2009年6月2日星期二

椰檳

        早前剪低嘅美心袋裝麵包 coupon 月低到期,本來一心再去買多次個唂咕麵包,點知已經賣哂,見個架上面有好多隻包都試過哂,突然諗起呢隻椰檳未試過喎,好,就買嚟試吓啦!







        其實我一向都唔鍾意食港式麵包,但有兩隻包就例外,一隻係菠蘿包,鍾意食佢個脆皮;另一隻就係呢個椰檳喇,因為好鍾意果種椰絲嘅香甜味道。呢次買呢個美心嘅椰檳,我自己就唔係咁鍾意喇,因為個包質比較軟,not my cup of tea!我鍾意食硬包嘛!平時啲 "平民" 麵包舖度買嘅椰檳唔係咁樣,整體個麵包都比較實少少,面頭有椰絲部分仲有少少焦脆!我就係鍾意食呢隻 feel 囉!另外一樣就係,食完之後啲牛油味喺個口度久久不散,成口都係羶味,好驚呀!人哋就話「唔食羊肉一身羶」,我就「食咗椰檳一口羶」!下次一定唔會再買喇。

        講開港式麵包,我點解唔鍾意食呢?因為佢係 "牙印包" 囉!咩叫 "牙印包"?咁就要解釋一吓喇,呢樣嘢係媽咪話俾我聽嘅。

        話說之前住我隔離屋果個女仔,佢朝早早餐食嚫麵包都 "誓願 " 咁款,佢阿媽就成日趨佢食快啲,驚住返學遲到,點知果女仔話個包好核突,唔想食,咁佢阿媽就問做咩好核突啫,佢就話當佢咬完一啖個包之後,望到個包有個牙印喺度,而個牙印周圍就濕濕立立,好核突,見到都想作嘔!! 

        所以,自此我就俾個朵啲港式麵包做 "牙印包" 喇!媽咪點解會講俾我聽呢?唔係因為覺得攪笑,而係佢好清楚知道我聽完之後一定會好認同果個女仔,因為啲港式麵包通常都有落到雞蛋同大量油脂,攪到個包好濕、好軟,咬一啖之後,喺個口度真係趙去都唔爛咁樣,簡直好似做緊牙齒運動,而依個趙來嘅動作又會將果嚿麵包好似再一次搓到 "起筋" 咁,真係惡性循環!嘩,大佬,真係越諗越核突呀,仲點吞得落去呢!!!!!媽咪就係知道呢個原因,所以都好少買港式麵包俾我食,買嚫都俾歐陸麵包,貪佢夠硬、夠乾爽,咬完之後就算有個牙印喺度,都唔會濕立立嘛!


 

3 則留言:

  1. Kelly's Fusionology2009年6月3日 上午12:05

    我唔再食美心既包,因為我試過有次買左個包唔記得食,室溫放左3日後同買個時沒什麼兩樣....
    [版主回覆06/03/2009 14:15:00]        唔係咁驚呀話?         因為我屋企附近個商場只係得美心、聖安娜同山崎,美心已經係好過聖安娜好多啦!山崎就差唔多大部份都係芝士,我又唔食芝士 嘅,加上呢間係迷你舖,所以選擇唔多。仲有間大班同 A1 嘅,A1 就梗係好食啦!不過就唔平,日日買都幾入肉!!大班就好少去,因為唔多吸引。呢兩間我都要行大約 10 分鐘先去到,所以 諗起咁遠都唔願行去買 lu。         所以我好多時都係買美心「新輕樂」果個 series。

    回覆刪除
  2. 你好呀, 又多一位對包有要求的男人呀!
     
    隨了勁肥的包外, 我乜包都鍾意.......不過街賣的包, 見不到的背後, 添加劑可能多到嚇死人......
     
    要食歐風田園包, 冇乜得賣, 唯有自己整, 不過食得多百潔布包, 又會想食港包. 我冇牙印恐懼症, 係那位女孩本身不喜歡麵包啫.
     
    做包, 最基礎係手搓, 我亦一直手搓, 好好玩亦好慳力, 10-15分鐘完成, 試吓啦, 你會上癮的.
    [版主回覆06/08/2009 16:36:00]        唔係唔嘩,好慳力?我上次整個 法包仔 都搓 咗好耐,好 攰呀!無理由咁快 OK o架!所以我早排買 咗仙姐本《天然麵包香》準備學整17小時麵包囉,有機會交流 吓呀!         係呢,有冇試過 Pumpernickel 個黑麥呀,真係正到暈!

    回覆刪除
  3. pumpernickel的包, 我耐不耐就會心思思吃番次了, 難得有咁靚包食.
    [版主回覆06/10/2009 12:31:00]        係呀,真係鍾意歐陸麵包人仕 嘅至愛!

    回覆刪除