2011年4月26日星期二

復活節派對

        噚日一早去探完阿爺、阿嫲同表舅父後,就去 Louisa 屋企玩,當然唔少得 Winnie 同明仔啦!好友聚頭,梗係又試整嘢食啦!



首先出場,係 Louisa 整薯蓉湯,好creamy,
但又唔會太濃太膩,好!


 



呢個係集體製作Quiche Lorraine,餡料有煙肉、洋蔥、雞蛋、
忌廉同 mozerella cheese。


 



印象中應該係第一次食鹹批,味道唔錯,下次自己整吓先!


 



        呢碟就係明仔指定要我整俾佢食無錫排骨,個個都讚好食呀!Winnie 仲話下次要整雙份,俾份佢拎番屋企食喎!最攪笑仲係 Jovy,見到我整就即刻問我點煮,反正我有帶個食譜去,又有英文說明,我索性俾咗佢算數,估唔到連菲傭都咁欣賞喎!我今次專登買咗包紅麴米嚟整,顏色果然靚好多,望落個賣相都 prof. 好多


 



呢個係明仔同 Winnie 一齊整嘅黑森林蛋糕。


 



有冇覺得呢個黑森林蛋糕係個 A 貨呢?因為有人偷懶,唔願
整朱古力碎,咁咪求其灑朱古力粉喺面就算囉!


 



蛋糕包括咖啡海綿蛋糕、朱古力 mousse 同酒浸櫻桃,個人覺得
酒味過濃,食完後唔係好妥,Louisa 話我係第一個
食蛋糕食到醉嘅人!


 



明仔整好帶過去嘅綠茶豆腐布甸。


 



呢個布甸超正,又香又滑,不過豆腐味較濃,蓋過哂綠茶味,
如果再甜番啲就更加 perfect 喇!


2011年4月25日星期一

牛油果三文魚帶子焗飯

        早前買咗兩個牛油果,其中一個用嚟整沙律,剩番嗰個今晚又再用嚟整海鮮焗飯。



今次我有買到帶子整喇!


 



        除咗加入帶子,仲加埋洋蔥 o添!磨菇湯就改用火腿磨菇湯,
所以味道更加香濃。


 



        想知道材料同做法的話,請睇番之前嘅《牛油果忌廉三文魚焗飯》啦!


2011年4月24日星期日

雙色紅麴發糕

        聽日會去探阿爺、阿嫲同表舅父,所以今日專登整定個發糕帶過去俾佢哋。


        見上次整紅麴發糕都唔係真係發得咁勁,所以今次想試吓其他食譜,我揀blog 友琦♥橋媽媽個食譜嚟試,因為見佢個成品真係發得勁高、勁靚呢!



料:
粘米粉          150 克
低筋麵粉      60 克
泡打粉          6 克
梳打粉          1 克
砂糖              90 克
溫水              210 毫升
紅麴粉          4 茶匙
 

- 麵粉及泡打粉過篩後與粘米粉混合好;溫水與糖混合拌至糖溶。


- 糖水倒入粉料內拌勻成麵糊,然後平均分成兩份。


- 其中一份麵糊拌入紅麴粉。


- 先將白麵糊倒入內約四成滿,之後再將紅麴麵糊倒入至八成滿。


- 煲滾水,將模放上蒸籠,用大火蒸約 15 分鐘即可。


以上材料份量約可做發糕 6 個。


食譜參考自琦♥橋媽媽三色發糕



雖然今次係發得好過上次,但係始終都發唔到好似 "東南西北" 咁款!


 



啱今日整兩樣嘢都無用到蛋,係全齋,所以即刻諗到
要同媽咪一齊分享。


 


Notes
- 粘米粉毋須過篩,因粉粒本身已經非常幼細。

- 蒸糕時必須要用大火才可做到靚靚裂紋。


- 發糕蒸好後須趁熱脫模放涼,否則糕底會因積聚水氣而變得過濕。



      你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


杏仁乾果燕麥曲奇 Almond, Dried Fruit & Oat Cookie

        今朝起咗身之後無乜嘢做,無所事事,即刻又試 "病發" 想搵嚟整,見好耐都無整過燕麥曲奇,於是就決定整佢。


        上次整嗰個燕麥紅莓杏仁曲奇係參考《日嚐甜品》而做,今次想試吓用其他食譜嚟整,睇吓效果有咩唔同,最後就參考《香港人氣甜品》裡面個食譜。



材料:
固體菜油          50 克
糖霜                  20 克
黃糖                  30 克
原粒燕麥片      60 克
椰絲                  25 克
低筋麵粉          65 克
梳打粉              1/8 茶匙
糖漬橙皮          35 克
紅莓乾              35 克
杏仁片              25 克
水                      約 30 毫升
即食燕麥片      適量


