韭菜炒蜆肉

        依家好興講集體回憶，乜都話要保留，我都好想追尋番我細個果陣時食過媽咪煮嘅餸，仲好想保留住個味道 o添！不過無可能實現喇，除咗因為已經再食唔到媽咪煮嘅餸之外，以我嘅功力，根本無可能煮得到原汁原味，就算我想嘗試去煮番出嚟，都未必可以搵到一模一樣嘅食材，好似我今晚煮呢個韭菜炒蜆肉就係個好例子。

        記得細個果陣，媽咪間唔中都會炒碟韭菜蜆肉仔俾我食，因為我好鍾意食嘛，到依家都仲好回味 o架！  所以早排先突然間好想食番呢味餸，好想搵番果陣時果種感覺。不過媽咪以前煮呢味餸時，係用果隻好細好細嘅蜆肉仔，真係好細 o架，仲細粒過尾指隻指甲呀！不過依家喺魚檔都唔見有得賣嘅，好似絕哂跡咁！！咁咪唯有買急凍蜆肉嚟代替囉，暫時止住渴先都好呀！！

材料：
韭菜
急凍蜆肉
辣椒乾
蒜茸

調味料：
紹酒
雞粉
糖
麻油

- 蜆肉解凍後洗乾淨，瀝乾水份；韭菜洗淨後切粒，備用。

- 辣椒乾沖洗後切開幾粒，同蒜茸一齊落油鑊內爆香。

- 之後加入蜆肉，快手兜炒幾下，灒酒，盛起待用。

- 再燒熱少少油，加入韭菜炒兩炒，灒酒，將蜆肉回鑊。

- 加入調味料，兜勻後灑上麻油就可以熄火上碟。

        其實我都唔知道當時媽咪係咪咁煮 o架，我只係憑自己對當時味道僅有嘅回憶而去模仿咋！不過，有食過我之前所講果隻蜆肉仔嘅朋友應該知道，同呢隻大蜆肉比，根本係兩回事，不單只無咗果種鮮味之餘，個肉質都完全唔同，蜆肉仔啲肉實好多，而呢種就腍好多呀！

Notes：
- 無論炒蜆肉定係韭菜，都要快手，同埋唔好炒咁耐，因為兩樣材料炒得耐都唔單只會韌，仲越炒越化水 o添。

- 解凍後嘅蜆肉要徹底洗乾淨，唔好以為急凍肉就好乾淨，你哋睇吓幅相就知 o架喇：

其實影呢張相之前已經清洗過一次，比依家更污糟呀！
到洗第二次都仲有咁多污糟嘢呢！

- 落調味之前最好先試一試味，因為蜆肉始終係海產，會有一定鹹味。

 

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

是日西餐

        噚晚煮咗西餐做晚餐，攪咗好耐呀，5 點半度開始準備，到 9 點先有得食，食完哂洗埋碗，已經過咗 11 點喇！不過整出嚟幾樣嘢都好好食，咁都值得嘅！

呢碟係雜菌意大利飯。

 

燒汁洋蔥豬扒，今次啲豬扒煎得好靚，好滿意！

 

乾果肉桂麵包布甸係今晚嘅餐後甜品，再加杯紅茶，Hm…… 好滿足喇！

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

雜菌意大利飯 Risotto al Fungo

        之前煮過一次南瓜意大利燴飯 ，估唔到我老豆都接受到之餘，仲讚好好味㖭喎！噚晚就跟食譜煮個比較傳統嘅意大利飯，用上雜菌去煮，味道都唔錯呀！

乾果肉桂麵包布甸 Dried Fruit & Cinnamon Bread Pudding

        每次去嚫酒店食 buffet，到食甜品時，如果有麵包布甸供應，我都一定會食。照計我咁唔好牛奶同牛油，無理由會鍾意食 o架，但唔知點解真係對佢情有獨鍾呢！

        有次睇到麵包布甸個 recipe，發覺原來唔係太難整，算係幾容易 o添，所以已經長駐喺我個 To Do List 內好一段時間，今日卒之都整咗喇！我參考咗兩個食譜嚟整呢個麵包布甸，一個係參考佢嘅材料份量同做法；而另一個主要參考佢嘅爐火及烘焗時間。出嚟個效果都唔錯呀，又唔會太甜，味道香濃，正！！

係咪好吸引呢！！

材料：
方包              2 片
提子乾          適量
糖漬香橙      適量
冧酒              適量
肉桂粉          少許
雞蛋              3 隻
淡忌廉          100 克
無糖豆漿      200 克
糖                  50 克

