字母香蕉小蛋糕 Alphabet Banana Mini Cake

        早前喺 blog 友幸福蠍個 blog 度見到佢整咗啲好得意嘅字母小蛋糕，我一見到就好鍾意，好想整，但係無理由自己食都攪咁多 "花臣" o架！所以就不斷係度諗，究竟有無啲咩機會係可以整嚟送禮呢？點知就係一個月前 ( 真係無多無少，啱啱好一個月前 o架！)，我個學生 Ryan 就榮升咗做哥哥呀，哈，呢個就係最好嘅送禮機會喇！

        坦白講，男仔之家，真係唔咪好知送咩俾 BB 好，佢又未識食嘢同玩玩具，買衫嗎？我又覺得好浪費，小朋友好快大，特別係 BB仔，轉個頭又話唔啱著喇，所以都好煩惱。其實原本諗住嗌 Winnie 出嚟陪我去買禮物嘅，不過突然間諗起幸福蠍個字母小蛋糕，覺得呢份禮物仲有意義，於是就扑鎚做呢個小蛋糕啦！

        到咗一個月後嘅今日，就係妹妹 Rylie 滿月之喜嘅大日子，咁我今日就專登向老人中心請咗一堂假，朝早留番喺屋企做呢款字母蛋糕，傍晚去教 Ryan 時就送俾佢妹妹。當然，Rylie佢梗係仲未識得食蛋糕啦，但係小小心意，都可以留俾佢做一個好好嘅紀念同回憶嘛，right？希望 Ryan 一家唔介意我呢份一啲都唔貴重嘅禮物啦！

估唔估到我寫呢幾個字母有咩意思呢？估唔到！？
睇吓下面 ……

 

咪係 "Healthy Baby" 囉！

 

        「健康」呢兩個字對 Rylie 嚟講係好重要 o架！因為 Rylie 先天性有小毛病，依家已經要經常返醫院做檢查，我都好戥佢辛苦呀，所以好希望佢做完手術之後可以完全無哂事啦！

之前喺 Jusco $10 店度見到有個禮物盒好靚，於是就買咗返嚟先，
點知原來可以好 fit 咁裝哂呢 9 個蛋糕仔，真係整定要嚟做今次嘅
禮物盒！

 

加張 Winnie the Pooh 小賀卡，咁已經係一份簡單而又美觀嘅禮物。

 

衷心祝福 Rylie「身體健康，快樂成長！」

 

去到 Ryan 屋企，佢話要同個蛋糕影張相喎！ 

 

同 Ryan 及 Rylie 影張合照先！你睇，Rylie 同哥哥幾似樣，餅印一
樣呀，哈哈！！

 

估唔到送完禮出去，會有回禮收番喎！就係呢碗咁好味嘅豬腳薑喇！

 

整完 9 個小蛋糕之後，梗係仲有好多麵糊剩啦！所以就整咗個蛋糕俾
Lily 一家。

自己咁辛苦整完，又要企幾粒鐘，開住爐又熱，當然要留番一細
嚿蛋糕慰勞吓自己啦，嘻嘻！

 

        今次呢個字母香蕉小蛋糕嘅食譜及做法係嚟自為食貓嘅香蕉蛋糕；而創作意念就出自 blog 友幸福蠍嘅字母小蛋糕。

煎釀魚肉辣椒

        煎釀三寶相信應該無人未聽過，亦無人未食過啦，不過自己整都係第一次咋！所以雖然普通、簡單、易做，我都想喺度同大家分享一吓，話哂都係第一次嘛！

材料：
青椒
鯪魚肉

調味料：
鹽
糖
生抽
胡椒粉

芡汁料：
蒜茸豆豉醬
糖
油爆紅辣椒
粟粉

又係老豆喺朋友個農場度拎返嚟嘅辣椒，好新鮮、好靚呀！唔怪得
之啲有機蔬果賣咁貴啦，真係唔同啲 o架！

 

