黑椒雜菜炒腸粉

材料：
腸粉
椰菜
冬菇
大荳芽
蒜茸

調味料：
蠔油
黑椒醬
鹽
糖
生抽
老抽
紹酒

        冬菇先用水浸軟，去蒂、洗乾淨後切粗絲；椰菜洗淨後切絲備用；大豆芽摘去根部，洗淨後汆水備用。燒熱油鑊，放蒜茸同冬菇落鑊爆香，之後加入大豆芽，灒酒，再落埋椰菜一齊炒至軟身，盛起備用。再加少少油落鑊，將腸粉炒一陣間，跟住就加入蠔油同黑椒醬，略為兜勻後，就將雜菜回鑊，並加入剩低嘅調味料，炒番熱及兜勻調味後即可上碟。

        啲雜菜好爽口，腸粉又出奇地滑，同食蒸腸粉無分別，黑椒汁又夠惹味，第一次試炒就已經有番咁上下，真係非常滿意！

 

 

P.S.  將大荳芽汆水有幾個好處：

1. 可去除豆腥味。
2. 無咁容易 "標水"。
3. 可以令粒豆軟啲，喺鑊度唔駛煮咁耐。

        不過記住唔好汆水太耐，否則大荳芽就會過腍，唔夠爽口 o架喇。