兩款磅蛋糕

        上星期接到網友嘅 order 要兩條 pound cake，咁因為有充裕時間俾到我去整，同埋整 pound cake 唔需要太花巧，所以就應承咗對方，今日交收。

 

 

班蘭蛋糕

早一、兩個月前，老竇個 friend 一早 order 定 9 月要個班蘭蛋糕做生日蛋糕，星期五晚已經起咗貨喇！

上次整個黑森林時，因為天氣太熱，抹 cream 抹到嗌哂救命，一路抹
就一路瀉，就算喺屋企整到靚靚，到拎出街都好危險，所以今次
叫老竇同個 friend 講明唔會抹 cream，好彩對方
都唔太鍾意食 cream啫！

話就話唔抹 cream，但就為咗個 decoration諗爆頭，好彩依家
出到嚟個效果都唔錯，都幾吸引呢！

黑森林蛋糕

又試感冒失聲喇，雖然今次唔係太嚴重，但係就成身攰 “lai lai”，周身唔自在，仲要接老竇個 friend 個 order 整黑森林蛋糕㖭！

 

今日整蛋糕真係心不在焉，加上天氣又熱到爆，啲
cream 一路抹一路瀉，真係嬲到我呢
~ ~ ~ ~ ~ ~！！

後尾求求其其咁抹咗一 “浸” cream 先，然後即刻放入雪櫃雪凍，
跟住就走去瞓咗半粒鐘休息，瞓醒之後再抹過，
果然好好多，無咁瀉身喇！

個樣都過得去吧！整咁多次蛋糕，今次係最無心機、最無耐性嘅一次呀！

芒果慕斯蛋糕

老竇最近幫我接咗個 order 整生日蛋糕，主人翁指定要整 mango mousse cake，因為佢好鍾意食芒果。我一聽到呢個 order 就真係頭都大哂，呂宋芒都已經唔係當做，就算有得賣都唔慌靚啦，其他品種嘅芒果又得個甜字，完全唔夠香！

 

本來我都諗住問對方轉其他口味得唔得，但 Winnie 話對方開得口就梗係好想食芒果啦，Winnie 話佢之前買落好多芒果，一早打成果蓉放入冰格，佢可以讓俾我整蛋糕。

 

噢，生日主人翁有芒果蛋糕食，真係要多謝 Winnie 割愛呀！因為當日咁啱佢都要整三個 mango mousse cake 俾阿爸擺生日酒呀！咁佢依家其中一個蛋糕就要改成用榴槤整，真係唔好意思喇！！

 

Winnie，唔該哂！！

除咗用芒果蓉整 mousse，仲去超市買多兩個新鮮芒果切粒鋪面裝飾。
雖然都係呂宋芒，但無論香味同食味同當做時真係差好遠呀！

因為一般 mousse ring 都比較矮身，所以就叫老竇走去買塊膠片
返嚟團邊，加高後就可以整到面頭嗰個啫喱層喇。

今次能夠順利成功整到靚靚 mango mousse cake，真係要多謝 Winnie，
除咗因為肯割愛之外，喺整呢個慕斯蛋糕上佢都俾咗唔少 tips 我，
因為佢每年都會為家人同老友整幾個 mousse cake 㗎，
簡直就係熟手技工啦，哈哈！！

雪地黑森林蛋糕 Snowy Land Black Forest Cake

    早前接咗老豆個農場 friend 嘅 order，幫佢做個黑森林蛋糕，要今日做好交俾佢，因為佢對仔女都係呢個月生日 o架，我諗今晚佢哋應該會攪個 birthday party。所以我噚日好忙呀，一早起身食完早餐就入元朗老人中心教 choir，落堂就即刻趕返嚟開工；到夜晚七點鐘就再出去教 Ryan，之後返到嚟繼續執埋啲手尾，做埋少少裝飾，到夜晚 10:30 pm 先至攪掂哂食 dinner。

    今次呢個蛋糕無賺錢 o架，只係收番材料成本，因為平時老豆都成日喺農場度拎啲蔬菜、生果之類返嚟，當打個和啦！

    雖然屋企長期有朱古力存貨，但今次都係第一次整朱古力蛋糕咋！我參考咗 Tony Wong 嘅做法，朱古力海綿蛋糕用分蛋法整；而朱古力忌廉就雪過夜先至打發。

朱古力海綿蛋糕

材料：
蛋黃   138 克
蛋白   115 克
糖   115 克
低筋麵粉   27 克
可可粉   31 克
粟粉  27 克
油   58 克

- 所有粉類過篩 3 次；蛋黃加 57 克糖拌勻。

- 蛋白用電動打蛋器打至起泡，將剩餘嘅 58 克糖分次加入，打至企身。

- 將 1/3 蛋白加入蛋液內輕手拌勻，之後篩入粉類拌成麵糊。

- 將少量麵糊同油混合，拌勻；其餘 2/3 蛋白加入麵糊內拌勻。

- 將已拌油之麵糊倒回主麵糊內，拌好，倒入已包好牛油紙嘅蛋糕圈內。

- 放入已預熱至 180 °C 嘅焗爐內焗約 25 - 28 分鐘。

- 出爐後將蛋糕倒轉攤凍。

車厘子糖水

材料：
罐頭黑櫻桃 ( 車厘子 )
櫻桃酒 ( Kirsh )   24 克

- 將車厘子隔清糖水，瀝乾備用。

- 取 100 克車厘子糖水與櫻桃酒拌勻即成。

車厘子忌廉

材料：
淡忌廉  192 克

糖 14 克
櫻桃酒  8 克

- 淡忌廉同糖混合，用電動打蛋器打起。

- 加入櫻桃酒，繼續打至企身。

朱古力忌廉

材料：
淡忌廉   365 克
糖   15 克
朱古力   65 克

- 淡忌廉加糖煮滾後熄火，倒入朱古力中，慢慢攪拌至朱古力完全溶解。

- 攤凍後放入雪櫃雪一晚。

- 第二日用電動打蛋器打至企身。

組合

- 蛋糕切去表面硬皮，之後平均切成兩片。

- 車厘子糖水倒入噴壺內，將糖水噴濕蛋糕底面兩面。

- 喺其中一片蛋糕上抹上車厘子忌廉，然後均勻放上車厘子粒。

- 再抹多一層車厘子忌廉，之後放上另一片蛋糕。

 

- 用朱古力忌廉抹上蛋糕面及側面。

- 喺忌廉面撒上朱古力碎或朱古力粒，再加以裝飾，完成。

以上材料份量可做 8 吋圓形蛋糕 1 個。

刻意撒上白朱古力碎及用結霜覆盆子造出雪地效果。

 

個人好鍾意呢塊金色生日牌，好有金屬 feel。

Notes：
- Tony Wong 話用分蛋法整嘅海綿蛋糕比全蛋法整嘅蛋糕較硬身，即使掃上糖水都唔
  會影響蛋糕質感。另外，朱古力忌廉雪過夜，口感會更加滑。

- 蛋糕噴上糖水，有保濕作用，令蛋糕保持軟身。

- 如果唔想有酒精成份的話，可以唔落櫻桃酒。

- 要做到結霜效果，先將覆盆子洗乾淨、抹乾水份，之後放上冰格保存，到用時拎出
  嚟自然有結霜效果，但只能維持短時間，因霜雪會喺室溫溶化。

    你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！