咖啡香蕉雪糕

        呢個所謂雪糕，但其實係完全無奶類製品，材料好簡單，只係得香蕉同咖啡粉。個食譜係老表 share 俾我，係來自一個營養師嘅食譜。

 

 

芋圓

        噚晚原本只係諗住煲芋頭番薯糖水，但諗諗吓又想整埋湯丸，因為好耐無食，心思思好想食到黏黏糯糯嘅湯丸。入到廚房，望吓望吓個芋頭，又突然間諗起早前上網睇到好幾個芋圓食譜，咁擇日不如撞日，反正都買咗芋頭，就整芋圓啦！

 

蓮子黑糯米渣咋

        食甜嘢果然可以反映到我自己嘅情緒變化，有食藥、無食藥、落藥重、落藥輕都即刻睇得到！

 

        又要懶，又想食甜嘢，煲渣咋就最啱喇，洗乾淨哂所有材料，用清水浸過夜，第二日撻火煲腍就食得，完全無功夫可言！

 

 

純素芝麻豆腐雪糕 Vegan Sesame Tofu Ice-cream

        喺型仔廚師個 Youtube 頻道度見到個 vegan ice-cream 好耐都無的起心肝整，咁啱早前整芋頭紫米露時用剩咗啲椰漿，要盡快清埋佢，因為椰漿好易變壞。突然諗起可以用嚟整雪糕，咁就趁天氣仲未係好凍，快啲試整咗個 vegan ice-cream 食譜。

 

        今次係 base on 型仔廚師個 tofu ice-cream，自己再加啲減啲，就變成黑芝麻雪糕喇！由於整呢款雪糕係唔需要煮過或加熱，原本想買盒裝即食豆腐嚟整，感覺上比較衛生，但始終都係嫌盒裝豆腐豆香味唔夠，最後都係買番街市豆腐檔嘅豆腐嚟整，反正腰果我都會先汆水，跟手放埋件豆腐落去囉！( 但其實型仔廚師係無將腰果汆水㗎，原粒就咁用。)

 

紅豆雪糕 Azuki Ice-cream

        又到清貨時間喇，今次目標係要清埋啲淡忌廉同冷宮內嘅紅豆餡。要大量清 cream 的話，我自己就會整雪糕，整一次都最少唔見咗 200 克喇！

南瓜麥米綠豆沙

        唔敢飲涼茶，就食碗綠豆沙清熱啦！

 

 

抹茶紅豆糯米糍

        糯米糍都唔係第一次整喇，不過之前嘅做法係好似整湯丸咁，包好哂餡先放滾水內煮熟。今次呢個就試吓先將粉漿蒸熟之後再包餡，以前成日都形住熟粉糰會好黏手，做起上嚟會好呢 hea，但原來都唔係想像中咁差哦！

 

 

焦糖蘋果麵包布甸 Caramel Apple Bread Pudding

        麵包布甸都唔係第一次整，之前都已經整過好多次，不過今次就試吓加入焦糖蘋果，同埋參考咗 blog 友 Allie 嘅做法，唔落 cream 落去整，而我自己就更加健康，連牛奶都用水代替埋。

 

        呢個布甸可以話係一個極之環保嘅甜品，點解咁講？因為可以一次過清咗啲隔夜麵包同供過佛嘅蘋果哦！
 
 
 

南瓜番薯綠豆湯水

        由細到大，我都係比較鍾意食綠豆沙多過紅豆沙，覺得個味道較為清淡，無咁濃。噚晚煲嘅綠豆沙就比較玩嘢，加咗南瓜同番薯，仲落埋麥米㖭！

 

 

沙蔘玉竹雪梨糖水

        上次就因為要清蘋果而整咗肉桂蘋果蛋糕，今次就到清雪梨。

 

        雪梨、雪耳、沙蔘、海玉竹同南北杏，見到呢幾樣材料，你會諗住點整呢？正常就梗係加嚿瘦肉或豬腱落去煲湯喇！之但係，呢排成日都好易頭痛，加上大懶蟲又成日喺我耳邊做魔鬼，最終意志都係敵不過大懶蟲，少嚿豬肉就自然少啲功夫啦！

 

        加幾粒冰糖，咁就即刻變成滋潤糖水，都唔錯呀！

 

喺又凍又乾嘅天氣，食完碗糖水即刻又暖又潤哦！

榴槤慕斯 Durian Mousse

後宮佳麗已經超過三千，確有人滿之患，為騰空出更多空間，要開始逐步向各佳麗下驅逐令。首當其衝嘅係榴槤貴人同蛋白貴人！

 

