朱古力鬆餅 Chocolate Chips Muffin

        記得上次去台灣旅行時，我專登參考仙姐個食譜整咗雙重朱古力腰果鬆餅俾班老友食，剩低果啲就俾咗我老豆同阿馳食。

        早前問番阿馳同老豆，佢哋不約而同都話整咁多次嘅 muffin，最好食都係呢個朱古力 muffin，見星期一阿馳會返嚟做節，而開咗果盒 cream 又好耐都無用喇，所以今日得閒就再整多次，等阿馳返嚟時就可以順便帶走返屋企食。

 

材料：
牛油                    100 克
糖                        80 克
蜜糖                    60 克
金黃糖漿             30 克
雞蛋                     2 隻
低筋麵粉             100 克

高筋麵粉             130 克
可可粉                 35 克
泡打粉                 5 克
梳打粉                 2 克
鹽                        2 克
乳酪                    100 克
淡忌廉                100 克
入爐朱古力粒      80 克

- 先將所有粉類過篩 3 次。  

 

- 牛油於室溫放軟後，加入糖、蜜糖同糖漿，用電動打蛋器打至發白。

- 將雞蛋、鹽、乳酪同淡忌廉加入牛油霜中，拌勻。

- 分次篩入粉類，拌勻成麵糊後，再加入朱古力粒，拌勻。

- 將麵糊倒入模內，放入已預熱 180 °C 嘅焗爐內，焗約 20 分鐘至熟。

- 將鬆餅放上放涼架上攤凍。

以上材料份量可做約 10 個 4 安士重嘅 muffin。

食譜嚟自獨角仙@藍色大門嘅朱古力鬆餅。 

Muffin 焗好出爐喇！

 

 

 

 

呢 4 個係整俾阿馳同阿瑩。

 

 

 

 

仙姐嘅食譜果然有保証，不但朱古力味好香濃，質地

非常鬆軟，好味呀！唔怪得之好多 blogger

整朱古力鬆餅時都會跟呢個食譜整啦！

 

當然唔會少得媽咪果份啦！

 

 

Notes：

- 要做出鬆軟嘅鬆餅，當麵粉加入牛油霜混合物中，一拌勻所有粉類就要立即停止
  攪拌，以免起筋。

- 選用優質朱古力粉可做出香濃朱古力口味。