2014年4月7日星期一

泡菜薯仔煮鯖魚

       呢個韓國菜式又係 Maangchi 姨學嘅,原本佢係一個 camping stew,所以用咗罐頭魚柳同汁嚟煮,但係我又唔係去路營,又唔知邊度會有佢講嗰兩款罐頭賣,所以我就用上急凍鯖魚柳加清雞湯嚟煮,仲正呀!
 
        因為係 for camping 嘅關係,所以做法唔會太複雜,原本做法真係好簡單,一鑊熟攪掂,但係自己喺廚房煮的話,可以做好少少,咁多樣材料都用唔同時間去煮熟、煮腍,一鑊熟的話,肯定有啲會煮過龍或煮得太腍,所以我自己就改咗少少做法及處理步驟。
 

材料:
急凍鯖魚柳
薯仔
洋蔥
青辣椒
蒜蓉
泡菜
清雞湯
 
醃料:

胡椒粉

調味料:


韓國辣椒醬
泡菜汁

- 魚柳解凍後略沖洗,用抹手紙索乾水份後用醃料醃好。

- 薯仔、洋蔥去皮後切件,將少部份切成細粒。

- 辣椒洗淨去蒂、切粗片;泡菜切細,備用。

- 將薯仔、洋蔥同蒜蓉放入鑊內,加入辣椒醬同泡菜汁,將所有材料拌勻。

- 倒入清雞湯及適量水,攪拌均勻後煮至水滾,然後轉中慢火繼續煮。

- 當薯仔煮到八、九成腍身時,加入辣椒、泡菜同魚柳,煮至全熟。

- 最後加入適量鹽、糖調味即成。
 
食譜出自 Maangchi Kimchi & Mackerel Camping Stew

 
 
 
正想試煮呢個餸時,咁啱聽到超市賣廣告,急凍挪威鯖魚柳
做特價,$15 pack,即刻走去買咗包,估唔到急凍貨色
食落都有啲鮮味喎,早知買多兩包打入冷宮啦!
 




開飯喇!味道超正,既香辣,又有少少泡菜酸味,
最正當然係薯仔啦,又腍又入哂味呀,
真係飯都食多碗!
 
 
 
 
 


Notes
-
將部份薯仔同洋蔥切成細粒,比較快煮熟及溶入汁料內,令汁料變得更香甜更濃稠。


- 想自己醃泡菜的話,可參考《自家醃製韓式泡菜》&《偷懶版泡菜》。
  

13 則留言:

  1. 如果香港無鯖魚罐頭,可以用沙甸魚, 味道都差不多。你step by steps 的做法仲好, 我唔鍾意一鑊熟的。

    回覆刪除
    回覆
    1. 依家物價咁鬼貴,我懷疑買罐沙甸魚仲貴過呢 pack 急凍魚柳!

      係囉,我都唔多鍾意一鑊熟。

      刪除
  2. 我屋企成日都有鯖魚做後備架~~不過無試過哩種煮法,通常都係用鹽加檸檬汁或照燒汁~~

    回覆刪除
    回覆
    1. 我好耐之前食過一次鯖魚就嚇怕咗唔敢再買,因為超油膩!呢次都係因為個透明包裝見到魚肉唔太肥美,再加上減價先俾多次機會佢咋,但呢次感覺好好多哦!

      刪除
  3. 鯖魚唔駛煎下先咩 ? 我通常就咁煎香黎食, D鯖魚好似有鹽醃過, 你覺得係唔係? 有時懷疑有無加埋防腐劑 ?
    係呢..... 你覺唔覺得你的回應/回覆改用了謍光黃色字體好刺眼, 令人要好費神去看? *.*

    回覆刪除
    回覆
    1. 我無煎呀,最怕就係煎魚!

      妳意思係急凍前用鹽醃過?

      嗯,我無改用螢光黃色字體哦,一直都係用呢隻橙黃色喎!?

      刪除
    2. 係, 你覺唔覺魚在急凍前用鹽醃過?
      我看你的回應看得都幾辛苦呢 ! 字體太淺色了 ! (*﹏*) "

      刪除
    3. 會唔會係原本海水鹹味呢?

      唔覺喎,無論係白底抑或係粉藍底,橙黃色字體都好明顯睇到,會唔會妳個 monitor 可以調校一下對比度呢?

      刪除
    4. 芹菜我讚同你講,我都睇得好辛苦呢?

      刪除
  4. OMG!!!!!!!!!!!!
    Kimchi again.......mouth watering!!!!!!!!!!!

    回覆刪除
    回覆
    1. 工餘後搵番少少時間整呢個韓國菜啦,妳一定鍾意食!

      刪除
  5. 不知為何在家整鯖魚都好腥,做過幾次就無心機整,調味胡椒粉都有用,雪水也清洗好用紙抹好???

    回覆刪除
    回覆
    1. 係咪解凍得唔夠呀?我習慣前一晚已經放落下格解凍,到第二日夜晚先煮!

      加薑汁酒醃,睇睇有無改善。

      刪除