2010年5月1日星期六

家鄉蒸蛋糕

        今日好開心呀,居然咁好陽光,真係諗都無諗過,同噚日簡直係兩個世界!所以教完老人中心,返到商場買完嘢之後即行飛返屋企,洗咗兩機衫。呢幾日暫時都唔會落雨,仲間中有陽光,所以嚟緊會趁好天洗多 3 機衫,洗清全屋所有污糟衫褲同傢俬布,我真係好怕要洗啲又大又厚嘅傢俬布時遇著落雨,掛喺室內真係都唔知要掛幾耐先乾透,煩死!!

        洗好哂、晾好哂所有嘢之後,抖咗一陣,check 完 e-mail 之後就開始整蛋糕喇!蛋糕係整定嚟星期日帶去探阿爺、阿嫲同表舅父嘅,今個禮拜日再唔去的話,就無車上山喇,到時要搭的士上去,肉痛死喇!

        點解我會叫呢個蛋糕做家鄉蒸蛋糕呢,係因為除我同 Lily 呢兩大家族之外,好似咁耐都未見過有其他人會咁樣整,多數蒸蛋糕嘅方法都會好似焗海綿蛋糕咁將雞蛋打至發白,而呢個蒸蛋糕就唔會咁做,而且係唔會落油嘅,一來健康啲,二來整完之後清洗用具都方便好多,好快手攪掂。再者,材料非常簡單,又唔駛用爐焗,啱哂果啲屋企無焗爐,又無電動打蛋器,但又想自己整蛋糕嘅朋友。

        呢個家鄉蒸蛋糕可以話係我踏上整蛋糕之路嘅 "啟蒙老師",第一個整嘅蛋糕就係佢喇!當時因為未有焗爐,所以多數都係蒸蛋糕,而且我個家族裡面,個個親戚唔知點解都好鍾意食,就連全場最細嘅添添都好鍾意食呀!我當年就係因為好恨食先至會叫伯娘教我整咋!



哋睇吓個蛋糕蒸得幾脹卜卜,連個方形紙模都被個蛋糕
撐到變哂形呀,呵呵!



材料:
雞蛋            
4 隻
糖                80 克
中筋麵粉     170 克
吉士粉         30 克
泡打粉         1
茶匙

- 先將所有粉類過篩 3 次;雞蛋用打蛋器拂打至有少少泡即可。

- 加糖入蛋液內,座溫水拂打至糖完全溶解。

- 將粉類逐次篩入,用打蛋器拌勻至見唔到粉粒為至。

- 麵糊倒入模內,用中大火隔水蒸熟即可。


Notes:
- 蛋液加入糖之後,一定要座熱水拂打,否則糖就好難完全溶解,蒸出
嘅蛋糕就會
  變成兩層,因為唔溶
嘅糖會沉低。我自己就習慣一開始整時已經用最細火煲住鑊水
  ,當加糖後就可以將攪拌兜放上蒸架上拂打,由於之前只係用最細火
嘅關係,所以
  唔使
驚會過熱而令蛋液凝固。

- 由於雞蛋無打起至發白嘅關係,所以會好稠身,好難同麵粉拌勻,所以要繼續用打
  蛋器做攪拌工作,一手不斷慢慢轉動斜放 45 ° 打蛋器,另一手就不斷咁慢轉攪拌
  兜,咁樣麵粉就好容易同蛋液混合好。

- 無中筋麵粉的話,可以用一半高筋麵粉溝一半低筋麵粉做成中筋麵粉。

- 加吉士粉只係為咗令蛋糕顏色靚啲同味道香啲,所以如果無吉士粉的話,可跟原食
  譜用足  200 克麵粉。

- 用唔同形狀、唔同大細嘅模嚟蒸蛋糕,所需時間都唔同。只要將竹簽插入蛋糕,
 
番出
嚟之後無任何嘢黐住竹簽即代表已經蒸熟。如果你屋企有個大模可以裝起哂全
  部麵糊一次過蒸的話,咁時間就大約係 30 分鐘。

 




























5 則留言:

  1. Hi~Kestrel,我第一次到這裡 我現在跟你整這個家鄉蒸蛋糕,用了半份份量(驚自己唔成功) 而家等待收成。我還將2個放入焗爐焗..ha~試吓是怎樣的 Thz
    [版主回覆05/03/2010 22:26:00]        咁妳個蛋糕成唔成功呀?好食嗎?焗果個又得唔得呢?

