2008年7月26日星期六

黑麥包

        早前同Lily傾謁講起,蘇施黃喺佢個電視節目 "一粒鐘真人show" 度介紹過一間 cafe 叫做 "Pumpernickel",原來佢一早已經幫襯過,仲話幾鍾意果度嘅環境。我之所以提起呢間舖,係因為喺個節目度見到阿蘇介紹嘅食物都好吸引,尤其係麵包,屬於高纖硬包類,嘩,開正我個瓣啦!於是就同 Lily 傾吓,因為佢都係嗜包之人。


        點知有一日佢嚟學琴果陣,佢買咗個 "招牌包" 俾我試,嘩,試過之後真係一試難忘,因為我一向都鍾情於歐陸麵包,特別係硬麵包,所以對佢特別有好感。




        其實間 cafe 嘅店名 "Pumpernickel",正正就係指德國地道特產黑麥包。呢個黑麥包果然係招牌貨,"檸些Bu筒"。首先個包拎上手已經有"好墜手"的感覺,比一般麵包特別重身,因為用黑麥粉做出嘅麵包,texture係比較密,所以會比較重身。外皮非常煙韌,但又唔似得硬豬仔包個皮咁硬,而且佢仲有一種好特別嘅橘子味道,好清新,唔知係咪落咗橙皮或者檸檬皮之類呢?水果之中,我特別鍾意橘子類,再加上一些種籽仁,口感特別豐富香口,所以呢個黑麥包有齊哂我鍾意嘅元素。


        有次行開金鐘,見時間又差唔多接近 6:00pm,於是便到 Pumpernickel 碰碰運氣,睇下仲有冇呢個黑麥包買,因為接近呢個時間所有麵包都會有8折,可能好快就俾人買哂,點知俾我見到仲有幾個喺度,當然立即叫店員俾兩個我啦,其中一個係買嚟俾 Winnie 試嘅,有好野梗會同好友分享啦,我唔會獨食嘅。Winnie 試過都話唔錯,哈哈,都係果句,佢都話得唔錯就真係唔錯o架啦!所以我覺得個包係貴得有價值,8折咗之後又唔係真係太貴啫,10蚊有找,起碼比起 Little Mermaid 啲包平得多啦,而且又夠飽肚,所以連我咁孤寒都捨得買食就知有幾好食啦,如果媽咪係度,佢試過都一定話好食啫。