2009年3月17日星期二

又俾家長 "屈"!

       噚日教教吓琴,"果位" 家長又打電話俾我,問我幾時去到佢屋企教佢兩個仔,我話約 3:45pm 度喇,跟住佢就話:「點解你又私自調咗上堂時間唔同我講呀?佢哋呢個時間係唔得 o架噃!」


我:「吓,我有問過佢哋得唔得先調 o架!」


佢:「咁你點解唔問我講呢?」


我:「因為我好少見到妳,所以問過佢OK 就無再搵妳囉!」


佢:「咁你可以打電話俾我 o架!」


我:「我諗住妳要返工,況且佢哋都應該好清楚自己個 schedule無謂成日打攪妳。


佢:「上次我咪同你講咗你要打電話俾我囉!( 大佬,上次妳係話以後逢過農曆年假期都問吓妳上堂時間咋噃!!) 佢哋同我講話只係調一兩堂,唔知點解依家又會成日都星期日上堂。」


我:「我已經同佢哋講好咗唔係一次半次,係以後都係呢個時間上堂 o架喇!咁佢哋又話無問題,咁我先至正式調咋。」


佢:「佢哋根本呢個時間就唔得嘅,佢兩個都懵吓懵,都唔知道自己得唔得,以為老師開口就無得揀,一定要咁做,所以先至話得,到自己都 handel 唔到時就嚟同我講,叫我問吓你點解要調時間上堂。」


        佢兩個都懵吓懵吓??嘩,大佬,兩個都已經係中學生喇喎!一個已經中三,一個中一,唔想上堂果陣就記得咁清楚自己個 schedule,話俾我聽每日有咩做,一清二楚咁話俾我聽佢哋點忙點忙,到要去玩唔上堂時,又識打電話俾我改時間?佢哋要留學校有活動又識打電話俾我,叫我唔好嚟上堂,記住唔好同我補課,你唔講,阿媽唔會知 o架,呢刻又唔見懵吓懵吓!我話佢彈錯,佢哋唔鍾意就即刻粗聲粗氣駁嘴,仲郁手郁腳,成日都一拳拳打過嚟,我真係唔覺到佢哋係懵囉,佢兩條友仔喺妳面前就懵吓懵啫!我真係唔知妳兩個仔咁無能囉,連自己要 "學乜學物" 嘅時間表都唔知,況且啲細佬做錯嘢驚俾阿媽鬧,就梗係會 "禦膊" o架啦!如果真係懵吓懵嘅話,上星期佢兩隻嘢就唔識得打電話叫我早啲去佢度上堂,到咗佢屋企之後先知道原來佢哋專登要我同佢上樂理個時間撞,咁就大條道理唔話要上琴,無時間上樂理啦,因為佢知道個樂理老師唔會白白咁喺度等一個鐘先上堂,或者上完阿哥,再無條件咁幫個細佬再上多一個鐘。我同個細講,俾你阿媽知道實 "丙鑊金你兩個",個細嘅仲駁我嘴話阿媽都知道,仲讚佢哋 "絕計" o添!咁睇嚟佢兩個又真係幾識懵喎


佢:「佢哋朝早又要打波,返到嚟食完嘢就即刻上樂理,跟住又要學琴,咁就成日喇,咁唔駛出街啦!?總之你平日搵番一晚嚟同佢哋上堂啦!


        我聽完佢老豆咁講,我就知佢兩公婆喺呢件事上面點睇我,覺得我係先斬後奏,唔同佢哋講就私下夾硬迫佢兩條友仔去第二個時間上堂,無得選擇,到依家佢兩個覺得一日內做咁多嘢好辛苦先至爆出嚟俾佢哋父母知。唉,都係果句,如果有錢就即刻同佢阿媽講唔再教佢兩個仔!

        學 Louisa話齋,要將份人工睇成係一個 package,呢個 package除咗要做好自己工作外,仲會包括埋俾上師鬧、俾同事跣、俾客嘈 ……,總之只係 "睇錢做",做好本份後,俾人點鬧點嘈都當佢唱歌,總之有錢收就得喇!


        媽咪,如果妳真係睇到我呢篇 blog 的話,妳同我講一句鼓勵或者安慰嘅說話呀,真係一句就夠 o架喇,以前我有趁乜唔開心,只要同妳 "呻" 完之後,妳一定會安慰我,或者叫我從另一角度去睇件事,咁我個心就會舒服好多,好容易就放低咗件事,雖然我知道我要學識放低,但係真係唔容易做到,知易行難,有妳喺度,會容易好多!


沒有留言:

發佈留言