- 參考「鯪魚肉處理方法」去調味。

- 辣椒洗淨切半，去蒂、去籽。

- 將魚肉釀入辣椒上。

- 燒熱油，先將釀咗魚肉嘅一面煎香煎熟，之後翻面煎熟即成。

- 用較剪煎碎紅椒，將芡汁料 ( 粟粉除外) 落鑊爆香，加入少少水，之後用粟粉埋
  薄芡，之後將芡汁淋上魚肉青椒上面，完成。

        真係好簡單，又好食，難過咁多街頭小食店鋪都必定會有煎釀三寶！

Notes：
- 如果想鯪魚肉可以黐實啲嚿辣椒，可以先喺辣椒上面撲上好薄嘅粟粉，然後先將
  魚肉釀入，咁就包保一定唔會甩番出嚟。

鯪魚肉處理方法

        細個果陣時，一直都以為魚檔買嘅鯪魚肉係已經調好哂味，買返屋企就可以即刻煎嚟食，但原來媽咪話俾我聽，其實自己係要再調吓味先至好食啲 o架！所以到依家要自己煮飯時，我都一直秉承住呢個 "傳統"，其實所謂調味，都只係錦上添花啫！所以所有調味料份量都只係用好少。

調味料：
鹽
糖
生抽
胡椒粉
粟粉 ( 視情況而加入 )

- 將鹽、糖、生抽同胡椒粉一次過加入鯪魚肉度。

- 攪勻所有魚肉同調味料。

- 如果發覺攪極都係鬆散，黐唔番埋一嚿時，可加些少粟粉，真係好少就夠喇，之
  後再攪拌就一定無事。

- 將魚肉拎起撻番落碗度，撻得幾次就更加起膠、更有彈性。( 唔駛好大力 o架，
  我自己用筷子夾起，普通力度撻番落碗度都有好明顯效果。 )

- 之後醃約 30 分鐘度就可以攞嚟用喇！

合桃乾果裸麥包 ( 再 encore 篇 )

        係，無錯，我又再整多次呢個合桃乾果裸麥包，因為實在好食，所以噚日朝早比較得閒就再 encore 囉！

        不過今次做法同上次有啲唔同。首先，上次整果陣時，啲乾果同合桃係包喺麵糰入面做餡，但今次就加埋落麵糰度一齊搓，所以食落啖啖有料！ 

        其次係焗嘅時間都有改變。上次因為係第一次整，所以唔係好識掌握入爐時間，原食譜個時間係焗一個大包，但我就做成數個細 size 嘅包仔，所以原本應該係要調整一下焗嘅時間，但我驚焗唔熟，所以跟食譜時間照焗，最後出嚟嘅包包表面有少少似 baguette 咁脆硬。但今次就焗少咗 10 分鐘，出到嚟效果非常之好，唔會硬，又唔會太軟，啱啱好，成功！

        最後就係喺個包面上面 "界" 咗花，靚仔好多呢！

一份黑椒腸仔炒蛋、一個裸麥包加一杯咖啡，就係我噚日豐富嘅
lunch 喇！

        
        我之後仲帶咗一個過去俾 Louisa 食，因為噚日佢成堂都好專心咁做 passpaper，加上又有其他嘢掛心，所以佢唔記得咗食，到夜晚食完飯之後佢先醒起，不過佢都照樣有 "空位" 食得落喎！佢食第一啖已經話，新鮮整起即食真係寧捨唔同食法，所以我知道今次個包包應該係比上次好食啲。

        好，諗吓下次整乜包包先！

P.S.  嗱，明仔，唔好又話我隻 "吉" 杯裡面無嘢喇，今次真係有咖啡喺裡面 o架！

媽咪的禮物

        之前都講過，今年係媽咪大壽之年，雖然佢依家已經離開咗我哋，但係佢仍然收到禮物呀！

        呢份禮物係阿珊送俾契媽嘅，其實阿珊係唔知道我媽咪幾時生日，不過咁 "橋" 佢送到，我就同佢講話當係生日禮物啦！

話明係生日禮物，咁就梗係要放番喺媽咪面前啦！

    
        阿珊見到我將佢送嘅禮物放咗喺契媽面前，佢話佢好開心呀！其實呢份禮物係一隻 CD，係佛曲「三寶歌」嘅 CD。雖然唔係一份好貴重嘅禮物，但就睇得出阿珊嘅心思、心意！阿珊，我代契媽向妳講聲多謝！

