我只可以隔岸觀火，好無奈！！ : (

        點解最近幾個好朋友都咁唔開心，見到你哋唔開心，身為朋友嘅我，我都幫唔到你哋啲乜嘢，個心都好唔舒服！！

        可能你哋會話，唔好為咗你哋而攪到自己唔開心，但係我份人就係咁，真係好多嘢都放唔低。媽咪以前都鬧過我，佢見到我為咗頭家攪到自己好辛苦，佢話我做乜樣樣嘢都要攬哂上身！！

        記得當年喺媽咪最辛苦、最痛苦嘅一段時間，我其實真係無乜嘢可以幫到佢，只有喺佢身邊陪住佢，睇住佢捱苦，乜都做唔到。仲記得媽咪有次同我講，叫我幫吓佢，等佢唔駛咁痛，但我話俾佢聽，我無專業知識，我唔敢亂嚟，佢就同我講咗一句：「我依家咁辛苦，你哋都幫唔到我，我好無奈！」我聽完之後，真係好心痛、好難過，我依家諗番起都好傷心，眼淚直流！果種痛法，未經歷過嘅人係完全唔會明白，完全唔會感受得到！當你睇住自己最錫、最緊嘅人喺度捱痛、受苦，但自己就一少少都幫唔到，心裡面真係好難受，我寧願辛苦果個係我！

        喺六道輪迴中，當然做番 "人" 就係最好啦！但係其實佛家係主張了脫生死，跳出六道輪迴先至係真正唔駛再受苦，亦即係 "耶穌教" 所謂嘅 "得永生"！做人淨係有七情六慾呢一樣就已經夠你受，尤其係我呢類咁感性、咁有藝術家脾氣嘅人，真係一生人都唔知要死幾多次！！

        好友們，你哋要堅強面對，雖然我真係幫唔到你哋，但心裡面係默默咁支持你哋，撐你哋，希望你哋快啲走出黑暗，重見曙光！我會永遠撐你哋 o架！