2009年6月14日星期日

荔枝紅茶凍


        呢輪 blog 友阿 Yen 成日都整果凍,睇到我心郁郁都想試吓整,於是就問佢喺邊度可以買到蒟蒻粉,原來喺二記已經有得賣,平時都無留意到。所以上次又再幫 Louisa 買 cream cheese 時,就順便買包蒟蒻粉返吓整。買咗返嚟之後,又咁啱得咁 "橋",老豆又拎啲樹上摘嘅荔枝返嚟,咁就啱哂喇,要嚟整果凍啦!但係無理由就咁將啲蒟蒻粉煮溶,加啲砂糖就算 o架!咗好耐,最後就決定用紅茶配荔枝啦!


材料:
新鮮荔枝      3粒
蒟蒻粉          10克
砂糖              2湯匙
水                  1杯 (240毫升)
紅茶茶包      1包


- 荔枝剝殼、去核,切碎粒備用。


- 先煲滾水,放茶包落煲度,後轉中細火將茶葉煲出味。


- 茶葉煲出味後,就將爐火校到最細,然後加入砂糖攪拌至完全溶解。


- 唔好熄火,繼續以最細火保暖,並加入蒟蒻粉 ,慢慢攪勻至完全溶於水。


- 將切碎荔枝肉逐粒放入冰格裡



- 之後就將啲蒟蒻溶液倒入製冰模內,放入雪櫃雪到凝固就得喇!


 



        好睇又好食,淡淡嘅紅茶裡面,粒荔枝就為呢個平凡果凍生色不少。學阿 Yen 話齋,天熱時食完果凍就即刻舒服哂!


        我始終鍾意蒟蒻多過大菜、啫喱,因為佢唔似大菜咁爽口,比較煙韌同有 o趙頭;又唔會好似啫喱 ( 魚膠 )咁軟滑,恰到好處。


 


Notes
- 蒟蒻粉同水嘅比例係參考包裝袋上suggection,如果想再煙韌嘅話,就需要
  減少水份量或增加蒟蒻粉嘅份量。


- 砂糖嘅份量可依據自己口味調校,不過就建議大家可以落多少少,因為雪凍之後
  會無咁甜。


- 將混合液預先倒入量杯,然後先至斟落冰格度,咁樣會方便好多!


- 紅茶包我係用 Twinings English Breakfast Tea,貪佢唔會太濃而有苦澀味。


2 則留言:

  1. ok啊~紅茶+荔枝好適合夏天消暑食~勁啊﹗
    [版主回覆06/19/2009 01:28:00]        都係多得妳指點 啫!
            係呢,妳用水同蒟蒻粉個份量比例係點 o架?我覺得呢個份量比例稍為 "削" 咗 啲,唔夠煙韌。

    回覆刪除
  2. 你好..想請問係咪直接倒D溶 液入個冰模就得咖喇? 凝固左之後會唔會倒唔到出黎GA?
    [版主回覆05/13/2010 00:21:00]        係呀,就咁將 啲 蒟蒻溶液倒入冰格就得 o架喇!妳放心啦, 啲蒟蒻好軟身 o架,一整就甩喇!快 啲試整啦!

    回覆刪除