2010年4月29日星期四

素肉醬南瓜麵筋

        又到十五食齋日,今晚試新配搭,用南瓜加現成素肉醬煮麵筋,味道都唔錯呀,辣辣哋,好好食,仲好送得飯 o添



材料:
南瓜
炸麵筋
素肉醬
辣椒乾


調味料:


鮮醬油


- 煲滾水,加少少白醋,將麵筋放入汆水,瀝乾後每剪開一半。


- 南瓜去皮去籽,切件;辣椒乾略沖洗後切粒,備用。


- 燒熱油,先爆香辣椒乾,落南瓜件兜炒後,加埋麵筋落鑊一齊炒。


- 加入素肉醬及調味料,兜均後加少少水,用中慢火煮至南瓜腍身即可。




係咪望落唔係好覺有素肉碎呢?因為開咗罐先知原來都係用
炸麵筋碎做成 o架,所以其實係重複咗材料呀!


 



呢罐素肉醬係 Winnie 上次去台灣時買俾我手信嚟,
味道唔錯,辣辣,幾好味呀!


 


Notes:
- 將炸麵筋汆水係為咗去除多餘油份,但唔好太耐,淥一淥就即刻盛起,否則會變得
  過腍,到煮果陣就好容易爛。


- 記得要試味先好落調味料,因為素肉醬係已經調好味。


- 若南瓜已經煮腍,但仍然有太多水份剩的話,可用粟粉水埋薄芡。


 



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年4月26日星期一

肉桂香蕉朱古力蛋糕 Cinnamon Banana Chocolate Cake

        上次整咗個香蕉經典朱古力蛋糕,食完之後都意猶未盡,今日又再用香蕉搭朱古力做蛋糕,整咗一大盤,實行食個夠呢!




材料:
74% 朱古力      100 克
85% 朱古力      100 克
牛油                   100 克
糖                       50 克
雞蛋                   2 隻
冧酒                   1 湯匙
香蕉                   3 隻
肉桂粉               適量
低筋麵粉           50 克
泡打粉               1 茶匙
防潮糖霜           適量


以上材料份量可做 7 吋 X  7 吋 方形蛋糕一個。


- 麵粉同泡打粉過篩 3 次;朱古力加牛油隔熱水座溶,均勻混合好。


- 將糖加入朱古力漿內拌勻,再加入雞蛋混合好。


- 用叉將 2 隻香蕉壓爛成香蕉蓉,之後加入朱古力混合物內,拌勻。


- 倒入冧酒,篩入粉類,拌勻成麵糊。


- 將剩低1 隻香蕉切粒,加入肉桂粉拌勻後倒入麵糊內混合。


- 將麵糊倒入蛋糕模內,用膠刮抹平麵糊表面,之後放入已預熱至 180 °C 嘅焗爐內
  焗
30 - 35 分鐘至熟。


- 出爐攤凍後灑上糖霜裝飾,即成。




望落似 brownie,但其實個 texture 係界乎 brownie 同 gâteau classique
au chocolat 之間,唔似前者咁實淨,又唔會好似後者咁濕潤。


 



有香蕉粒夾喺蛋糕中間,香蕉味特別濃。


 



呢個指定動作必做!


 


Notes:
- 朱古力濃度可因應個人口味而選擇。


- 由於朱古力混合物比較濃稠,所以篩入粉類之後,用打蛋器比較容易將材料拌勻。


 


- 如果唔係用防黏模焗蛋糕的話,事前要先鋪上牛油紙或搽油上粉,方便脫模。




        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年4月24日星期六

臘味蒸芋蓉

        最近啱先睇番鮑汁飛教整臘味芋蓉粒果集《蘇 Good》,我睇到一半已經決定要整嚟食,因為睇見已經覺得好正、好好食,皆因我係好鍾意食芋頭 o架!而且見唔係太難整,起碼易過整蘿蔔糕先啦!


        不過材料方面我就有少少改動,無用到見到都驚嘅臘肉,改用蝦米代替;而淡奶就用淡忌廉代替,因為我係唔飲奶嘛!我仲加咗少少五香粉 o添,所以蒸出嘅芋蓉特別香。



老豆都讚好食,仲話好香、好夠味 o添!