- 提子乾同糖漬香橙用冧酒浸透，再加少許肉桂粉拌勻，備用。

- 麵包去皮後切開成 4 片，之後放入焗爐內，用180 °C 焗 5 分鐘，之後翻轉再焗多 3
  分鐘。

- 將烤好嘅麵包排放喺焗盅內，放上醃過嘅乾果喺麵包上面，待用。

- 雞蛋拂勻，加入淡忌廉拌勻。

- 另外將豆漿同糖放入煲內，用慢火煲熱，邊煮邊攪至糖溶。

- 將熱豆漿倒入淡忌廉蛋液內，其間要不停攪拌。

- 之後將混合物隔篩倒入焗盅內，放置 20 分鐘，等麵包可以吸收蛋液。

- 將焗盅放上烤盤上，盤內加水，放入已預熱至 150 °C 嘅焗爐內焗約 30 分鐘至熟。

可能因為焗得太耐，跟個食譜用焗 180 °C 焗 50 分鐘，布甸中心焗到
好老，唔夠滑，所以上面寫俾大家嘅食譜，係跟番我參照材
料份量果本去寫。

        之前我都跟過個本食譜嚟整豆腐 mousse cake，點知一脫模就決堤，完全凝固唔到；明仔又跟過佢個食譜整曲奇，佢話唔係咁好食；呢次參考佢個爐火同時間去焗布甸又老過頭，睇嚟呢本食譜都丟得 o架啦！！

Notes：
- 用隔夜麵包整布甸會比較好，因為麵包較乾身，可以容易啲吸收忌廉蛋液。

- 可用牛奶代替豆漿使用。

- 如果想布甸更加香口的話，可以將麵包前後兩面搽上牛油先入爐焗脆。

- 醃完乾果之後，如果仲有冧酒剩的話，可以加埋落蛋液中一齊拌勻，布甸焗出嚟
  會香好多呀！

原味蒸蛋糕

        今日 Louise 因為公司突然間有雜誌要做訪問，要開 OT，所以嚟唔到上堂，而 Lily 就因為要陪佢媽咪去覆診，要晏晝先嚟上堂，咁朝早突然變得咁得閒，於是又手痕整嘢食。

        見好耐都無蒸蛋糕，於是就決定蒸個原味蛋糕，貪佢易做又快手，簡簡單單，快快趣趣整好之後就可以同 Lily 上堂。

麻辣臘腸炆蘿蔔

        前幾日 Gordon 話俾我聽佢有個 friend 送咗幾條麻辣臘腸俾佢，係佢個朋友專登係四川成都帶返嚟嘅，咁佢就話俾一條我試吓好唔好食。原本當地人多數都係蒸或者烚嚟食，但咁啱老豆之前喺農場度拎咗個白蘿蔔返嚟，於是我就諗到用嚟煮蘿蔔，一來蘿蔔雖然清甜，但始終唔係濃味嘅食材，用佢嚟配麻辣食材應該幾夾；二來，白蘿蔔夠 "涼"，可以中和番麻辣嘅 "熱"，一舉兩得，yeah ~~！

材料：
白蘿蔔
麻辣臘腸
薑片

調味料：
雞粉
生抽
糖
紹酒
麻油

- 臘腸徹底洗乾淨表面鹽份，然後切片，備用。

- 蘿蔔刨皮、略沖洗，之後用滾刀切件。

- 燒熱油，爆香薑片，落埋臘腸一切爆香，灒酒。

- 加入蘿蔔一齊炒一陣，加水，冚鑊蓋，用慢火炆至蘿蔔腍身。

- 最後灑上麻油，兜兩兜，熄火上碟。

        嘩，啲麻辣臘腸好勁呀，麻到我有少少 "wing wing" 哋！！ 可能係我不嬲都唔係好受得麻啦！反而辣就唔緊要。不過我老豆同 Gordon 就話唔夠麻囉 ，真係想死！！！

        其實個味道都唔錯呀，辣度啱啱好，好惹味，而且呢隻麻辣臘腸係種煙熏臘腸，所以仲有種煙熏嘅香味 o添！另外，有樣嘢對我嚟講，我係幾 buy o架，就係臘腸本身都幾瘦，幾乎完全無肥肉呀！