- 杏仁片放入焗爐用 140 °C 焗 15 分鐘至香;低筋麵粉及梳打粉過篩 3 次。


- 將固體菜油、糖霜及黃糖混合,打至軟滑,拌入粉類、原粒燕麥片同椰絲。


- 加入乾果及杏仁片拌勻,之後加水搓成麵糰。


- 將麵糰平均分成 12 份,搓圓、按扁,然後沾上即食燕麥片。


- 將麵糰放上已鋪入爐紙嘅烤盤上,放入已預熱至 190 °C 嘅焗爐內焗 15 分鐘即
  成。


以上材料份量可做直徑約 6 厘米曲奇 12 塊。


食譜參考自鄭慧芳、胡玉玲編著嘅《香港人氣甜品》。




焗緊嘅時候已經聞到好香椰子味同橙味。


 



呢個食譜一樣做到好鬆脆嘅燕麥曲奇


 


Notes
- 原食譜材料為牛油、糖粉同牛奶。


- 水份用量要因應麵粉及燕麥片嘅吸水情況而增減。


- 選用原粒燕麥片 ( rolled oat ) 搓入麵糰而唔用即食燕麥片 ( oatmeal ),係因為即
  食燕麥片吸水後比較容易變腍並溶入麵糰中,會失去口感層次。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2011年4月22日星期五

紅豆朱古力蛋糕 Azuki Chocolate Cake

        放假喺屋企無嘢好做,老竇又上咗深圳幫個朋友整嘢,所以今晚連飯都唔駛煮,無聊得滯,整完朱古力麻糬波波之後,繼續朱古力第三擊,今次輪到整洋菓子喇!

        其實呢個紅豆朱古力蛋糕想整好耐 o架喇,一直都係喺我個 To Do List 入面高據頭幾位 o架,連紅豆餡都已經一早整好哂放定喺冰格度,但係因為之前有啲係必定要做,又或者係突然間要搶先整先,所以一直拖到依家先輪到佢出場囉!




朱古力麻糬波波 Chocolate Pontikege

        呢排都唔知攪乜鬼,學哂明仔咁勁鍾意食朱古力 繼上次整完麻辣朱古力之後,今日輪到第二擊,整咗我嘅心頭好 — 麻糬波波。

        睇番啲舊 blog,原來對上一次整麻糬波波已經係年半前嘅事喇!上次整嗰個係黑芝麻麻糬波波,不過我覺得嗰個食譜整出嘅成品比較乾身,可能就係因為咁,無咩興趣再整第二次。直到最近,睇到《頭條日報》刊登咗韋太本《小食多滋味》裡面個朱古力麻糬波波食譜,心郁郁又想試吓整,趁今日 dayoff 得閒,咁就整嚟試吓啦!




材料:
糯米粉                 
120 克
木薯粉                  15 克
可可粉                  5 克
鹽                          1/4 茶匙
糖                          30 克
橄欖油                  30 克
雞蛋                      1 隻
水                          3 湯匙
入爐朱古力粒      40 克

- 將所有粉類混合好、過篩;雞蛋拂打成蛋液。

- 將鹽同糖與粉類拌勻之後,加入油及蛋液,拌勻。

- 水逐少加入、攪拌均勻,加入朱古力粒後用手搓成糰。

- 將粉糰分成細份、搓圓,之後放上已鋪入爐紙嘅烤盤上。

- 放入已預熱至 180 °C 嘅焗爐內焗約 20 分鐘即成。

以上材料份量可做直徑 5 厘米麻糬波波約 8 個。

食譜出自韋太小食多滋味》。



粒粒都焗到脹卜卜,仲有好香濃嘅朱古力味

 




味道唔錯呀!今次比起上次個黑芝麻麻糬波波
較為濕潤, 外面煙韌,裡面較軟身。


 

 

        話就話今次比較濕潤,但始終都係未及「A1 Bakery」啲咁軟身,睇佢個樣似係用唧袋唧出嚟咁款,可能就係因為水份材料多,唔能夠直接搓成糰,亦因為咁而比較軟身,下次試試加多少少水份,睇吓有冇幫助先!
 
 
 


Notes:
- 材料中嘅橄欖油同水,原食譜為牛油溶液及鮮奶。

 
- 由於糯米粉同木薯粉本身已經非常幼細,所以過篩時用匙羹喺篩內攪拌即可,
  如果用篩麵粉手法,粉類會好容易散佈
喺空氣之中。


- 粉糰大細可隨意搓成,但要注意入爐烘焗時間需略作更改。



2011年4月19日星期二

麻辣朱古力 Spicy Chocolate

        今日整咗我人生中第一個朱古力,成功做到調溫,好開心呀!

        不甘平凡嘅我,當然唔會就咁溶啲朱古力,之後等佢凝固番就算啦,咁做實在太無聊喇! 所以我就玩嘢,做個麻辣朱古力試吓先,反正 Lindt 果隻辣味朱古力咁貴,我一定唔捨得買,但係一直又好想試,咁咪又係果句:自己郁手整囉!