    回覆刪除
  2. 我家鄉又係成日整呢個蒸蛋糕架.....由細食到大呀! 八啩吓先.....你邊樹家鄉架?
    [版主回覆05/03/2010 19:21:00]        我媽咪係新會人呀,唔通妳又係?

    回覆刪除
  3. 整佐咁耐蛋糕都未試過用蒸添...但真係幾多糖喎, 會唔會好甜
    [版主回覆05/03/2010 22:30:00]        可能我自己比較食得甜啦,唔覺好甜喎!我表舅母整 嘅份量係 300 克糖 o添呀!其實因為粉多,所以糖都要多 啲。

    回覆刪除
  4. 好近呀...四邑之內...估吓喇!
    [版主回覆05/04/2010 01:36:00]        台山?         呢個應該係四邑蒸糕!

    回覆刪除
  5. 緊張大師-小女人2012年9月2日 上午9:56

    跟你整真係好好,講解得咁清楚,謝謝你Kestrel
    [版主回覆10/01/2012 03:16:17]咁妳好好向妳先生學習啦!
    [緊張大師-小女人回覆09/23/2012 08:11:01]我由小工榮升了小廚啦,,好好啦.但都係老公一出手整係好食,昨晚焗雞我只吃了二隻雞腳好少幾絲,但味十分可口,又入味,我吃了好多蔥花卷,昨天老公整完一次吃光再整多盤....超好吃過我整.
    [版主回覆09/21/2012 23:49:30]咁妳依家肯定飄飄然啦!
    [緊張大師-小女人回覆09/20/2012 15:35:39]嘻嘻,乜你咁架,幸好那時我話比佢知我識煮...但佢話唔好食喎.....咁咪以後都係佢煮比我食,現在我煮得唔錯,佢日日都讚我有一手架
    [版主回覆09/19/2012 23:10:42]如果我係妳老公,我知妳唔識煮飯,我根本唔會同妳結婚!!
    咁咪證明妳係大小姐,唔駛入廚囉!
    [緊張大師-小女人回覆09/19/2012 19:49:54]事實我係一個白痴,老公因我不懂煮飯已炒了我不用我煮十幾年,係呢年我不用上班那才由我再度煮,但現在煮得好過以前,他都有讚我呀,其實我老公也是不懂弄飯的,唔知點解佢天份高....煮到好好食喎
    [版主回覆09/17/2012 23:47:23]因為個蛋糕比較嚡、比較乾,但最重要係超甜!!其實我已經都食得幾甜㗎喇!
    點會呀,咪又係咁整,我都係入廚得嗰幾年咁多,五隻手指數得哂,有得幾好喎!我諗妳係對自己要求高啫!
    [緊張大師-小女人回覆09/04/2012 18:13:54]咦,我看到好靚喎,你都覺得唔好呀,咁我只好等你另一食譜啦,我現在慢慢睇你的蛋糕制作,你可以整到不同的款式但我水準仲未成熟,唔知等到幾時才可以做到一個似樣的蛋糕呢???
    [版主回覆09/02/2012 19:48:59]嘩嘩嘩,妳用 "受惠不少" 呢個字眼,小弟真係唔敢當呀!!!
    至於蜂蜜蛋糕,我咁耐都係整過長崎蛋糕 (http://blog.yahoo.com/kestrelblog/articles/67503) 咋,不過我覺得呢個食譜麻麻,遲啲會再試另一個食譜,到時再同妳分享啦!
    [緊張大師-小女人回覆09/02/2012 16:06:53]睇到你的條理同步驟啦.....亦都受惠不少,但我好奇怪早前我睇到你整蜂蜜蛋糕,你仲話無用木盒都一樣整得咁好,點知我搵了三日都搵唔番那篇蛋糕在那???我一定無記錯係在你這睇到的.....真係死火啦,可以懵到咁
    [版主回覆09/02/2012 13:57:13]駛乜咁客氣呀,我都係希望同大家分享咋嘛!
    我份人做嘢都係好有步驟同條理,寫 blog 都一樣。

    回覆刪除