而我自己就買咗一束米色康乃馨同親手整咗個
紅豆蒸蛋糕送俾媽咪。

        除咗我會送花之外，Winnie 都會送花，因為佢今日會陪我一齊去探媽咪嘛，佢仲話會買埋壽包 o添！

高纖雜菜燕麥粥

        今晚煲呢個粥相當健康、有益、又好食，而且仲好高纖維呀！不但用咗幾種蔬菜，仲落埋燕麥片落去煲 o添，所以真係夠哂健康。

材料：
番茄
罐頭忌廉粟米
紅蘿蔔
免治豬肉
珍珠米
燕麥片

醃料：
鹽
糖
生抽
粟粉
油

調味料：
鹽
雞粉

星期一果日 Louisa 送咗兩個荷蘭牛茄俾我，咁啱今日又要用，
咁我就唔駛買喇！。

- 洗乾淨米，用水浸約一個鐘。

- 紅蘿蔔刨皮後切粒；豬肉用調味料醃好。

- 水煲滾後落米，用中火煲約 10 分鐘。

- 之後加入紅蘿蔔，煲番滾之後轉中細火煲多 15分鐘，之後放入真空煲內。

- 幾個鐘後將內鍋拎出，用中大火煲番滾後，加入燕麥片同免治豬肉，拌勻。

- 番茄洗乾淨，去蒂、切粒，加埋落粥度一齊煲。

- 煲至適合嘅濃稠度後，就加入少量鹽同雞粉調味，拌勻後熄火，食得！

Notes：
- 煲粥時切記唔好將煲蓋冚實，要留有小小虛位，否則一定煲瀉。

- 間唔中就要攪一攪佢，以妨黐底。

- 番茄要放到最後先落，因為煲太耐就會腍哂，甚至會煲到溶哂。

- 加入麥片後，如發覺粥變得太稠時，可適當地加水。

紅豆蒸蛋糕 Red Bean Steam Cake

        好耐都無食過蒸蛋糕喇！近排突然好想食，而且聽日我又要帶個蛋糕去探媽咪，所以今日就蒸番次蛋糕。今次試下加入紅豆餡嚟蒸蛋糕，睇吓好唔好食先！

        呢個紅豆蒸蛋糕可以話係集幾家大成呀！點解咁講？首先，紅豆餡係出自櫻井老師手筆；蒸蛋糕材料及做法就跟陳鳳美個食譜；打蛋方法就用咗餅后 Vanlily 個海綿蛋糕做法，如果咁都唔掂，我真係要檢討吓喇！

材料：
雞蛋              6隻 (約300克)
低筋麵粉      315克
泡打粉          4克
糖                  90克
鹽                  3克
橄欖油          45毫升
水                  50毫升
紅豆餡          500克

食譜材料份量係參考自陳鳳美嘅《黑糖糕蒸蛋糕》。

今次整呢個蛋糕係首次用呢隻無鋁泡打粉。

 

- 先將麵粉同泡打粉過篩 3 次。

- 雞蛋加糖，座 43°C 溫水打起：

- 先用高速打 1分鐘，然後將攪拌盆傾斜，打 2 – 3 分鐘至九成企身。

- 將盆放番平，用中速打多 1分鐘度，邊打蛋邊轉盆，打至十成企身。

- 分 3 次加入麵粉，用膠刮以切拌方式拌勻。

- 橄欖油、水及紅豆餡拌勻後，加入少量麵糊拌勻。

- 將混合物倒回麵糊中，輕手拌勻。

- 將紅豆麵糊倒入模內，用中火隔水蒸約 45 分鐘至熟透即成。

你哋睇，蛋糕裡面有好多紅豆哩！Yummy Yummy！！

        由於呢個食譜麵粉用量頗多，比雞蛋還要多哩！所以蛋糕個 texture 比較實淨，加埋紅豆落去，個感覺好似食緊用粘米粉蒸嘅中式紅豆糕咁。唔知有無 blog 友知道點樣整到非常鬆軟嘅蒸蛋糕呢？如果可以整到好似「山崎」果隻咁鬆軟就好喇！

        另外，參考咗櫻井老師另一個紅豆蛋糕食譜而減少用糖量，出嚟個效果相當唔錯，甜度啱啱好，唔會太過甜，又保留番適度嘅紅豆香甜，抵讚！

Notes:
- 將麵粉拌入蛋糊時要盡量輕手及快手，以免消泡。

- 若想蛋糕口感更加滑，可用奶代替水。

- 因為紅豆餡已經夠甜，所以糖可以用好少已足夠。

- 以上材料份量係自行調整過，若根據陳鳳美嘅原食譜材料份量，可做出 8 吋長
  形蛋糕一個，其材料份量如下：

  雞蛋              240克
  低筋麵粉      250克
  泡打粉          3克
  二砂糖          200克
  鹽                  2克
  橄欖油          35毫升
  淡奶              40毫升