2011年4月17日星期日

合桃無花果裸麥包 Walnut & Dried Fig Rye Bread

        blog 友 Keith 已經一段日子,大家都算係傾得埋,而且我哋都叫做係師兄弟 o添!不過佢玩中樂,我玩西樂,真係有機會要嚟番場 crossover 至得,哈哈!


        話雖如此,但係我哋咁耐都未見過面,只係傾過幾次電話,不過今日我會同佢見面呀,我會同埋佢一齊去探 Miss Cheng。話哂都係第一次見面,咁梗係要帶埋拌手禮先似樣啦!佢一向都好鍾意「A1 Bakery」個合桃提子裸麥包,之前仲曾經俾過一個差唔多嘅湯種食譜俾我,效果都唔錯 o架!咁所以我就諗住整番個包包送俾佢做見面禮。不過其實佢自己都已經整過兼食過,送俾佢又好似無乜驚喜,所以我就轉移目標,跟仙姐個食譜整17 小時合桃無花果麵包送俾佢,因為我知佢未試過 17 小時包包同無花果乾,咁呢個包包對佢嚟講夠哂新鮮啦!



中種麵糰


材料:
高筋麵粉      186.5 克
即用酵母      2 克
水                  106.5 克
海鹽              2.5 克


- 將所有材料混合,然後搓成麵糰。


- 將麵糰放入大碗內,用保鮮紙包好,放入雪櫃內作 17 小時低溫發酵。

- 將發酵好嘅麵糰剪成細塊備用。


主麵糰


材料:
高筋麵粉      53 克
裸麥粉          32 克
即用酵母      1 克
海鹽              2.5 克
糖                  40 克
水                  30 克
橄欖油          10 克
無花果乾      60 克
合桃              60 克


- 合桃洗乾淨,用抹手紙索乾水份,放入已預熱至 140 °C 嘅焗爐內焗 15 分鐘至
  香味出,之後切粒;
無花果乾切粒備用。


- 除水及橄欖油外,將主麵糰其餘材料放入食物處理器內攪拌,邊攪拌邊放入中種
  麵糰細塊,攪打成麵包糠狀。


- 當所有中種麵糰細塊都加入後,就可以加水搓成麵糰。


- 將麵糰攤開,倒入橄欖油後,開機繼續搓至有彈性麵糰。


- 拎出麵糰,放喺已灑粉枱面上繼續搓揉、摔打成光滑麵糰。


- 麵糰略壓扁,包入合桃及無花果,將材料與麵糰搓勻。


- 將麵糰放入已灑粉嘅兜內,冚好保鮮紙,發酵 30 分鐘。


- 拎出麵糰,排氣,平均分割成 4 份後逐個滾圓,冚好保鮮紙,鬆弛 20 分鐘。


- 麵糰再次排氣,捲成橄欖形狀,然後將其中一端搓成錐形。


- 麵糰放上已墊入爐防黏蓆嘅烤盤上,冚上保鮮紙,發酵約 45 分鐘至兩倍大。


- 用水噴濕麵糰表面,篩上少量裸麥粉,用利刀喺表面界花紋。


- 將烤盤放入已預熱至 180 °C 嘅焗爐內,焗約 30 分鐘至金黃。


- 一入爐後就要噴一次蒸氣,10 分鐘之後再噴多一次。


- 出爐後將麵糰放上架上攤凍即可。 


以上材料份量可做約 122 克麵包 4 個。


食譜參考自獨角仙@藍色大門嘅《天然麵包香》。



 




麵包賣相係咪好靚呢!其實上個星期日我已經 pre-bake 過一次,
不過就無包到餡,純粹試一試做個麵糰,睇吓有冇需要注意
嘅地方,當日老豆食第一啖已經話好好食喇!


 



 上次通電話時,Keith 話見到我整焦糖合桃抹醬好吸引,咁就啱哂喇,
反正我都唔鍾意食,佢又話想試吓味先自己親手整,咁就將
剩低果樽包裝一下,送
埋俾佢做見面禮啦!


 



講起上嚟,Miss 咁耐都未試過我嘅自家製麵包呀!橫掂整開就順手
送個俾佢啦,連埋呢樽咖啡,等佢可以喺中心沖嚟飲,慢慢歎。


 


Notes
- 原食譜材料係用牛油、新鮮酵母及奶粉。


- 總用水量為原食譜76.5%。


- 由於麵糰內有裸麥粉,所以會比較濕,需視乎實際情況而加減水份。


- 新鮮酵母與即用酵母用量之間的轉換方法,請參考《不同種類酵母用量之調
  整
》。


- 詳細做法,可參考白麵包多士嘅製作步驟圖片。



        你哋亦都可以喺Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans



P.S.    正當打緊呢篇 blog 時,咁Keith 打電話俾我,佢話佢聽日唔可以同我一齊去探 Miss,因為佢爸爸突然間病得好嚴重,仲入埋醫院,希望 uncle 吉人天相,無事出院啦!