2008年9月14日星期日

海帶綠豆粥


材料:
綠豆
百搭米
海帶
片糖


        原本我係想煲海帶綠豆沙嘅,點知去到花檔諗住買臭草時,事頭婆話無得買,咁我就問佢過兩日會唔會有呀,佢就話俾我聽:「依家仲邊有人會賣臭草呀,成百幾蚊斤,你買唔買呀!」佢話暫時都唔會賣住 o架啦,叫我食住海帶先喎,咁唯有係咁啦,依家通漲真係厲害。但後尾我諗,無咗臭草硬係好似 "掙" 咁嘢咁,碗綠豆沙好似失色咗,所以就改變 "策略",改為煲綠豆粥,等到有番臭草賣先再煲過綠豆沙啦。


        綠豆要浸過夜,米就洗淨浸一陣;海帶就先洗清面頭啲海鹽,然後浸至發大兩三倍,再切成粗條備用。煲滾水後,將綠豆、米同海帶一齊放落煲度,煲大約15分鐘到就放番落個真空煲度,到食之前拎番出再煲多十零分鐘,與此同時,另外再煲少量水,用嚟煲溶啲片糖,因為片糖比較多雜質,所以分開煲,方便等
啲雜質沉澱,到將啲糖水倒落去啲粥度時就避免倒埋啲雜質,之後滾多幾滾就掂啦。


        因為今日係中秋節,所以我都煮啲湯圓供佛 (媽咪以前逢親中秋、冬至都有咁做 ),你哋睇到粥裡面有粒白色同淡黃色嘅物體就係花生同芝麻湯圓啦,不過就唔係我自己做,係買返啫,睇吓遲啲有冇咁嘅閒情日緻做湯圓先!


沒有留言:

發佈留言