2009年11月28日星期六

麵豉排骨蒸南瓜

        今晚呢個餸唔難整,而且又好好味,算係我鍾意嘅菜式之一。首先,我係勁鍾意食南瓜囉,鍾意佢清甜嘅味道;其次就係排骨蒸出嘅肉汁被南瓜吸引,所以南瓜就變得更加美味。



        其實,我今晚整呢個餸都係為咗試一試 Winnie 早前俾我嘅有機麵豉醬,佢話佢媽咪食過呢隻麵豉之後,就唔肯再買其他麵豉,因為呢隻有機麵豉好香濃。


 



不過,呢隻有機麵豉同傳統嘅中式麵豉唔係好同,好深色,反而
啲似日本嘅赤味噌。


 


材料:
排骨 ( 腩排 )
南瓜
蔥花


醃料:

豉油
麵豉
紹酒
粟粉
麻油


- 排骨洗乾淨、瀝乾水,用醃料依醃肉基本法醃好。


- 南瓜去皮、去瓤,洗淨後切大粒。


- 將南瓜鋪好喺碟上,之後再喺南瓜面放上醃好嘅排骨,就可以拎去蒸。


- 隔水蒸好後,灑上蔥花,再蒸多一分鐘就攪掂。


黃豆粉紅豆雪芳蛋糕 Kinako & Azuki Chiffon

       前幾日整過黃豆粉鬆餅後,今日都係繼續用黃豆粉整蛋糕,不過今次唔係整 muffin 喇,而係輪到整雪芳蛋糕。


        其實今日整呢個蛋糕係有目的嘅,因為聽日係伯伯嘅生日,而佢今年嘅生日應該係成世人最唔開心嘅一個生日,因為要喺醫院渡過囉!平時喺醫院都 "無啖好食",所以我特登整個蛋糕俾佢,都叫做象徵式有個生日蛋糕,同埋唔駛齋食醫院飯餸咁慘



材料:
蛋白              110克
黃糖              40克
檸檬汁          1/4 茶匙
粟粉              5克
蛋黃              40克
熱水              36克
植物油          36克
低筋麵粉      50克
黃豆粉          10克
紅豆餡          70克


以上材料份量可做 17cm 雪芳蛋糕一個。


食譜係參考Ozawo Noriko 嘅《戚楓蛋糕秘法傳授》。



 


- 先將麵粉過篩 3 次;黃豆粉用白鑊炒至焦黃色。



匙羹裝住係未炒過嘅黃豆粉,左邊焦黃色果啲係已經炒好
嘅黃豆粉。


 


- 用電動打蛋器以低速將蛋白打至起泡,之後加入粟粉及檸檬汁,用高速打至
  企身,做成蛋白霜。


- 蛋黃同糖用打蛋器拌勻,然後加入水及油混合好。


- 篩入麵粉同黃豆粉,拌勻成麵糊,然後輕手拌入紅豆餡。


- 蛋白霜分次拌入麵糊內,以切拌方式輕手拌勻所有材料。


- 將已拌好麵糊倒入雪芳模內,然後放入已預熱 160 °C 嘅焗爐內焗約 25 分鐘
  至熟。


- 出爐後立即將蛋糕倒扣放涼,攤凍後脫模。


 



3 個蛋糕出爐喇! 嗯,乜睇落咁似貓頭鷹嘅!?


 




 


        圓形果個蛋糕就無食到,因為留俾伯伯嘛!我淨係食咗方形果個。可能因為方形呢個係最細嘅關係,所以外面焗過火,比較韌同嚡,但裡面一樣好濕潤、好鬆軟呢!我諗圓形果兩個應該無呢個問題,因為 size 比方形果隻大好多,焗嘅時間應該啱好。蛋糕有好濃紅豆味,但就唔係好覺有黃豆味,可能份量少啩,下次再整時可以落多少少。


