原味蒸蛋糕

        今日 Louise 因為公司突然間有雜誌要做訪問，要開 OT，所以嚟唔到上堂，而 Lily 就因為要陪佢媽咪去覆診，要晏晝先嚟上堂，咁朝早突然變得咁得閒，於是又手痕整嘢食。

        見好耐都無蒸蛋糕，於是就決定蒸個原味蛋糕，貪佢易做又快手，簡簡單單，快快趣趣整好之後就可以同 Lily 上堂。

麻辣臘腸炆蘿蔔

        前幾日 Gordon 話俾我聽佢有個 friend 送咗幾條麻辣臘腸俾佢，係佢個朋友專登係四川成都帶返嚟嘅，咁佢就話俾一條我試吓好唔好食。原本當地人多數都係蒸或者烚嚟食，但咁啱老豆之前喺農場度拎咗個白蘿蔔返嚟，於是我就諗到用嚟煮蘿蔔，一來蘿蔔雖然清甜，但始終唔係濃味嘅食材，用佢嚟配麻辣食材應該幾夾；二來，白蘿蔔夠 "涼"，可以中和番麻辣嘅 "熱"，一舉兩得，yeah ~~！

材料：
白蘿蔔
麻辣臘腸
薑片

調味料：
雞粉
生抽
糖
紹酒
麻油

- 臘腸徹底洗乾淨表面鹽份，然後切片，備用。

- 蘿蔔刨皮、略沖洗，之後用滾刀切件。

- 燒熱油，爆香薑片，落埋臘腸一切爆香，灒酒。

- 加入蘿蔔一齊炒一陣，加水，冚鑊蓋，用慢火炆至蘿蔔腍身。

- 最後灑上麻油，兜兩兜，熄火上碟。

        嘩，啲麻辣臘腸好勁呀，麻到我有少少 "wing wing" 哋！！ 可能係我不嬲都唔係好受得麻啦！反而辣就唔緊要。不過我老豆同 Gordon 就話唔夠麻囉 ，真係想死！！！

        其實個味道都唔錯呀，辣度啱啱好，好惹味，而且呢隻麻辣臘腸係種煙熏臘腸，所以仲有種煙熏嘅香味 o添！另外，有樣嘢對我嚟講，我係幾 buy o架，就係臘腸本身都幾瘦，幾乎完全無肥肉呀！

Notes：
- 炆蘿蔔時要留意水份，如果炆到乾水蘿蔔都未夠腍的話，就要酌量加水。

- 相反，如果蘿蔔已經煮腍但亦有多餘水份，可校大火收乾水或用粟粉水埋薄芡。

- 可用一般臘腸或膶腸代替麻辣臘腸。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

小紅莓英式烤餅 Dried Cranberry Scone

        自從上次整過 scone 後，一直都再無整啦，適逢啱啱整好柚子芒果醬，又卒之買到固體菜油返嚟 ( 之前「二記」斷哂貨呀，我老豆話可能好多人買嚟代替豬油整中式賀年糕點 )，咁就無藉口偷懶唔整啦！

柚子芒果醬 Pomelo Mango Jam

        早前 Louisa 整咗啲果醬送俾朋友，包括士多啤梨果醬同柚子芒果醬，不過我兩隻果醬都無試呀，因為當期時我自己都啱啱整咗士多啤梨果醬，而 Louisa 就話俾我聽隻柚子芒果醬好評如潮，連 Winnie 食過都讚好，所以我就叫佢教我整喇。

       其實都唔難整，反而要買到柚子皮同柚子汁比較難，好彩 Louisa 早前 "割愛" 將佢用剩咗嘅少量柚子皮同柚子汁俾咗我，咁我就有機會學整喇！咁啱上星期「惠康」啲芒果又勁減，3 個都只係賣 $5 咋，雖然完全未熟兼仲好青，不過我都照買，因為真係好平，擺到一個禮拜後嘅今日，已經完全熟透，可以開工啦！

韓式炒年糕

        上次整冬瓜肉粒湯年糕時，因為做緊特價嘅關係，一次過買咗兩包韓國年糕，用咗一包之後，另一包就一直擺喺雪櫃，一於今晚就清埋佢！

        上次煮過湯年糕，咁今次就整炒年糕啦！

 

材料：
脢頭瘦肉
紹菜
冬菇
洋蔥
韓國年糕

醃料：
生抽
鹽
糖
水
油
粟粉

調味料：
韓國辣椒醬
魚露
糖
紹酒
麻油

為咗煮呢碟炒年糕而專登走去買嘅韓國辣椒醬。

- 紹菜洗乾淨後切絲；冬菇浸軟後切絲；瘦肉醃好，備用。

- 燒熱油，先爆香洋蔥，再加入紹菜炒熟，之後盛起。

- 冬菇同肉片落鑊略炒，灒酒後炒熟，盛起待用。

- 再燒熱油，年糕落鑊炒幾吓，加少少水，冚上鑊蓋煮至軟身。

- 之後加入調味料，並將之前炒過嘅材料全部回鑊，最後灑上麻油，兜勻後就可
  以上碟。

食完辣嘅炒年糕，飲番碗滋潤嘅蛋白杏仁茶就唔駛怕熱氣啦！

Notes：
- 紹菜可用娃娃菜代替，或用自己鍾意嘅蔬菜配搭。

- 若水份太多，可用粟粉水埋薄芡。

- 辣醬用量可因應個人口味而定。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

蛋白杏仁茶

        上次餐開年飯整 Crème brûlée 時，因為只用蛋黃，所以留起咗啲蛋白放喺冰格，為咗佢，我今晚專登整呢個蛋白杏仁茶 o架，咁就可以一次過用哂啲隻白，唔駛煩。