Notes：
- 炆蘿蔔時要留意水份，如果炆到乾水蘿蔔都未夠腍的話，就要酌量加水。

- 相反，如果蘿蔔已經煮腍但亦有多餘水份，可校大火收乾水或用粟粉水埋薄芡。

- 可用一般臘腸或膶腸代替麻辣臘腸。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

小紅莓英式烤餅 Dried Cranberry Scone

        自從上次整過 scone 後，一直都再無整啦，適逢啱啱整好柚子芒果醬，又卒之買到固體菜油返嚟 ( 之前「二記」斷哂貨呀，我老豆話可能好多人買嚟代替豬油整中式賀年糕點 )，咁就無藉口偷懶唔整啦！

柚子芒果醬 Pomelo Mango Jam

        早前 Louisa 整咗啲果醬送俾朋友，包括士多啤梨果醬同柚子芒果醬，不過我兩隻果醬都無試呀，因為當期時我自己都啱啱整咗士多啤梨果醬，而 Louisa 就話俾我聽隻柚子芒果醬好評如潮，連 Winnie 食過都讚好，所以我就叫佢教我整喇。

       其實都唔難整，反而要買到柚子皮同柚子汁比較難，好彩 Louisa 早前 "割愛" 將佢用剩咗嘅少量柚子皮同柚子汁俾咗我，咁我就有機會學整喇！咁啱上星期「惠康」啲芒果又勁減，3 個都只係賣 $5 咋，雖然完全未熟兼仲好青，不過我都照買，因為真係好平，擺到一個禮拜後嘅今日，已經完全熟透，可以開工啦！

韓式炒年糕

        上次整冬瓜肉粒湯年糕時，因為做緊特價嘅關係，一次過買咗兩包韓國年糕，用咗一包之後，另一包就一直擺喺雪櫃，一於今晚就清埋佢！

        上次煮過湯年糕，咁今次就整炒年糕啦！

 

材料：
脢頭瘦肉
紹菜
冬菇
洋蔥
韓國年糕

醃料：
生抽
鹽
糖
水
油
粟粉

調味料：
韓國辣椒醬
魚露
糖
紹酒
麻油

為咗煮呢碟炒年糕而專登走去買嘅韓國辣椒醬。

- 紹菜洗乾淨後切絲；冬菇浸軟後切絲；瘦肉醃好，備用。

- 燒熱油，先爆香洋蔥，再加入紹菜炒熟，之後盛起。

- 冬菇同肉片落鑊略炒，灒酒後炒熟，盛起待用。

- 再燒熱油，年糕落鑊炒幾吓，加少少水，冚上鑊蓋煮至軟身。

- 之後加入調味料，並將之前炒過嘅材料全部回鑊，最後灑上麻油，兜勻後就可
  以上碟。

食完辣嘅炒年糕，飲番碗滋潤嘅蛋白杏仁茶就唔駛怕熱氣啦！

Notes：
- 紹菜可用娃娃菜代替，或用自己鍾意嘅蔬菜配搭。

- 若水份太多，可用粟粉水埋薄芡。

- 辣醬用量可因應個人口味而定。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

蛋白杏仁茶

        上次餐開年飯整 Crème brûlée 時，因為只用蛋黃，所以留起咗啲蛋白放喺冰格，為咗佢，我今晚專登整呢個蛋白杏仁茶 o架，咁就可以一次過用哂啲隻白，唔駛煩。

材料：
南杏      150 克
北杏      60 克
水          1000 毫升
奶          60 毫升
糖          80 克
蛋白      3 隻

以上材料份量可做杏仁茶約 5 碗。

食譜參考自鄭慧芳、胡玉玲編著嘅《香港人氣甜品》。

- 杏仁略沖洗後用清水浸 1 個鐘；蛋白輕輕拂勻，備用。

- 杏仁瀝乾水份後，放入攪拌機內，加入一半水，攪打成幼滑杏仁漿。

- 之後再加埋剩低果一半水再打，然後將杏仁漿隔渣。

- 杏仁漿倒入煲內，用中慢火煲滾，其間要不時攪拌。

- 加入糖同奶，再次煮番滾之後就可以熄火，將煲離火。

- 隨即將蛋白加入，慢慢拌至稠身即可。

 

Notes：
- 當杏仁茶煲滾時，會有大量泡沫湧出，要小心滾瀉。

- 蛋白加入杏仁茶後要立即拌勻，以防蛋白受熱而凝固成塊狀，失去滑溜口感。

- 唔鍾意太甜的話，可以將糖份略減，跟足食譜份量做比較甜。