雜菌意大利飯 Risotto al Fungo

        之前煮過一次南瓜意大利燴飯 ，估唔到我老豆都接受到之餘，仲讚好好味㖭喎！噚晚就跟食譜煮個比較傳統嘅意大利飯，用上雜菌去煮，味道都唔錯呀！

 

材料：
意大利米                  450 克
洋蔥                         100 克
蒜頭                         3 粒
紅酒                         130 毫升
牛肝菌                      30 克
冬菇                          50 克
鮮白菌                      80 克
清雞湯                      1 公升
羅勒 ( Basil )             少許
百里香  ( Thyme )      少許

調味料：
鹽                               少許
糖                                適量
即磨胡椒                     適量

 

- 將冬菇及牛肝菌洗淨，用水浸軟、切片；白菌洗淨切片；清雞湯煲熱。

- 洋蔥去皮後切粗粒；蒜頭去衣，切成蒜茸，備用。

- 燒熱油，爆香蒜茸同洋蔥，加入米炒一陣。

- 倒入紅酒，邊煮邊攪拌，之後加入一湯杓清雞湯，一直攪拌至所有水份全部吸收。

- 加入剩低嘅清雞湯，用慢火煮約 10 - 15 分鐘，繼續不停攪拌。

- 另起鑊炒香菇菌，之後加埋入飯內兜炒均勻。

- 加入調味及香草，拌勻就可以熄火上碟。

 

食譜係參考自鄭雅正嘅《西廚教室》。
 

 

啲牛肝菌我唔係用 "來路" 高檔貨色，只係用要嚟
煲湯果隻，但效果都唔錯，好香濃。

Notes：
- 浸菇菌嘅水可以留用，到加水煮飯時可以倒入一齊煮，煮出嚟嘅飯會特別香。

- 喺落鹽之前，記得先試吓味，因為清雞湯都已經好夠味道。

- 煮飯時一定要不斷攪拌，否則就會黐底。

- 原食譜炒材料時係全用牛油。