材料：
南杏      150 克
北杏      60 克
水          1000 毫升
奶          60 毫升
糖          80 克
蛋白      3 隻

以上材料份量可做杏仁茶約 5 碗。

食譜參考自鄭慧芳、胡玉玲編著嘅《香港人氣甜品》。

- 杏仁略沖洗後用清水浸 1 個鐘；蛋白輕輕拂勻，備用。

- 杏仁瀝乾水份後，放入攪拌機內，加入一半水，攪打成幼滑杏仁漿。

- 之後再加埋剩低果一半水再打，然後將杏仁漿隔渣。

- 杏仁漿倒入煲內，用中慢火煲滾，其間要不時攪拌。

- 加入糖同奶，再次煮番滾之後就可以熄火，將煲離火。

- 隨即將蛋白加入，慢慢拌至稠身即可。

 

Notes：
- 當杏仁茶煲滾時，會有大量泡沫湧出，要小心滾瀉。

- 蛋白加入杏仁茶後要立即拌勻，以防蛋白受熱而凝固成塊狀，失去滑溜口感。

- 唔鍾意太甜的話，可以將糖份略減，跟足食譜份量做比較甜。

La Cucina di Kestrel

        最近我喺 Facebook 個 Fans Page 度開舖呀，小店名字叫做 La Cucina di Kestrel，一方面方便果啲無 Yahoo account 嘅朋友同我一齊分享煮食心得同樂趣，另一方面又可以當做我呢個 blog 嘅 backup，真係一舉兩得呀！

        你哋都快啲加入做我個 fans 啦！

反沙芋頭

        早前喺書局見到有本新出嘅食譜叫做《香港人氣甜品》，打開嚟睇咗一陣，發覺裡面啲食品好多都好吸引，而且其中一位著者係「煤氣烹飪中心」嘅導師，佢寫嘅食譜應該有一定保証，加上當時正做緊 85 折，所以就買咗佢喇。

        今晚就首先試吓整潮汕好出名嘅小食：反沙芋頭，貪佢材料夠簡單，但係整就幾講技巧同功力呀，所以都係玩玩吓 o架咋。嚟緊應該都會跟呢本書學整好幾樣嘢，因為裡面啲食譜真係幾吸引呀！

材料：
芋頭      約半個
糖         120 克
水          50 毫升

以上材料份量約可做到 12 條 6cm X 2cm 芋條。

食譜係嚟自鄭慧芳同胡玉玲編著嘅《香港人氣甜品》。

 

- 芋頭去皮，洗乾淨後切成條狀，之後放油鑊內炸 6 - 8 分鐘至表面微微金黃色。

- 另燒熱 1 茶匙油，加入水及糖，用慢火煮 6 - 8 分鐘，其間邊煮邊攪至濃糖膠
  起泡。

- 將炸好嘅芋頭放入糖膠內，跟住即刻熄火，快手不斷兜炒約 3 - 4 分鐘。

- 當糖膠炒到變成白色砂糖碎時，之後就可以上碟。

我用焗爐個「健康油炸食物」功能嚟炸芋頭，效果都幾好呀！

 

反完沙之後，變番咁多砂糖出嚟，突然間覺得 "有賺" 呀，哈哈！

 

Notes：
- 處理芋頭時可先戴上手套防止手痕。

- 將糖膠滴落凍水度，如果能夠即時凝固變硬，即代表糖膠已經煮好。

- 炒糖膠時要盡量快手兜炒，將空氣炒入先可以做到反沙效果。

- 整好之後盡快食用，因芋頭餘溫會將砂糖再次溶解。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

豆豉鯪魚炒油麥菜

        相信唔少人都會食過豆豉鯪魚炒油麥菜，喺酒樓食飯都應該有得叫。

        我第一次食呢個餸，係好細個果陣啦，應該係讀中學時啩，咁耐真係唔記得啦！果陣時係媽咪煮嘅。平時間唔中都會食吓炒油麥菜，雖然少食罐頭，但豆豉鯪魚都有食嘅，不過將兩樣嘢擺埋一齊炒，當時真係覺得好怪，唔係好接受到。點知到食果陣又覺得幾 OK 喎，仲幾好食 o添！

        今晚想重溫一次呢個味道，而且見材料同煮法都唔係太覆雜，所以試吓自己煮，不過就未必會煮到媽咪咁好食囉！

材料：
油麥菜
豆豉鯪魚
蒜茸
薑片

調味料：
雞粉
紹酒
糖

- 油麥菜洗乾淨後摘到適當長度；將鯪魚肉切碎，備用。

- 將豆豉鯪魚連適量油放落鑊爆香，灒酒，兜炒一陣就盛起魚肉同豆豉，油留鑊
  內。

- 加入薑片、蒜茸爆香，放入菜炒幾下，加少量水，冚鑊蓋煮至微微軟身。

- 將豆豉鯪魚回鑊，落調味，炒勻即可上碟。

Notes：
- 雞粉唔駛落太多，因為豆豉鯪魚本身都已經有味，否則過鹹。

- 油麥菜唔好煮得太腍，保持爽脆先好食。

燒汁茄子素鴨

        今日係正月十五元宵佳節，你哋有咩節目呢？我自己就照舊教琴，放工後返到屋企就即刻要準備夜晚餐飯喇！因為係十五嘅關係，所以今晚我就煮咗一碟簡單嘅齋菜，唔駛太多功夫，但味道都唔錯呀！