2010年2月18日星期四

瑤柱蘿蔔糕

        我相信都無乜人會唔鍾意食蘿蔔糕,除非佢真係勁唔鍾意食蘿蔔或煮糕點啦!媽咪每逢過年都必定會整,不過佢會刻意整得 "削" 啲,因為我哋都鍾意食蒸蘿蔔糕呀!

        不過,呢幾年當然再無得食啦!前一年
Winnie 特登叫佢媽咪整多一底俾我,咁我都可以 "止吓咳"!上一年,我就 "老奉" 咁等佢底糕啦,點知佢媽咪無整到喎,咁我就不但無得止咳,仲 "咳到甩肺" 呀!!哈哈,講笑啫,我份人無咁賤。都係個句,想食咩?咪自己整囉,所以今年我就買定哂啲蘿蔔喺屋企,等今日得閒就開工整,順便幫我部 food processor 剪采!



 
材料:
白蘿蔔      約三斤
(1800 克)
粘米粉      十二兩 (450 克)
粟粉          四兩 (150 克)
臘腸          約三兩 (113 克 )
蝦米          約一兩 (37.5 克)
冬菇          半兩 (19 克)
瑤柱          3 粒
乾蔥頭      2 粒
蔥花          少許
白芝麻      少許

調味料:
水              1 杯至杯半 (250 - 375 毫升)
生抽          1 湯匙
鹽              1/2 茶匙
糖              1 茶匙
雞粉          1 湯匙
胡椒粉       適量
紹酒

- 臘腸同瑤柱略沖洗,瑤柱放碗內、加水,連同臘腸一齊蒸至軟身;蝦米略沖洗,
  用暖水浸軟;之後將臘腸同蝦米切粒,瑤柱撕碎。

- 冬菇處理好之後切粒;乾蔥頭去衣、切碎;蘿蔔去皮後刨粗絲。

- 粘米粉同粟粉混合好;白芝麻洗乾淨,用白鑊炒香,攤凍備用。

- 燒熱油,先爆香一半乾蔥茸,將臘腸、蝦米、冬菇同瑤柱落鑊一齊爆香,灒酒,
  炒多幾,盛起備用。

- 爆香埋剩低嘅乾蔥茸,加入蘿蔔絲兜炒,之後落調味料 (紹酒除外) 及已爆香
  臘腸、蝦米、冬菇、瑤柱同蔥花
,然後將水份略為煮乾。

- 將火校至最細,篩入粉類,與所有材料拌勻,用慢火邊煮邊攪拌,將材料煮至八
  成熟。

- 將蘿蔔粉漿倒入已搽油嘅蒸盤內,用中大火蒸約 30 分鐘至熟。

- 趁熱灑上預先留起少量嘅臘腸、蝦米、冬菇、瑤柱同蔥花,再灑上芝麻即成。
 
以上材料份量可做 8 吋蘿蔔糕 2 底。
      


早前屋企裝修執屋時,我搵到媽咪之前 keep 起咗幾本
《方太與你》雙周刊,其中兩本係新年特刊,
專教整賀年應節食品,咁見到裡面
蘿蔔糕喎,咁咪試吓跟佢整囉!






真係唔好講笑,搵到果幾本《方太與你》真係古董
簡直可以送去博物館珍藏,你哋睇
吓方太個樣
咁後生就知啦!我仲
搵到本創刊號呀,犀利!
 
 
 
 
 
 
睇個樣都似模似樣,不過內裡質感同味道,就要等到初七
"人日" 果日先知喇,到時再同大家分享成果啦!





Notes:
- 浸蝦米水、蒸瑤柱水及蘿蔔水可留用,代替調味料內的水份使用,會令蘿蔔糕更
  加好味。


- 將蘿蔔刨成粗絲,成品會更有蘿蔔味及𡁻頭。

- 炒蘿蔔絲時可用番之前爆香臘腸、蝦米料剩低嘅油份。

- 煮蘿蔔粉漿時,若水份唔夠的話,可額外加入適量清水。

- 蒸糕時需留意水量,若水份蒸乾的話,要酌量加入熱水。

- 蒸好嘅蘿蔔糕要放入雪櫃雪一日至硬身,之後先可以切件煎香。
 
 

6 則留言:

  1. 見到都勁想食!!! 我好鐘意食羅白糕的
    哈哈, 祝你虎年快樂! 新一年新開始!
    [版主回覆02/19/2010 23:31:00]        咁妳自己有冇整到蘿蔔糕呀?         祝妳新年快樂,身體健康,心想事成!

    回覆刪除
  2. 嘩,你本方太係12年前架啦! 你重KEEP住,勁呀!
    [版主回覆02/20/2010 17:50:00]        唔係我 keep 住呀,係媽咪 keep 住 啫,我 諗佢係想隨時睇番 啲賀年食譜呢!不過依家反而到我有用囉!

    回覆刪除
  3. 原來可以將D粉煮到八成熟架 ! 幾好喎, 唔駛我蒸一盆都蒸成個鐘咁耐。
    [版主回覆02/22/2010 14:43:00]        係呀,方太 喺食譜裡面都刻意講明專登將蘿蔔粉漿煮熟 啲,咁就可以縮短蒸糕 嘅時間。

    回覆刪除
  4. 我都有keep住好多'方太與你'係屋企,得閒攞番出黎睇下先.
    [版主回覆02/22/2010 14:45:00]        係呀,得閒拎返出 嚟睇 吓,可以俾到自己煮食靈感外,仲可以搵到好多依家已經好少有人整 嘅菜式。

    回覆刪除
  5. 感謝食譜!會照住黎整!

    回覆刪除
    回覆
    1. 唔使客氣!妳整好的話再話我知是否成功及味道如何啦! ^^

      刪除