 

泰式青咖喱雜菜

        之前Louisa 去煤氣烹飪中心跟 Rachel 學煮青咖喱，Rachel 預先準備好自製青咖喱醬分派俾每位學員，因為佢唔見我去上堂，所以落堂後同 Louisa 講，佢可以分部份咖喱醬俾我試試，當然，Louisa 一早都有咁諗啦，所以我都分到小量青咖喱醬呀！真係好開心呀，佢哋兩個都咁有我心，所以喺呢度我都要同 Rachel 及 Louisa 講多次多謝！

        原本 Rachel 係教用青咖喱醬煮雞嘅，不過噚日我就用咗嚟煮雜菜，一樣咁好味！梗係啦，呢個菜式嘅靈魂青咖喱醬都唔係我整，係由 Rachel 整 o架噃，幾差嘅食材都可以大變身啦！所以好食絕對唔係因為我煮得好囉！

材料：
椰菜
豆角
豆腐卜
泰國圓茄
泰國小茄
檸檬葉
金不換

調味料：
椰漿
清雞湯
魚露
糖

經典泰國菜食材：金不換、泰國小茄、泰國圓茄同檸檬葉。

- 椰菜洗淨切件；豆角洗淨切段；豆腐卜沖水後對切一半；圓茄洗乾淨，切開 4
  瓣。

- 金不換、小茄及檸檬葉洗淨備用。

- 燒熱油鑊，爆香青咖喱醬及檸檬葉，然後倒入椰漿同清雞湯，煮5分鐘。

- 加入圓茄及小茄子，冚上鑊蓋煮至半熟。

- 加入豆角同豆腐卜，加小量水，冚鑊蓋煮腍。

- 將椰菜加入，灑上魚露及糖，兜炒一陣，椰菜軟身便可。

- 最後加埋金不換，兜炒幾吓就即刻熄火，上碟。

        一碟又香又惹味嘅雜菜，簡直係將平凡嘅蔬菜都變得好吸引，唔鍾意食菜嘅朋友，相信都會讚不絕口！當然，都要接受得到這種重香料嘅東南亞口味呢！

Notes:
- 糖嘅份量可以落多少少，因為本身味道都已經好夠鹹味。

- 金不換一定要最後先好落，落咗之後就唔好再煮太耐，因為煮得太耐會無哂香
  味。

日式紅豆餡 Azuki Bean Filling

        紅豆餡或紅豆沙都係我一直想整好耐嘅嘢，所以都已經放咗喺個 To Do List 裡面好耐喇！但因為人懶，成日都唔想郁手整，但噚日卒之的起心肝郁手整喇，因為今日我要用到呢個餡去整嘢嘛！

花生木瓜煲魚尾

        點解老豆個 friend 個農場種咁多嘢嘅，唔通果度好大！？今次又拎咗個青木瓜返嚟喇！青木瓜當然就梗係最好要嚟煲湯啦！所以今日我就買咗條魚尾返嚟煲木瓜湯。

材料：
青木瓜
魚尾
花生
薑片

- 木瓜去皮、去籽，然後切件；花生用熱水浸一陣，之後就可以好易咁去衣。

- 魚尾刮淨鱗，洗乾淨備用。

- 燒熱油，放薑片，將魚尾放入鑊內煎至兩面金黃色。

- 木瓜同花生先凍水落煲，之後將佢煲滾；煲滾後，就放埋煎好嘅魚尾落去一齊
  煲。

- 先用大火煲 3 - 5 分鐘，之後就轉細中火繼續煲多 10 分鐘。 

- 放入真空煲內慢慢煲，約煲 3 - 4個鐘後，就再次明火煲多 15 - 20 分鐘。

- 落鹽調味就有得飲。

      

        啖湯非常之清甜，唔知係因為個木瓜嘅貢獻定係魚尾呢？

 

P.S.  平時切開個木瓜時，啲核一定多到跌哂出嚟，但唔知點解，今次個木瓜裡面係無核嘅呢！？