主麵糰

材料:
高筋麵粉      234
全麥麵粉
      50
                 5
                 30
即用酵母
      5
椰漿
             40
                35 毫升

班蘭咖     適量
椰絲             適量

- 所有材料連湯種混合攪拌,逐少加水搓成麵糰。

- 搓揉摔打成光滑麵糰後滾圓,放入已灑粉嘅兜內,用保鮮紙封好,發酵約 45 分鐘。

- 麵糰排氣後再次滾圓,靜置鬆弛 15 分鐘。

- 壓平麵糰,用擀麵棍擀薄成長橢圓形,然後均勻塗上吔並灑上椰絲。

- 由上而下小心捲起麵糰,捏緊收口,頭尾兩端亦需收口。

- 將麵糰放入多士模內,之後用利刀喺麵糰正中央割開,深度約為麵糰高度嘅一半

最後發酵至多士模 9 分滿,放入已預熱至 180 嘅焗爐內,焗約 25 分鐘。

- 出爐後立即脫模,於架上攤凍。
 
以上材料份量可做 450 麵包 1


咖吔加埋椰絲,整緊時都已經聞到好香。





呢個係早前試整時造型,你哋覺得邊個造型靚啲呢?


6 則留言:

  1. 隔住電腦都好似好香咁:P 我中意你送禮嗰個多啲~~

    回覆刪除
    回覆
    1. 嘩,如果科技先進到電腦都可以有埋香味,咁妳肯定要伸手過嚟拎件食至得喇,哈哈!

      嗰個做形比較似傳統椰檳款式。

      刪除
  2. "牙印包"形容得很好呀,我都係最怕呢D包,好似焗唔熟咁,黏住哂。
    大馬DKaya 係好好味咖,您講那名牌是否楊XX呀,我覺得唔好味兼好C甜呀。

    回覆刪除
    回覆
    1. 係呀,我都覺得呢個名真係形容得好貼切!啱啱今日都同 Ernest 爹啲講開港式包,佢形容得仲犀利,話嚿包喺個口度趙極都唔爛,仲會無端端黐咗上個上顎度,整極都整唔番落嚟,真係繪形繪聲㖭呀!

      哈,小月,妳真聰明!!論甜度,呢隻班蘭咖吔都唔弱㗎!

      刪除
  3. 椰檳我最鍾意食,材料已經有,只是等機會。

    回覆刪除
    回覆
    1. 快啲整啦,妳會好滿足㗎!

      刪除