2011年8月16日星期二

四川擔擔麵

        之前六月阿茂聚會時,Louisa 屋企食過 Rachel嘅四川擔擔麵,味道確係唔錯,惹味之餘又有風味,今晚一於參考佢個食譜,自己加小小變化,睇吓效果會係點。



拌麵醬


材料:
薑蓉          1 湯匙
蒜蓉          1 湯匙
乾蔥茸      1 湯匙
生抽          1 湯匙
鎮江醋      2 湯匙
芝麻醬      4 湯匙
糖              4 茶匙
清雞湯      4 湯匙
紅椒油      1 湯匙
麻油          1
湯匙
花椒粉      1 湯匙
花椒油      1 湯匙


- 將所有材料拌勻即成為拌麵醬。



拌麵料


材料:
白麵條
免治豬肉
油浸辣椒乾
蝦米
炒香芝麻
炒香花生碎
蔥花


醃料:


生抽
紹酒


- 豬肉用醃料醃好;辣椒乾切碎;蝦米洗乾淨,用清水浸至軟身,瀝乾水備用。


- 燒熱油,爆香辣椒乾、蝦米,灒酒,之後加埋豬肉一齊炒熟,盛起。


- 煲滾水,放麵條入內煮熟,盛入碗內。


- 將辣椒乾、蝦米同免治豬肉放於麵條上,再淋上拌麵醬。


- 之後灑上芝麻、花生碎及蔥花,拌勻即可享用。



我就係用呢隻北京接麵嚟整 o架喇!呢隻北京拉麵一直都係媽咪嘅心水選擇,
皆因麵條非常爽口彈牙,質感幼滑,最重要係唔怕煮過火,都能
保持爽口,所以「壽桃牌」咁多種白麵條之中,
呢隻係賣最貴。


 



左邊嗰樽紅椒油係 Louisa 整俾我嘅;而右邊嗰樽就係花椒油,
Winnie 自己整時順便整多樽俾我,真係要多謝佢兩個,
咁我就慳番唔少功夫喇!


 



味道調得啱好,唔會太鹹或太甜,美中不足嘅係唔夠麻辣!


 


Notes
- 唔太食得麻辣口味的話,紅椒油、辣椒乾、花椒油同花椒粉應減少份量。


- 若想拌麵醬汁較濃稠的話,可減少清雞湯用量。


- 可參考日式芝麻醬做法步驟 1 - 4 自製芝麻醬。


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


8 則留言:

  1. 好似唔多夠醬汁咁噃...多啲咪仲好味!
    [版主回覆08/16/2011 23:56:00]        影相嘛,梗係唔可以多到睇唔到麵條啦,咁樣張相唔靚仔 o架! 啲醬汁剩 咗成樽呀!

    回覆刪除
  2. 超勁辣先0岩口味
    [版主回覆08/16/2011 23:54:00]        係啦,唔夠麻辣唔好食,唔夠過癮!

    回覆刪除
  3. 咁多材料...要準備晒都幾難
    [版主回覆08/16/2011 23:54:00]        嗯,但係全部都係好普通材料咋喎!

    回覆刪除
  4. 我偷起個食譜先.  放湯落去得吾得呢????
    [版主回覆08/17/2011 18:10:00]        妳隨便偷啦,我份人好大方 o架,任偷唔嬲!!         我之前都覺得好怪,點解擔擔麵會係撈麵而唔係湯麵,睇完李純恩個旅遊節目就知道,原來正宗 嘅四川擔擔麵係拌麵,湯麵係港式做法,所 以悉隨專便。不過如果妳想放湯的話,我建議妳都係減油好少少,如果唔係成碗湯都係油都似!

    回覆刪除
  5. 多謝分享食譜呀!等我可以偷師.
    [版主回覆08/17/2011 18:11:00]        咁又唔好咁講,我都係偷人師咋!

    回覆刪除
  6. 賣相睇都唔夠辣噃, 嗜辣者真係到喉唔到肺
    出面的擔擔麵係米多D 醬架 ? 加左麻醬係米叫炸醬麵呀??  我唔識分哩 !!
    [版主回覆08/19/2011 12:38:00]        查實係辣椒油唔夠辣、花椒油唔夠麻!下次再整要勁加辣椒囉!         我整 咗好多醬 o架,但係無理由淋到成碗都係醬汁 嚟影相 o架,到時我驚連麵條都睇唔到呀!         炸醬麵?我真係唔知喎!查實依家四川菜、上海菜、北京菜都撈到唔知邊樣打邊樣,都唔知點先叫做正宗!

    回覆刪除
  7. 擔擔麵好味呀 ,  由其現在天氣熱我最鍾意食添 , " 正 " 現在很多食肆都專登做改良擔擔麵 , 變到唔湯唔水 , 唔多好食 , 我都跟妳整這款 , 謝謝分享 !
    [版主回覆08/19/2011 12:33:00]        唔駛客氣!         咁妳整完試過味道就話俾我聽味道如何啦,因為個拌麵醬只係依我自己口味調校,未必個個鍾意。

    回覆刪除
  8. 我試過壽桃牌既揚春麵...但好難食...之後就無買佢其他既貨啦..
    但係如果買麵粉店個D,又好快"淋"晒WOR...點解究好呢...
    [版主回覆08/22/2011 03:34:00]        好難食?點難食法?妳試 吓呢隻北京拉麵啦,同其他出品唔同 o架,我都食過壽桃牌奶油麵同上海麵,一樣好易煮腍,但北京拉麵就 唔會。

    回覆刪除