材料:
芋頭
臘腸

蝦米
淡忌廉
蔥花


調味料:


五香粉
紹酒


- 芋頭去皮後切開兩邊,隔水蒸熟,一半壓成芋蓉,另一半則切粒。


- 臘腸蒸至軟身;蝦米洗乾淨,用暖水浸軟,之後將兩樣材料切粒,備用。


- 芋蓉加入適量淡忌廉、水、鹽、糖同五香粉,拌勻至糊狀。


- 之後將芋蓉放置一邊,等佢慢慢吸收忌廉及水份後再次加入忌廉及水拌成糊狀。


- 燒熱油,將臘腸粒同蝦米粒爆香,之後加入芋頭粒,灒酒,兜炒一陣。


- 將炒好嘅材料加入芋蓉內,均勻混合。


- 將所有材料倒入碟內,用中火蒸約 15 - 20 分鐘。


- 之後灑上蔥花,再蒸多兩分鐘即可。



Notes:
- 揀芋頭時最好揀比較輕身,越輕身的話,水份就越少,即代表芋頭就越粉。加上
  我自己嘅經驗,可以睇切口花紋,花紋越多,越深紫色,就代表芋頭越粉。



我今次買呢個芋頭好多花紋,所以切去外皮嘅時候已經 feel 到好粉喇!



- 芋頭蒸熟之後,
趁熱壓成芋蓉會比較容易;相反,芋頭攤凍之後先切粒就無咁容
  易爛。


- 可用鮮奶或淡奶代替忌廉及水;浸蝦米水亦可留番加埋入去撈芋蓉。


- 芋蓉嘅濃稠度可依個人喜好調校。


- 蒸芋蓉時,只需蒸番熱即可,因為所有材料其實已經煮熟。


- 唔介意油膩的話,可以直接灒熟油上蔥花上而毋須額外再蒸多兩分鐘。


 


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年4月22日星期四

野葛菜白鯽煲西施骨

        老豆喺農場野葛菜返嚟,我都唔知點煲好,煲齋湯又驚太涼,我會頂唔順,於是今晚呢煲湯就由老豆發板,佢仲買埋條白鯽返嚟等我煲 o添,可能佢都發覺好似我咁講,街市真係無 "瞓覺" 生魚賣啦!所以佢索性買埋返嚟,費事我喺個街市度周圍巡!!話時話,我都唔知幾耐無食游水魚囉,睇怕都一定超過十年喇!



材料:
野葛菜
白鯽魚
西施骨
蜜棗
陳皮
薑片


- 蜜棗、陳皮用熱水浸軟,蜜棗略沖洗,陳皮刮去白瓤;野葛菜洗乾淨,備用。


- 西施骨洗乾淨、汆水,之後過冷河,沖走多餘脂肪及血水。


- 鯽魚打鱗、去內臟,洗乾淨後,放入燒熱油鑊內,加薑片煎至兩面金黃。


- 除鯽魚外,全部材料凍水落煲,煲大滾後,加埋煎好鯽魚一齊煲。


- 煲好之後落鹽調味即可飲用。


 



啲就係野葛菜喇!老豆拎咗好多好多返嚟,多到我個超大真空煲
都裝唔哂,於是我就將多出嚟果啲野葛菜俾
Gordon 拎返屋企煲湯。


 



啲野葛菜洗咗我好耐呀,你睇,每條菜根我都洗到乾乾淨淨、白雪雪,
真係企到腳都跛呀!睇吓盆洗菜水就知有幾污糟啦!
呢次都仲係第一過水咋!



Notes
- 老豆話野葛菜啲根唔好切去,要連埋一齊煲,所以要徹底洗乾淨。


- 煎魚時加幾片薑,可以幫助去除魚腥味。


- 除白鯽魚外,亦可用生魚代替。


 


P.S.  Gordon 上嚟拎野葛菜時,佢話上次我整俾佢果樽柑桔橙皮果醬勁好食喎,我話我都唔知味道係掂,因為之前樽柚子芒果醬仲未食完,所以未開嚟食呀,不過可以肯定,可以好成功咁整到樽果醬囉!


 


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年4月21日星期三

即棄膠手套

        早前喺「價真棧」度買咗盒即棄膠手套,覺得都幾好用呀:




質地真係比較堅韌,無咁易整穿,不過最唔好就係 one size 囉,
我隻手又細又無肉,好容易就甩出嚟!


 



佢吸引到我買嘅原因,最主要都係因為 Approved for Food Handling,
咁用佢嚟處理食物就放心得多啦,尤奇係搓曲奇麵糰時就最啱喇!