        其實今日整呢個雪芳蛋糕係唔只跟一個食譜嚟做,而係綜合幾個食譜嘅 "集大成"!因為伯伯有糖尿病,唔可以食太多糖份,所以食譜裡面嘅份量係一定要減少,而且仲要改用黃糖,會無咁甜。另外,打蛋白時我又唔落糖,但無糖又可能會導致蛋白霜難打發及保持穩定性,所以要加入檸檬汁去打發,咁就需要參考另一個食譜先可以知道檸檬汁用量比例。咗檸檬汁同粟粉後,蛋白不但容易打發咗,而且放咗好耐都無變軟,仲係好挺身,加上我又將打起嘅蛋白霜放番入雪櫃保持冷凍,所以即使打好蛋白霜之後先至打蛋黃同秤其他材料,蛋白霜都完全無走樣,依然夠挺身!以前為免蛋白霜消泡軟化,所以習慣都係先打蛋黃後打蛋白,咁樣中途一定要洗乾淨個打蛋器先可以再打蛋白,依家跟 Ozawo Noriko 嘅方法去做,就可以先打蛋白後打蛋黃,慳番洗少次打蛋器呀!


 


Notes:
- 如果唔想麻煩,可直接選用日式黃豆粉,因為本身已經炒過,所以顏色呈焦黃
  色。


- 根據第三個食譜,蛋黃係唔駛打至發白,否則就會失去蛋香味。


- 蛋白盡量保持冷凍,咁就比較容易打發。


- 根據 Ozawo Noriko 嘅食譜,如果蛋白霜變軟時,可以用打蛋器再次打發。


- 檸檬汁可用他他粉 ( cream of  tartar ) 代替。


2009年11月25日星期三

北芪黨參靈芝湯

        早陣子,喺電視度睇到一個節目,請咗一位中醫師接受訪問,之後就介紹咗幾款有助增強抵抗力嘅湯水,其中一款材料非常簡單,係用黨參、靈芝、蜜棗同雞肉嚟煲湯。咁我見上個禮拜又啱病完,今日就試試煲呢個湯嚟飲,補一補佢!


        不過,因為煲雞湯 "無益",所以我就改用瘦肉嚟煲,仲加埋黨參個 "好拍擋" 北芪落去 o添,應該冇乜大礙,因為我記得之前陪媽咪去廣華醫院中醫部覆診時,個中醫師話最好煲冬蟲草飲,咁因為我哋不嬲都唔係啲咩大富之家,根本負擔唔起日日飲蟲草湯咁奢侈,於是媽咪就問醫師如果唔用冬蟲草的話,可以用咩代替,醫師就話每次都落幾片北芪,都會有一定功效。其實媽咪當時身子已經虛弱得好厲害,醫師都建議用北芪煲湯飲,所以我諗藥力應該唔會太強,我飲咗應該都無事啩!



材料:
北芪
黨參
靈芝
蜜棗
瘦肉


- 瘦肉洗淨、汆水,之後用水沖去多餘血水,備用。


- 除蜜棗外,所有藥材用暖水浸一粒鐘,之後洗乾淨。


- 將所有材料一齊落水度煲,之後依照真空煲用法將湯煲好。


- 飲用前加鹽調味。


黃豆粉鬆餅 Kinako Muffin

    噚日朝早起身後難得清閒,見無乜特別嘢要做,於是又開爐整嘢食,整咗我呢生人第一個和菓子 — 黃豆粉鬆餅。



    一直都以為和菓子只係指果啲日式精緻甜品,好似草餅呀、大福呀、雪莓娘等等,但自從喺圖畫館借過啲和菓子食譜返屋企睇完之後,先知道原來係包括埋蛋糕、餅乾,甚至係鹹味點心 o添,我真係孤陋寡聞呀!!


    因為今次係我第一次整和菓子,當然梗係揀個最簡單易做嘅入手啦,所以我就選擇整呢個黃豆粉鬆餅,話哂都係做慣做熟muffin 嘛!


 


材料:
低筋麵粉   120
黃豆粉   30克
泡打粉   1茶匙
牛油   60克
糖   50克
雞蛋   1隻
水   80毫


以上材料份量可做中 size 鬆餅 4 個。


食譜出自櫻井景子嘅《和菓子‧和甘味 — 秋冬篇》。




- 先將牛油於室溫放軟;麵粉、黃豆粉同泡打粉過篩,均勻混合。


- 牛油打成忌廉狀,之後分 2 - 3 次加入糖,拌勻成牛油霜


- 雞蛋拂打成蛋液後,分 4 - 5 次加入牛油霜內拌勻。


- 將 1/3 份粉類加入蛋糊內,拌勻後再倒入 40 毫升水混合。


- 當所有材料都拌好之後,再重覆多一次以上步驟。


- 將最後剩低果 1/3 份粉類都加埋入麵糊內,直至麵糊拌到濃稠。


- 將麵糊倒入紙模內至七成滿,放入已預先預熱至 180 °C 嘅焗爐內焗約 30 分鐘
  至熟。




每個小鬆餅都焗到脹卜卜,仲有一般鬆餅嘅裂紋 o添!