材料：
急凍榴槤果蓉   500 克
魚膠片   8 克
糖   90 克
水   30毫升
蛋白   45 克
淡忌廉 250 克

- 果蓉平均分成兩份，其中一份座熱水保暖。

- 將魚膠片放入凍水中浸至完全軟身，撈起，略為瀝乾水份後加入座熱果蓉內攪拌至完全溶解。

- 糖加水放入小煲內，開火加熱至 117 ℃ 煮成糖漿。

- 當糖漿開始滾時，用電動打蛋器將蛋白打至起泡。

- 將糖漿煮好之後，逐少倒入蛋白內，邊倒邊繼續打至 8 成企身成意式蛋白霜。

- 淡忌廉用電動打蛋器打至 7 成企身後，加入蛋白霜，輕手拌勻。

- 凍果蓉與暖果蓉混合，攪拌均勻，之後拌入蛋白忌廉混合物內。

- 將果蓉混合物倒入杯內，放入雪櫃內雪至凝固即可享用。

呢款膠杯真係好好用，不但連膠蓋，杯身質地亦好硬淨，
可重覆多次使用都唔易爛，而且外觀都不俗哦！

 

Winnie 幫我買呢隻 D24 急凍榴槤果蓉超正，勁香甜，即使溝咗
蛋白同 cream 嚟整 mousse 都不減風采，而且價錢
又唔太貴，相對合理，讚呀！

Notes：
- 魚膠片必須逐片放入水中，確保每塊都接觸到水，易於浸軟。

 

- 混合咗魚膠溶液嘅果蓉必須座熱水保暖，避免魚膠有製作過程中慢慢凝固。

- 蛋白要放室溫回溫，若果太凍的話，當熱糖漿加入時會立即凝固成粒。

焦糖朱古力布甸 Caramel Chocolate Pudding

農曆新年時，有學生送咗盒朱古力俾我，盒面寫住話係瑞士 No.1 朱古力品牌。裡面有兩款 truffles，一款係 dark chocolate，另一款係 milk chocolate，怕奶味嘅我當然係先食 dark chocolate 啦！以我咁食得甜嘅人，食 dark chocolate 都覺得好甜，當下立刻心知不妙，咁 milk chocolate 咪甜到嘔茄！？ 到食哂所有 dark chocolate 之後，迫住要食粒 milk chocolate，食第一啖已經覺得好唔掂，不單只甜到嘔茄，"朕" 奶味仲濃到呢 …… 真係反哂胃咁滯，之後一直再無掂過佢喇！

之但係無理由送俾 "大口仔" 食咁浪漫㗎，話哂都係瑞士 No.1 朱古力，好折墮喎！！一於溶鬼咗佢，再溝啲 70% 黑朱古力連即溶 expresso 咖啡粉一齊整布甸，應該無衰喇啩！！！

焦糖漿

 

材料：
糖     50 克
水     2 茶匙
熱水   1 湯匙

- 將糖同水倒入煲內加熱，邊煮邊搖晃煲身直至糖溶。

- 繼續加熱，直至煮到自己想要嘅焦糖色。

- 熄火後倒入熱水，搖晃煲身令焦糖與水能均勻混合。

- 趁熱將焦糖漿倒人容器內。

- 放入雪櫃雪至焦糖凝固，待用。

 

朱古力布甸

材料：
朱古力 150 克
雞蛋 1 隻
牛奶 100 毫升
即溶咖啡粉 2 茶匙
熱水 1 湯匙
淡忌廉 100 毫升

- 朱古力座熱水溶化；雞蛋拂打成蛋液。

- 牛奶加熱至微暖，然後逐少倒入朱古力內，攪拌均勻。

- 咖啡粉加熱水溶解，倒入朱古力漿內，拌勻。

- 淡忌廉與蛋液混合，之後將朱古力漿逐少拌入。

- 將布甸液過篩到焗盅內，然後排放上烤盤上，烤盤內倒入適量熱水。

- 放入已預熱至 180 ℃ 嘅焗爐內，焗約 30 分鐘至布甸液凝固。

- 出爐攤凍後放入雪櫃雪凍，食前將布甸倒扣於碟上，切件享用。

食譜出自福田淳子嘅《我愛布丁》。

 

