2009年3月18日星期三

椰子麻糬 "片片"

        噚日係禮拜二,係我比較得閒嘅一日,因為晚飯Louisa屋企食,所以唔駛準備夜晚果餐,晏晝又約咗媽咪以前晨運班師奶 friend飲茶,因為要俾啲台灣手信佢哋,所以連晏晝果餐都唔駛煮,見咁得閒,咪又玩嘢囉,揀咗個好簡單嘅麻糬波波嚟 "做實驗",因為我都幾鍾意食 A1 Bakery果隻麻糬波波,所以就上網睇搵唔搵到食譜試吓自己整,原來都有好多網友試過自己整,而我今次就參考咗網友 Kiu Bee 個食譜嚟整,佢原本係整芝士麻糬嘅,不過因為我唔食芝士,所以就改咗做椰子味


材料:
糯米粉      100克
木糬粉      15克
泡打粉      1/4茶匙
椰絲          30克
蛋              1隻
糖              40克
椰漿          50毫升
水              30毫升


原食譜可參考 Kiu Bee 麻糬芝士包 


        先將所有粉類過篩兩次,之後加入椰絲,拌勻後就加入蛋,再次拌勻,最後加埋椰漿同水拌成粉團,搓成湯圓狀,放入己預熱 180℃焗爐度焗約 8分鐘就OK喇,係咪好 easy哩!


        不過easy 還 easy,我都係失敗咗。係加入椰漿同水拌成粉團時,唔知係咪因為椰漿比較稠,同埋椰絲比較吸水嘅關係,啲液體完全唔見哂,唔夠攪勻所有粉,仲有好多乾粉溝唔埋,於是我就加多少少水落去,但唔知點解,一加多少少水就變得稀過頭,好似麵糊咁,完全無法搓成粉團,但我真係落咗好少水咋,我諗最多都只係得 8-10ml,就已經攪成咁,本來可以加番多少少粉補鑊嘅,但係我又驚加多咗粉要再加水,跟住水又再次多得滯,又再加粉,如是者仲攪到唔知變咗乜,所以就索性就咁用匙羹舀上去張牛油紙上面,焗完出嚟就變成咁:



        由麻糬波波變成麻糬 "片片"!所以其實上面所寫水嘅份量係唔準確,只係根據 Kiu Bee 個 recipe 裡面液體總和而計番出嚟,焗嘅時間都係少咗,因為咁薄唔駛焗好耐都已經得喇。  


        不過味道同口感都唔差 o架 ( 又用 "口感" 去形容,想俾阿蘇 "丙" 呀!) ,我同老豆都覺得好似老婆餅餡嘅味道,直情係十足十,連個 look 都好似。 照計老婆餅餡係用冬瓜茸整成 o架,唔通都有落椰絲去整?真係好似好似!



       噚日趁熱即刻食就比較軟糯,今日因為攤凍同比較乾身,食落就更加似 A1啲麻糬波波,所以其實應該係成功 o架!下次再有咁嘅情況,諗真係要用茶匙逐羹逐羹咁加水先至穩陣喇。


沒有留言:

發佈留言