 



我另外做咗一個大嘅要嚟做 lunch,因為焗嘅時間比細 size 果啲多
一倍有多,所以顏色焗得比較金黃,而且我仲貪得意灑咗少少
黃豆粉上面一齊焗 o添!


 


    初初食第一口時,覺得味道怪怪哋,好似好 "奶" 咁,唔係咁鍾意果味,但當然唔會啦,因為我根本無落奶去整。食完之後慢慢吓,後尾先發覺所謂嘅奶味,其實係好濃好濃豆漿味至真,所以食果陣先至會覺得怪怪咁,因為好唔慣 "食" 鬆散嘅 "固體豆漿" 呀,嘻嬉!


 


Notes:
- 原食譜係用牛奶整,只係我自己用清水代替。


- 我用黃豆粉係中式嘅生黃豆粉,並唔係日式果隻炒熟嘅黃豆粉,但櫻井老師
  食譜內並無標明用邊一種。或者下次再整時,試吓將啲黃豆粉預先炒熟咗佢,
  睇吓成品有無分別。


- 整好之後嘅麵糊比一般西式鬆餅麵糊濃稠好多,而且帶有少少筋性,好難將佢勺
  入模內,心諗以為自己攪拌過度以至起筋,但焗完出嘅成品又唔會死死實喎,
  都係一樣咁鬆呀,唔怪得之食譜內相片所見,都要用兩隻匙羹幫手將麵糊放入紙
  模裡面啦!


2009年11月24日星期二

經典薄荷朱古力蛋糕 Gâteau classique au chocolat à la menthe

        突然發覺,原來近排好少用朱古力嚟整嘢食,無整咁耐,好掛住個經典朱古力蛋糕呀,真係好好味 o架,百吃不厭,好鍾意佢超濃郁嘅朱古力味,試過嘅朋友都讚不絕口。

        好,就整番個嚟歎吓先! 不過今次比較特別,我特別用咗薄荷朱古力同薄荷酒嚟整呢個蛋糕。



2009年11月23日星期一

新鮮有機唐生菜 & 佛手瓜

        前幾日,老豆又喺農場度啲唐生菜同佛手瓜返嚟:



啲生菜真係好靚,又新鮮又翠綠。


 



啲佛手瓜好得意呀,個個都好細個,你睇,Q 版佛手瓜
仲細過我隻手掌呀!


 



        老豆話,佛手瓜好嫩,唔駛批皮、唔駛切核,就咁切開就可以煮得啦,所以我就簡簡單單咁用少少薑片、蒜茸清炒就算,要食出真味嘛!至於生菜就用嚟滾湯,整咗生菜鯪魚肉湯。


        生菜好爽、好滑,仲好清甜 o添!至於佛手瓜,果然好嫩,不過就比想像中無咁甜喎!


2009年11月21日星期六

提早收禮物!?

        嘩,咁早就收到聖誕禮物!?唔係,講笑啫,我不嬲對聖誕節都無乜感覺,自從皈依咗之後就更不加理會啦!


        早前搭 Gordon 幫我拎條佛珠去配番個佛珠頭,點知話咁快就攪掂咗,星期一就拎返上嚟俾我,之後佢突然間話俾對新鞋我,我覺得好出奇,原來佢話對布鞋其實已經買咗好耐,不過因為佢勁鍾意行山,所以多數都著住對跑鞋出街,無乜機會著呢對布鞋喎,而且我哋兩個都著相同 size 嘅鞋,所以佢就俾咗我著,費事咗佢喎!



        打開個盒一睇,原來係對 "詼諧" ( 灰鞋 ) 嚟,個顏色都幾啱心水喎!咁啱我平日著開果對布鞋又已經著到爛,準備 "退役",咁就搵佢嚟補上啦!不過見到係 Levi's,應該都平極有限,下次我整好個經典朱古力蛋糕俾佢時都要問吓佢幾錢,俾番佢至得喇!