材料份量剛好做到 4 個疏乎厘盅大小嘅布甸，
每次食一杯，又唔需要切件，非常方便。

嘩，嗰隻 milk chocolate 真係恐怖，咁樣整完布甸之後都仲係好甜，
而且食譜中嘅牛奶我已經用清水代替，但個布甸
食出嚟都仲係好大奶味囉！！

自家出品杏仁豆腐

鍾意食杏仁同豆腐嘅我，理應會鍾意食杏仁豆腐，呢個係理所當然㗎啦！但係偏偏我又好怕食，點解？因為喺街外食嗰啲真係太難食喇，味道假到呢 ……… 同細個嗰陣時食過又紅又綠嘅糖漬車厘子不相伯仲，一樣咁恐怖！！所以我一直都幾抗拒杏仁豆腐呢樣嘢！

 

依家自己稍為識整吓嘢食，不如又試吓自家製作杏仁豆腐呀！自家製作，真材實料，唔用香油，應該可以挽回我對佢嘅信心！

材料：
黃豆 80 克
南杏 80 克
北杏 10 克
水 500 毫升
糖   適量
魚膠粉 8 克

 

- 黃豆同南北杏洗淨，用清水浸過夜，第二日再過一次水。

- 將黃豆、南北杏放入攪拌機內，加水攪打成杏仁豆漿。

- 豆漿隔渣倒入煲內煮滾熟透。

- 加糖攪拌至完全溶解，熄火攤凍。

- 魚膠粉逐少加入 80 毫升豆漿內，攪拌均勻後座熱水至完全溶解。

- 將混合有魚膠溶液嘅豆漿倒回煲內，拌勻後即可倒入模內。

- 放入雪櫃雪凍至凝固即可。

 

以上材料份量可做 9 厘米 X 13 厘米 X 3 厘米杏仁豆腐 1 件。

雖然成功做到 “真” 嘅杏仁豆腐，但都係有點美中不足，因為我一向都會用番
啲豆渣，所以我唔敢落北杏一齊打，啲人成日話北杏有輕微毒素，
唔可以多食，所以我咪唔敢加埋一齊打囉！最終個杏仁豆腐
食落都有濃郁杏仁味，但杏仁嘅香味就差咁啲囉！

加埋西瓜、奇異果同熱帶雜果，就成為一款美味消暑甜品喇！

Notes：
- 如果想做到豆腐花嘅質感，魚膠粉用量可減至 5 – 6 克。

- 豆漿一定要徹底煮至熟透先可以飲用，詳見《自製豆漿煮法》。

- 魚膠粉必須逐少灑入液體內，不可將步驟倒轉，否則容易結粒。

水羊羹

        反正早前煮咗紅豆餡，咁就可以整個超簡單快手嘅和菓子喇！

南瓜西米布甸 Pumpkin Sago Pudding

買一個南瓜，食足幾餐都食唔完，最後剩低嘅南瓜用嚟整埋布甸，咁就清哂貨喇！

材料：
西米 80 克
水 1180 毫升
南瓜肉 120 克
糖 60 克
吉士粉 15 克
粟粉 15 克
椰漿 60 克
雞蛋 1 隻

- 先煲滾 1000 毫升水，加入已洗乾淨西米，用中慢火煮 5 分鐘，熄火後冚蓋焗 10 分鐘。

- 之後將西米過冷河，備用；南瓜肉蒸熟後連水份一齊用叉壓爛成南瓜蓉。

- 雞蛋打開後將蛋白、蛋黃分開，蛋黃用叉打散，加入南瓜蓉、椰漿、吉士粉及粟粉拌勻。

- 將剩低 180 毫升水連同 40 克糖放煲內煲滾至糖完全溶解。

- 將處理好嘅西米同吉士粉漿一齊加入煲內，用慢火邊煮邊攪拌，直至布甸糊煮至稠身。

- 布甸糊勺入焗盅內，將表面略為掃平。

- 蛋白打散，將剩低嘅 20 克糖分 3 次加入，拂打成 8 成企身嘅蛋白霜。

- 將蛋白霜放入唧袋內，然後唧喺布甸糊表面。

- 放入已選擇燒烤功能並預熱至 140 ℃ 嘅焗爐內，焗約 15 分鐘至蛋白霜變成金黃即成。

 

