焗爐烤彩椒 Oven Roasted Capsicum

        除咗嘗試用真空煲慢煮三文魚之外，仲試埋用焗爐整烤燈籠椒，結果當然同樣理想啦，最重要係大熱天時唔使對住個爐火 "BBQ"，攪到身水身汗嘛！！

 

 

- 燈籠椒洗乾淨，開邊後去蒂、去籽，之後放上烤盤上。

- 放入已預熱至 240 ℃ 嘅焗爐內，用燒烤模式焗約 30 分鐘至表皮焗燶、收縮即可。

- 出爐後立即將燈籠椒放入大碗或兜內，用碟蓋住或用保鮮紙密封包好。

 

- 當溫度略為冷卻之後，將表皮撕去即可享用。

 
 
 

烤盤最好先墊上牛油紙，因為烤燶咗嘅燈籠椒黐到

個盤實一實，浸水一段時間都刷唔甩，

最終都係要出動到鋼絲刷！

 

睇睇呢幅相就知道，紅椒係最易去皮，一撕就整塊

離開；綠椒就最麻煩，一路撕一路爛！

以前唔識嘢，覺得烤燈籠椒係個多餘動作，做乜無端端

嘥功夫去攪咁多嘢，直至有次睇到文字介紹，原來

係將水份蒸發走，燈籠椒甜味濃縮後，完全

唔同食法，味道真係甜好多！

Notes：
- 燈籠椒出爐後立即放入大碗內用保鮮紙密封包好，因溫差關係會形成大量
  水蒸氣積聚表面，表皮就會比較容易撕開。