羅勒 & 檸檬薄荷

        上次買果兩盆香草:羅勒薄荷,雖然早前已寄居Louisa 個 office 度,由 office 個阿姐悉心打理,但最終都難逃一劫,早已往生。Louisa 可能見到我唔開心啦 ( 無法啦,我真係一個唔識放低嘅人 ),後尾佢花墟再買過兩盆番嚟送俾我,我當時真係好開心 o架,好似有番生氣咁!




        其實呢兩盆羅勒同檸檬薄荷都買咗返嚟幾個月 o架啦,但係我同 Louisa 講,我唔敢即刻拎返屋企住,因為天氣仲係好熱,我驚又再次殺生呀,所以就一直都擺喺佢屋企,由 Arthur 暫時照顧住佢,Arthur 都幾好心機咁照顧佢 o架,每日都為佢淋水,你睇兩盆香草都 keep 得咁靚就知啦!






        呢排見天氣正式開始凍 ( 其實都唔係開始凍,係已經好凍,起碼我都凍病咗囉 ),我就試吓拎返屋企,自己親手打理番囉。 So far 暫時呢幾日都 OK 嘅,每日我都有幫佢哋淋水同噴水,晏晝又會拎佢哋去窗邊曬吓太陽,希望不負 Arthur 之前嘅一番心機啦!


        再次多謝 Louisa 同 Arthur,thank you so much !!


2009年11月20日星期五

卒之都打敗仗喇!!

        成世人都好憎冬天,又凍、又乾,攪到個人好唔舒服,簡直係恨之入骨!!


        凍:手腳冰冷,唔願郁,朝早起咗身都唔願離開張床,攪到個人鬼死咁懶。


        乾:手腳爆哂拆,裂到流哂血,痛死!上次整玻璃曲奇Winnie 都見識過,親眼目睹慘況,差啲血染曲奇麵糰!

        每年我都例必會講嘅說話:冬天有咩好!!

        卒之,喺星期二果晚,即係最凍果幾日,卒之打敗仗,發燒加頭痛,真係慘過 "梁天來"!

        發燒:全身發滾,周身骨痛,肌肉酸軟無力,渾身不自在。


        頭痛:無哂心機,乜都唔想做,簡真痛不欲生,連瞓都瞓唔到,食藥又無用,"典" 床 "典" 蓆,都唔知點好!

        喺呢兩種平生最怕嘢一齊夾攻下,今次仲唔死?死未!


        好彩老豆返嚟煲咗兩次盒仔茶俾我飲,先至退咗燒,個人先舒服番啲咋!不過,唔係呢次病一病,都無機會俾我瞓番夠本。平日根本係唔夠瞓,呢兩日真係乜都補番哂數,幾乎一日 24 小時係咁瞓、係咁,足足瞓哂 48 小時,是因禍得福嗎?連社區中心同老人中心嘅堂都請哂假,一向都唔鍾意請假,病極都要死頂、死撐嘅我,呢次都唔到我唔請假喇,可知我真係幾咁辛苦呢!原本應承好 Gordon 整個 Classic Chocolate Cake 俾佢同佢媽咪,卒之都無整到,佢打電話問我係咪有整蛋糕,我都唔好意思咁同佢講聲 sorry,因為病咗無整到,希望星期一會精神啲,補做番個蛋糕俾佢啦!


         病緊嘅時候,最掛住係邊個,唔駛諗,梗係媽咪啦!我仲發夢見到佢煮米粉俾我食 o添!究竟,我仲有冇機會食到媽咪親手煮嘅米粉呢?


2009年11月17日星期二

甘荀眉豆粟米粥

        今晚教完 Arthur 同 Genevieve 之後,無留喺佢哋屋企食飯啊,因為是日初一嘛!所以我上星期已經一早同 Jovi 講咗,叫佢唔駛預我果份喇!


        因為教完佢哋返到嚟都已經好晏啦,所以今朝一早就用真空煲煲定啲粥,咁返到嚟唔駛煮,煲番熱啲粥就可以食啦!



材料:
紅蘿蔔
眉豆
冬菇蒂

罐頭粟米蓉
即食燕麥片
珍珠米


- 眉豆洗乾淨,用水浸過夜,第二朝將水倒去,再過一次清水,備用。


- 紅蘿蔔去皮,洗淨後切粒。


- 冬菇蒂浸發後,剪去底部,洗乾淨後切絲。


- 先將紅蘿蔔同冬菇蒂凍水落煲,之後將水煲滾。


- 水滾後,先落米煲一陣,之後就落埋眉豆。


- 跟住就照常用真空煲方法繼續煲。


- 翻煲時,當粥煮番滾後,就加埋粟米蓉同麥片落去拌勻,再次煲番滾就攪掂,加
  鹽調味就食得。


 



今晚除咗食粥之外,仲有饅頭紅豆煎餅呀!


