自製鮮豆漿

材料：
黃豆
清水
砂糖

        好簡單o架咋，將啲黃豆浸6個鐘或以上，或者隔晚夜，之後過幾次水直至啲水變清同無泡，跟住放入攪拌機度，加適量清水，將黃豆攪碎至微粒，咁就變成豆漿啦，將啲豆漿隔渣，倒入煲內先用大火煲滾 (記得邊煮邊攪拌，因為好容易黏底)，之後要轉細火繼續煲，因為未熟透的豆漿內有一種物質叫做 "皂素"，對身體有害，所以一定要徹底煲熟先可以飲，唔好以為煲滾就算數。跟住依個人口味加入適量嘅砂糖，再攪拌至所有砂糖完全溶哂，咁就飲得o架啦！

        以前見媽咪用布隔渣，要好用力咁將啲豆漿榨出，非常辛苦，好彩後來佢買咗部攪拌機連埋個隔渣網，我先至敢試吓整，如果叫我用手榨，咁就真係慳啲啦唔該，我寧願唔飲囉！或者俾貴啲錢喺街買嚟飲算數。依家試過成功整到，除咗可以飲到既新鮮又啱自己口味嘅豆漿之外，仲慳番唔少錢，因為原來 $8 就可以買到成斤黃豆，可以做到好多杯豆漿o架啦，喺街買一支最少都 $5 支啦！