香蕉全麥蛋糕 Banana Whole Wheat Cake

        上次喺 Louisa 屋企食咗佢跟 Titan Tsang 個 recipe 整嘅 "高級" 香蕉蛋糕之後，佢話下次想試吓用全麥粉整，睇吓會唔會好食啲，咁我見自己又好耐都無整過香蕉蛋糕喇，加上又即刻諗起我有呢個 recipe，噉噚日 day-off 咪冒住 "熱死" 嘅危險開爐焗嚟試吓囉！

        唔係講笑 o架，噚日雖然又熱又翳焗，但都無乜點出汗，但當完成好麵糊後，一開爐，嘩，即刻成身汗係咁流，企喺個爐隔離洗番乾淨哂啲用具時，真係好有做高溫瑜珈 feel！

蛋糕不但鬆軟，仲充滿住香濃嘅 香蕉味同麥香味，加埋一杯咖啡
或伯爵茶，就可以享受一個悠閑嘅 afternoon tea 喇！
 

蛋糕材料：
牛油              70克
黃糖              30克
雞蛋              80克
全麥粉          90克
低筋麵粉      90克
泡打粉          1湯匙
梳打粉          1茶匙
香蕉              200克

飾面材料：
香蕉               2隻
砂糖              適量
肉桂粉          適量

以上材料份量可做 3' X 7' 長方形蛋糕一個。

食譜係出自 Anita & Sanny @ Jam Bakery 嘅《日嚐甜品》。

 

- 首先將所有粉類過篩 3 次；兩隻雞蛋拂打成蛋液；香蕉放入攪拌機內打成香蕉茸
  ；砂糖與肉桂粉拌勻。

- 牛油於室溫放軟後，用電動打蛋器打至軟身，跟住分次加入黃糖打勻。

- 量出 80 克蛋液，加入牛油霜裡面拌勻。

- 將香蕉茸加入，拌勻。

- 跟住加入粉類，盡量輕手及快手將麵糊以切拌方式攪勻，一見到所有粉類完全混
  合就要即刻停手。

- 將麵糊倒入蛋糕模，用膠刮抹平表面。

- 將兩隻香蕉切薄片，均勻鋪喺麵糊表面，然後再將肉桂糖灑喺面。

- 放入已預熱至 180 °C 嘅焗爐內焗 45 分鐘，咁就完成。

出爐啦！

 

呢個係整俾 Louisa  嘅，等佢可以試吓自己嘅 idea 嘛！

Notes:
- 全麥粉過篩時，較大嘅麥粒會過唔到篩，所以之後必須要同其他粉類混合拌勻。

- 飾面香蕉唔好預早切定，因為到整好麵糊時已經變黑哂！

- 如果你成日都做唔到鬆軟嘅蛋糕 texture，可以考慮好似我咁全程都用電動打蛋
  器作攪拌，我已經實驗過無數次，一定掂！ 

P.S.  講

樣恐怖事件俾大家聽，平時焗完蛋糕之後，通常我都唔會脫模，就咁成個擺喺度攤凍，之後就用錫紙冚面封好，再放入雪櫃，一向都相安無事。但係今次就出事啦，今朝我無意間見到錫紙面無啦啦多咗幾 "擘" 黑色嘢，心諗，點解無端端會咁污糟 o架？用手摸吓，依，濕濕哋 o架喎，再睇真啲，原來唔係黑色，係張錫紙穿咗好多個窿呀！！！！ 你哋睇吓張相就知 o架喇！

        跟住我就即刻打開張錫紙，睇吓蛋糕裡面有咩事，唔通有蟲蟲咬穿咗張錫紙爬入去食蛋糕？ (Hm… 梗係我整啲蛋糕太好味啦，連蟲蟲都忍唔住要試食？ ) 原來所有錫紙穿窿嘅位置，都係掂到啲香蕉 o架！

        因為我諗住今日會食，所以噚日攤凍完包好無放入雪櫃，可能因為我屋企太熱，加上香蕉糖份太過高，產生咗化學作用溶咗咗張錫紙呀！好彩我噚日裁張牛油紙時，預留咗好多紙口，咁我就將佢覆蓋喺蛋糕上面，之後先再冚錫紙放入雪櫃囉！

        平時係用大模整，蛋糕一定唔會發到同模邊平口，所以錫紙掂唔到蛋糕面，同埋無整香蕉飾面呢！今次就用咗個細模整，個蛋糕發到好高，高過哂個模，仲整埋香蕉飾面，實掂到張錫紙啦，仲唔死！！所以 blog 友們要留意呀！

        真係好驚呀！