2009年11月16日星期一

蒸饅頭 ( encore 篇 )

        噚日搭緊地鐵去廣播道時,到咗樂富站準備上去 lobby 出閘時先發覺有個 missed call,原來係個細佬 call 過我,可能因為我無接到佢電話,佢就 sent 個 SMS 俾我,話俾我聽佢兩個上唔到堂,叫我唔駛去佢哋屋企喇。嘩,好彩我仲未出閘啫,如果唔係就真係嬲死我!


        咁我咪上番車直接返屋企囉!原定計劃係諗住放工返屋企後,整番熱啲隔夜餸食就算,但因為提早咗放工,返到入屯門都只係四點零鐘,見時間尚早,咪順道走去街市買餸煮飯囉!所以啲隔夜餸就變咗留番今晚食,亦正因為咁樣,今日就變得清閒,專登瞓晏啲先起身,洗完哂衫晾好之後,就開始郁手整饅頭喇。


        因為之前已經整過一次饅頭 o架喇,加上早幾日先至啱整完紅豆煎餅對於搓中式麵糰都叫做有小小經驗啦,所以今日搓個麵糰比較易上手,加上上次Louisa 屋企再整燕麥包時,佢教咗我同 Winnie 點樣搓麵糰,佢仲教咗我哋 "撻" 個麵糰,咁我今日咪即刻試吓囉,果然真係慳好多力,仲易起筋好多 o添喎!所以今次搓呢個麵糰都幾順手,好滿意呢!



        上次只係用咗食譜材料一半份量去整,今次就用足 500 克麵粉,一次過整定多啲放喺冰箱,隨時拎出嚟蒸番熱做早餐或午餐都好方便。


 



        上一次整果陣時,我都同 Louisa 傾過,話啲顏色好黃,唔夠白淨,原來佢整奶皇流沙包時都有遇到呢個情況,後來佢返去請教「煤氣」啲導師,原來中心用嘅係「美玫牌」麵粉,整出嘅成品會白淨好多,之後佢都有同佢家姐講呢個問題,後尾家姐喺佢自己屋企附近買到「美玫」麵粉,就送咗一包俾我,今日我整呢啲就係用佢嚟整 o架啦!不過硬係覺得仲係唔係好夠白,咁當然,比起上次果啲,今次呢啲係白咗好多,不過見過街賣果啲真係好白 o架喎,唔通係漂過!?另一個原因,可能係因為包「美玫」粉唔夠 500 克,唯有溝咗幾十克 "來佬貨"「Gold Medal」all purpose flour 落去,唔知呢小小粉有冇咁大影響力呢!


 



哋睇,呢幾隻幾樣衰!可能係我捲嘅時候捲得唔夠實,所以蒸熱
膨脹時就爆番開!


 



        蒸好之後,啱好係 tea time,所以順便沖杯茶俾媽咪,等佢可以同我一齊 "飲啖茶、食個包" ,不過媽咪今日個 tea set 係 cross over,北方饅頭加一杯 English breakfast tea!


金針雲耳炒絲瓜

        呢個係我噚日即興之作,點解咁講呢?因為平時習慣逢禮拜五返屋企之前,都會去街市買定禮拜六,咁禮拜六就唔駛專登落街買餸,教完琴之後就可以 stay 喺屋企做嘢。


        不過,因為前日唔駛返老人中心教合唱團,所以無出到街,到挨晚教完 Ryan 之後又已經好夜,街市都收哂檔,根本無餸賣;到咗禮拜六果日,天氣又凍咗好多,更加唔願落街買餸啦,所以就匿喺屋企,死諗爛諗,希望諗到一樣餸出嚟係可以利用屋企嘅 "存貨",咁就可以 "逃過一劫",唔駛落街捱凍啦!當然,我唔會因為自己嘅偷懶而要我老豆食罐頭做餸啦!


