全麥朱古力香蕉鬆餅 Whole Wheat Banana Chocolate chips Muffin

        我依家都習慣咗去超市買果啲 pack 起咗嘅熟香蕉，一來平啲，但最重要係唔駛嘥時間等佢 "偶" 熟，方便好多。

        今次買到嘅香蕉雖然都係一樣 pack 好哂，但就唔係真係太熟，而且有幾隻仲好生，仲係青色 o架！所以我諗住都有排擺啦，點知一下子幾隻一次過全部起哂梅花點，大佬，點食得切呀！！所以就諗住要嚟整嘢囉。見次次啲香蕉都係要嚟整蛋糕、鬆餅，所以今次唔想再整蛋糕喇，本來諗住試吓整 banana brownie 嘅，點知個食譜都只係用到一隻蕉多啲咁大把，根本消唔哂 4 隻蕉咁多。突然間俾我諗番起呢世仔第一次開爐整果個香蕉朱古力 muffin，於是睇番食譜，哈，啱啱好用足 4 隻蕉喎，good！！ 

        所以就決定再整呢個 muffin，不過今次就加多咗全麥粉落去整，變一變口味！ 

材料：
香蕉                       4 隻
牛油溶液               2 / 3 杯
雞蛋                       1 隻
低筋麵粉               150克
全麥粉                    50克
泡打粉                    1湯匙
糖                            60克
鹽                            少許
入爐朱古力粒        1 / 2杯

以上材料份量可做大 size muffin 6個。

- 先將所有粉類過篩 3 次備用。

- 香蕉放入攪拌兜內，用叉壓爛成香蕉蓉。

- 加入雞蛋及牛油溶液，用打蛋器攪拌均勻。

- 之後分次加入鹽同糖拌勻。

- 將粉類分多次篩入，用打蛋器拌至無粉粒為止。

- 最後拌入朱古力粒。

- 將麵糊倒入模內，放入已預熱至 200°C 嘅焗爐內焗約 25 - 30 分鐘至熟。

 

啲 muffin 焗好喇！好濃香蕉味呀！

 

        今日第一次用個矽膠模嚟焗，係喺 JUSCO $10 店買 o架，幾抵玩！只需輕輕力一 "頂"，個鬆餅已經自動脫模，好方便，都幾好用喎，仲意想不到咁靚 o添！好，呢個就送俾 Gordon 啦，因為搭佢喺台灣買嘢又唔肯收番錢，話係手信喎！

 

一杯 Ceylon Orange Pekoe Tea、一個 muffin 加粟米麵包，就成
為咗我今日嘅 tea-lunch 喇！

 

媽咪都同我一樣呢！ 

Notes：
- 糖嘅份量要因應香蕉嘅甜度而增減，所以最好之前先試一試味。

- 朱古力粒可根據個人口味而添加，亦可用各種果仁代替。

- 唔鍾意用全麥粉嘅朋友，可以改用全低筋麵粉 200克。

- 記得一見到所有材料完全混合好就要停手，避免麵糊因起筋而唔夠鬆軟。

P.S.  個人好鍾意加咗全麥粉整嘅糕餅，因為比較鍾意食粗嚡嘅質感。但香蕉份量可以減少 1 隻，因為個鬆餅比較濕，有少少似雪芳蛋糕。