奇異果蘋果醬 Kiwi Fruit & Apple Jam

        星期五果日真係勁充實，由朝到晚都 stay 咗喺個廚房度，鬼咩，由預備晚飯食材，醃定嘢星期六晚食，整果醬、蛋糕，到煮夜晚餐飯，食完又要洗碗、抹廚房，乜都自己一手一腳做。我計過喇，扣除出咗去廳度食個 tea-lunch 果 15 mins，同埋夜晚食飯果半個鐘，足足企咗喺廚房裡面成 10 個鐘，真係癡哂線，人都癲！！所以我都同 Louisa 講，雖然佢要返工，但係放工後返屋企食完飯仲有大把時間整蛋糕、焗嘢食，因為佢有工人幫佢做好哂啲預備功夫同事後清洗工作嘛！學 Frankie 話齋，我就 "一條龍服務"，乜都自己 "一手包辦"，好彩整嘢食都算係我最近 "發掘" 到嘅興趣，如果唔係，要我企喺個廚房度成 10 個鐘，真係啋你都有味，肯定死俾你睇！

 

        前幾日去「惠康」買嘢時，見到啲奇異果做特價，於是就買咗 10 個返嚟，除咗要嚟食，就用咗兩個嚟整果醬。奇異果蘋果醬就係果日 "興趣班" 第一樣開始整嘅。點解我會揀做呢個果醬？咪因為要整俾 Winnie 呢個 "奇異果精" 囉！咁又唔係完全為咗佢嘅，我又不之於咁好人，哈哈！  一來咁啱買到平奇異果，二來又可以幫到我啲供佛蘋果 "搵到個歸宿"，三來睇過本教整果醬嘅書，呢個算係幾易整，咁一舉三得，何樂而不為呢！

 
 

材料：
奇異果      2個
蘋果          1個
糖              240克
檸檬          半個

首先最緊要做嘅就係將陣間用嚟裝果醬嘅玻璃樽消毒：

 

- 洗乾淨玻璃樽及樽蓋後，放入滾水內烚10 分鐘 ( 膠蓋除外 )。

 

- 小心用食物鉗夾起個樽同蓋，之後放入焗爐度用 100°C 烘乾。

       

 

 

- 烘乾後繼續留番喺個爐裡面，直到果醬煮好先拎出嚟裝果醬。

 

 

 

 

 

跟住就到煮果醬喇：

 

- 先將奇異果同蘋果去皮、去芯，之後切成粒。 

 

- 放鮮果粒入攪拌機內打成粗末狀。

 

- 將檸檬榨汁，備用。

 

 

 

 

 

- 將果茸、檸檬汁同糖一齊放入煲內，用中火煮滾，一邊煮、一邊攪拌。

 

 

 

 

 

 

 

- 煮到咁上下，果茸混合物開始起泡就轉中慢火繼續煮同攪拌。

 

 

 

 

 

 

 

- 煮煮吓你會見到啲泡開始慢慢消失，而果茸混合物亦開始變得通透、有光澤。

 

 

 

 

 

 

- 當煮到完全無哂泡時就可以熄火，果醬就煮好喇！全程大約都只係煮咗 15 分鐘
  度咋。

 

- 之後就可以入樽喇。

 

食譜出自《鮮美果醬輕鬆做》。 

 

 

 

        都估唔到煮起有咁多，我仲只係預備咗自己個樽同 Winnie 個樽㖭！攪到我 "拿手唔成世"，即刻周圍搵玻璃樽，卒之俾我搵到個樽，但就無時間去消毒喇，唯有淨係用熱水壺啲滾水淥一淥佢，之後就即刻入樽，立即冚好蓋封口，點知都仲係有剩，求其搵個碗仔裝起佢算數。

 

 

        因為一早預咗會整果醬，所以之前專登去「山崎麵包」度買定包粟米麵包返嚟搽果醬試味，兩塊奇異果蘋果醬多士就係我果日嘅 tea-lunch 喇 (其實都已經 4 點幾， tea 都過埋喇 )。Hm…… 唔錯、唔錯，幾好味喎，有奇異果嘅清新香氣，又有粗粒蘋果茸，正呀！   原來整果醬就係咁簡單。

 

Notes：
- 因為我成日都好驚個玻璃樽會烚爆或者裂，所以我就用咗烚雞蛋嘅方法，將樽一
  早凍水落煲，結果安全完成。

 

- 我同 Winnie 個樽蓋裡面都有密氣膠邊，所以我唔敢同玻璃樽一齊烚，怕會變形
  或熱到溶，所以就只係趁煲滾水熄咗火之後，"嗱嗱林" 放入去淥幾淥就拎番上嚟
  ，立即放入焗爐內烘乾消毒。

 

- 雖然糖嘅份量係勁多，但係就千祈唔好怕甜而私自減份量，因為糖嘅作用除咗係
  增加果醬甜味之外，最重要係用嚟做天然防腐劑，情況就好似用大量鹽嚟醃鹹柑
  桔一樣，糖嘅份量越少，保存期就相對越短。

 

- 想知更多關於整果醬嘅參考資料、原理、同注意事項，不防參考吓疑似 Biology
  老師 ( 唔係講笑，佢真係老師嚟㗎！不過就唔知教咩科 ) 嘅天拿‧公個 blog，
  佢有較詳盡嘅解釋。

 

 

 

P.S.  預備材料果陣時，一邊秤糖就一邊驚，點解？因為原來真係要用好多好多糖
         ，心諗係咪睇錯份量呀，用咁多糖嘅！成日驚死自己睇錯食譜秤錯份量，所
         以一路秤就一路不斷睇個食譜，睇吓自己有冇秤錯。當然，用咁多糖就預咗
         一定係甜死㗎喇，一試味，嘩，果然好甜~甜~甜~甜~甜~呀！但係搽落多士
         度一齊食，嗯，估唔到味道又啱啱好喎，所以我明白到：人哋係專業嘛，寫
         得出個食譜就緊係冇衰啦，仲要係樣樣都好講究嘅日本人寫嘅㖭！