        哈,吓,點知真係俾我諗到喎,真係開心到死呀! 咪就係呢碟金針雲耳炒絲瓜囉!金針、雲耳係乾貨,屋企有 "存貨" 都唔出奇,之但係連絲瓜都有 "存貨" 就真係出奇啲喇,查實係我老豆上個禮拜喺農場拎返嘅,原本佢話自己煮嚟食,點知煮咗成個禮拜都未煮,仲放喺雪櫃度,咁就益咗我唔駛落街買餸喇!而我屋企個冰箱就長期都會有鮮腐皮雪定喺度,方便隨時解凍後就可以煮齋,於是我就加埋佢落去一齊玩 "即興","jam" 咗呢碟餸出嚟。



材料:
絲瓜
金針
雲耳
鮮腐皮
蒜茸
薑絲
紅椒


調味料:


雞粉
蠔油


- 金針同雲耳先用水浸發、洗淨,之後汆水、瀝乾水份,備用。


- 腐皮輕輕略沖洗,然後撕成細塊。


- 絲瓜刨去硬皮後切件。


- 燒熱油,先爆香蒜茸、薑絲同紅椒,之後加入絲瓜一齊炒。


- 加入小量水,冚鑊蓋將絲瓜稍為煮至軟身。


- 之後加入金針、雲耳同調味料,兜炒後再加埋腐皮落鑊,炒勻所有材料。


- 最後灑上小小麻油,兜勻,熄火,上碟。




Notes:
- 將
金針、雲耳汆水,可去除 "" 味。

- 絲瓜毋須煮得太腍身,可保留清甜、爽脆 口感。


- 鮮腐皮落鑊後切勿煮太耐,如果唔係就會煮到爛哂。


2009年11月13日星期五

紅豆煎餅 Chinese Fried Red Bean Cake

        今日呢個紅豆煎餅,其實係為 Lily 而整嘅。


        話說早前佢俾咗張剪報我,係一個食譜嘅,佢話睇到幅相好似好好食咁,如是就剪低俾我,叫我有時間試吓整,咁我就應承佢,如果整咗就通知佢,俾佢試吓,睇吓係咪真係咁好食。


        淨係睇幅相都似模似樣,呃得吓人 o架,呵呵!



材料:
低筋麵粉      60克
中筋麵粉      240克
泡打粉          3克
糖                  30克
速溶酵母      4.5克
水                  160克
白油              6克
紅豆餡          250克


以上材料份量可做約 5 - 6 個煎餅。


食譜係嚟自 lovecook2.mysinablog.com


 


- 先將糖溶水度,然後放入微波爐內 "叮" 約 30 秒至微暖,之後將小量糖水同酵
  母混合,拌勻備用。


- 將麵粉同泡打粉混合好,加入酵母糖水,拌勻,之後再逐少逐少將剩低嘅暖水加
  入,攪拌成麵糰。


- 麵糰搓成形後,加入白油搓勻,然後冚上保鮮紙,發酵 10 分鐘。


- 之後將麵糰搓至光滑,然後分成每個約 80 克重嘅小麵糰;紅豆餡就分成為約 50
  克一份。
 


- 用擀麵棍將小麵糰擀成薄麵皮,包入紅豆餡,收口後將麵糰稍為擀扁。




- 包好餡後,將麵糰再次冚上保鮮紙,靜置 30 分鐘。


 



- 燒熱油,用慢火將麵糰煎約 10 分鐘至熟,兩面煎至金黃色就可以盛起。 


 



攪掂,可以上碟影相!係咪都幾吸引呢!


 



金玉其外呀!你哋睇,我啲包餡技術幾差勁,啲餡歪埋一邊呀!!


 


        每次做嚫包餡麵糰我都唔識收口,整嚟整去都埋唔到 "欄",卒之咪攪到啲餡分佈唔平均囉!所以點解一開始我就話睇個樣都呃得吓人囉!嚟都要請教Louisa 佢點樣將個流沙包收口先得喇。



Notes:
- 白油即係固體菜油,如果屋企無的話,可以用牛油代替。


- 根據原食譜,可用奶代替水加入麵糰。 


- 原食譜係用中式紅豆沙,但因為我之前整落啲日式紅豆餡,貪方便照用。


- 煎嘅時候,一定要用慢火煎,如果唔係,個紅豆餅就好易煎燶。


- 食譜提議,煎麵糰時可冚上鑊蓋半焗半煎。