意大利香草麵包 Foccacia

        有無發覺近排我成日都整麵包呢！自從買咗部 food processor 返嚟之後，發覺用佢嚟搓麵糰真係可以慳番唔少力，之後自己再用手搓多陣就攪掂，非常方便，所以咪成日都整包包囉！部 food processor 已經化身成一部麵包機喇！

        記得以前媽咪好鍾意食「Délifrance」嘅香草包，對於應慳則慳嘅媽咪嚟講，就算之前買成 $7 件 ( 已經好耐無買過，唔知依家賣幾錢 )，佢都會簡唔中買返嚟一齊食，見佢咁鍾意食，我當然都好識做，有機會行經「Délifrance」我都會帶件 "手信" 返屋企送俾佢。

        當時我對麵包無乜認識，依家諗番轉頭，果個香草包應該係 foccacia。上次 Louisa 請我去 Amaronie's Little Italy 食晚餐，果個麵包又係勁好食，我問 Louisa 果個係咩包，佢話就係 foccacia！咁好食嘅麵包，我當然都想自己試吓整啦，所以今日又開爐試整呢個包。其實我有好多個 foccacia 嘅 recipe，都唔識得揀邊個係好，於是就參考咗 Rachel 個食譜嚟試整，因為覺得好似較為簡單兼成功率較高，不過材料及做法就有少少改變。

材料：
高筋麵粉                        250 克
即用酵母                        1 1/ 2 茶匙
糖                                   1 茶匙
鹽                                   1/ 2 茶匙
水                                   150 毫升
初榨橄欖油                     1 1/ 2 湯匙
迷迭香 ( Rosemary )      1 茶匙
去核黑橄欖                     5 粒
海鹽                                  少許

 

- 將麵粉、酵母、香草、鹽同糖倒入食物處理器內混合，加水搓至起筋。

- 將麵糰稍為攤薄拉長，將橄欖油倒喺麵糰上面，之後再次開機搓成光滑麵糰。

- 拎出麵糰，放上已灑粉嘅枱面上，搓揉及摔打麵糰，直至拉開時出現薄膜。

- 將麵糰滾圓並黏緊收口，放喺已灑粉嘅兜內，然後用保鮮紙冚住，發酵 45
  分鐘。

- 麵糰排氣、再滾圓，同樣冚上保鮮紙發酵 45 分鐘。

- 將麵糰放上烤盤上，用手將麵糰向四面推展，包好保鮮紙再發酵多 45 分鐘。

- 倒少量橄欖油喺麵糰上面，搽勻整個表面後，灑上適量迷迭香。

- 用手指喺麵糰上面插入做成洞，然後放入切半嘅黑橄欖，並灑上少許海鹽。

- 放入已預熱至 210 °C 嘅焗爐內焗 15 - 20 分鐘至表面金黃即可。

 

以上材料份量可做 28 cm X 28 cm 麵包一個。

食譜參考自 Rachel Yau 嘅《知廚之樂》。

 

唔知係咪橄欖油搽得太少，所以無乜金黃色，
不過個面都已經焗得比較乾。

 

 
 
 

連埋油醋汁一齊食，正！

 

Notes：
- 原食譜係無落到乾迷迭香，只係喺插入黑橄欖嘅同時插入新鮮迷迭香枝。

- 麵糰向烤盤四面推開時，切勿過度大力而將麵糰壓得太扁。

- 食譜係教用乾布冚住發酵而唔係用保鮮紙。