以上材料份量可做布甸 3 盅。

化過妝後嘅布甸，賣相即刻加分。

呢個懷舊布甸又有冇鉤起大家嘅兒時回憶呢？

Notes：
- 如果唔想加南瓜蓉的話，可用 60 毫升花奶、豆漿或清水代替。

- 可參考《西米處理方法》當中處理西米嘅步驟。

- 用浸過水嘅匙羹去掃平布甸糊表面，可避免黏匙。

白玉抹茶露 Sweet Green Tea Soup with Shiratama

趁啲紅豆餡仲未掟上冰格，噚晚跟櫻 井 老師本和菓子食譜整咗個日式甜品。

 

白玉糰

材料：
白玉粉 20 克
水 約 35 克

- 將水同白玉粉混合，用膠刮拌勻成粉糰。

- 粉糰平均分成 4 份，分別搓圓後用手指將中央壓扁成凹狀。

- 煲滾水，將粉糰放入煮至浮起，然後立即放入凍水內。

 

抹茶露

材料：
葛粉 25 克
水 300 毫升
抹茶粉 2 茶匙
熱水 2 湯匙
糖 約 4 – 5 湯匙
紅豆餡 適量

- 葛粉同水倒入煲內，用中慢火煮至滾及濃稠，其間不斷攪拌。

- 抹茶粉加熱水開勻，之後連同適量糖加入葛粉水內。

- 一直攪拌至糖完全溶解即可。

 

組合

- 先將抹茶露勺入小碗內。

- 撈起白玉糰，瀝乾水份後放入小碗內。

- 加紅豆餡伴食。

 

食譜出自櫻井景子嘅《和菓子‧和甘味》 (秋冬篇)》。

 

白玉粉其實係粗粒日式糯米粉，不過做出嚟嘅成品
比起用中式糯米粉做出嚟會較為煙韌。

做定多一份白玉糰放冰格，到想食時就可以隨時拎出嚟煮。

呢個甜品完全係我杯茶呀！因為無論抹茶、紅豆餡
定係煙韌嘅糯米製品我都非常鍾意食。

Notes：
- 白玉粉可用中式糯米粉代替；而葛粉則可用馬蹄粉或藕粉代替。

- 煮葛粉水時必須不斷攪拌，以防黐底。

- 糖嘅用量可依個人口味增減，所以最好邊煮邊試味。

- 紅豆餡做法，請參閱《日式紅豆餡》。

紅豆南瓜煎軟餅

喺《家常便飯》度咪話菜檔阿姐介紹我買咗成個南瓜嘅，雖然唔係好大個，但始終自己一個人食，又點會食得哂呢！所以一個瓜用嚟整幾樣嘢都得呀！

之前咪問過大家我煮日式紅豆餡嚟做乜嘅，咪就係整呢個中式甜品囉！係呀，咪就係用日式材料整中式甜品咋嘛！

 

材料：

南瓜肉 80 克

粘米粉 15 克

糯米粉 90 克

糖 10 克

日式紅豆餡 80 克

 

- 南瓜肉切細後蒸至軟身，隔去多餘水份，用叉壓爛成南瓜蓉，南瓜水留用。

- 粘米粉及一半糯米粉、糖混合好，將熱南瓜蓉加入，用膠刮拌勻成糰。

- 將剩餘糯米粉加入，逐少加入南瓜水搓成光滑軟熟粉糰。

- 粉糰平均分成 8 份，將細粉糰搓圓後壓扁、壓薄，分別包入 10 克紅豆餡。

- 捏緊收口，搓圓後輕手略為壓平。

- 燒熱油，將粉糰放入，用慢火煎至兩面稍為硬身。

- 加入少量水，冚上鑊蓋煎焗至水份完全蒸發。

- 打開鑊蓋，將兩面煎至金黃香脆即可上碟。

 

以上材料份量可做煎餅 8 件。

個個煎餅都煎到金金黃黃，外型又 "圓碌碌"，好啱用嚟做賀年甜點喎！

餅皮煙煙韌韌，自家製作嘅紅豆餡又唔會太過甜，
鍾意食糯米糍嘅朋友肯定鍾意呢個煎軟餅呀！

Notes：

- 加水煎焗時必須冚上鑊蓋，藉此用水蒸氣將粉糰焗至熟透。

- 日式紅豆餡製作方法，請參閱《日式紅豆餡》。

- 搓粉糰時可加入少許油，令到粉糰更加柔軟。

豆漿意式奶凍 Soymilk Panna Cotta

        上星期睇番《西廚教室》搵食譜時，無意中發現原來有幾個我一直都想整嘅甜品食譜喺裡邊，睇吓睇吓，就見到呢個用豆漿整嘅 panna cotta，反正都整咗豆漿，順手整埋佢嚟試啦！