        如果無記錯的話,應該係 $39.9 一盒,每盒有 500 隻。



       
你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


Kenwood 食物處理器出讓

        由於 Louisa 即將 "增多一籮穀",所以依家正積極執pack 箱,而且盡量掉得嘅都掉。佢買咗無耐果部 Kenwood food processor 只係用過兩次,依家想趁新淨出讓,型號係 FP 920,有 9.5 成新 o架!佢話 $900 就有交易 ( 公價 $1490),如果你哋或你嘅朋友有興趣的話,就聯絡我啦,blog 友們可以私人留意俾我,講低聯絡方法,到時再接洽啦!


        因為佢果部 food processor 同我果部一模一樣,所以有興趣又想睇吓個款嘅朋友,可以 click 入我之前篇 blog 【Kenwood 食物處理器】度睇相 o架! 


突破 100 喇!!

        呢兩日上網寫 blog 時,見到自己個 blog 嘅訂閱者超過 100 喇!



        睇番我開 blog 嘅日子,係 1 Jun 08,原來兩年都無喎!但係就真係都無諗過自己都會堅持到咁耐囉,因為我打中文勁慢 o架,所以其實我打一篇短短嘅網誌都要好耐,好嘥時間呢!亦都無諗過咁短時間內會有咁多朋友支持我個 blog,小弟都好開心 o架!


        當初寫 blog 原因都只係為咗做個紀念,同埋方便患有嚴重 "老人癡呆" 自己搵番之前整過嘢食嘅食譜,完全無諗過會有咁多朋友支持自己,而且仲識咗一班好好blog 友,當中更不泛有相當經驗或專業嘅高手,不但只我可以向佢哋請教煮食心得,有時對方更會主動話番俾我聽正確烹調方法或分享心得,真係獲益良多!所以睇番一直以咁多篇網誌,都發覺自己進步唔少 o架,不單只係烹飪技巧,就連幫自己 "傑作" 影相嘅攝影技巧都在不斷進步中。


        喺呢度再次多謝咁多位 blog 友嘅支持同無私嘅分享,希望大家嘅廚藝嚟緊嘅日子不斷進步,不斷改進啦


2010年4月20日星期二

宇治抹茶合桃磅蛋糕 Uji Matcha Walnut Pound Cake

        早幾個月之前,去「A1」度買麵包時,見到佢新出咗綠茶牛油蛋糕,而且仲有得試食 o添,一向都幾好綠茶嘅我,見到有得試食就梗係即刻試啦,起初以為一定會勁濃牛油味,我未必會頂得順。點知食落又唔係喎,仲好香綠茶味 o添,真係一試上癮呀!不過價錢就一啲都唔平呀,普通一片牛油蛋糕 size,買成 $10 一件,我覺得好貴囉!可能因為佢係用正宇治綠茶做啩,因為顏色真係好深綠,希望佢唔係落色素啦!


        都係果句喇,想食又唔捨得洗錢咩,咪自己郁手整囉,而且整牛油蛋糕都算叫做易整,無乜機會失敗!雖然自己整可能成本會仲貴過買,但係可以做 "駝鳥" 嘛,唔去計成本咪得囉,無眼屎乾淨盲,哈哈!




材料:
牛油             100 克
糖                 100 克
雞蛋              2 隻
鹽                  少許

低筋麵粉      100 克
抹茶粉          1 1/2 茶匙
泡打粉          1/2
茶匙
合桃              適量


以上材料份量可做 18 cm X 9 cm X 7 cm 長方形蛋糕一個。


- 預先將牛油室溫放軟;粉類過篩 3 次;蛋糕模鋪上牛油紙


- 合桃略沖洗後用抹手紙索乾水,放入已預熱至 180 °C 嘅焗爐內焗約 8 - 10 分鐘
  至香脆,攤凍後切碎,備用。


- 牛油用電動打蛋器打至鬆軟發白,之後加入半份糖繼續打發、拌勻。


- 蛋黃逐個加入牛油霜內混合,加鹽拌勻。


- 蛋白用電動打蛋器打至 8 成企身,加埋剩低嘅糖入去打至 9 成企身。


- 先將 1/3 份蛋白霜加入蛋油混合物內拌勻,之後篩入1/2 份粉類混合拌好。


- 繼續加入 1/3 份蛋白霜混合,跟住就加埋剩低果粉類,拌好之後就落埋剩低
 
蛋白霜拌勻。


- 最後加入合桃碎,混合好後將麵糊倒入模內,放入已預熱至 170 °C 嘅焗爐內
  約
35 - 40 分鐘至熟。


- 出爐後放涼即成。


 



我叫得佢做「宇治」蛋糕,並唔係浪得虛名 o架,我真係 "斥資"
去買宇治綠茶整 o架!左邊係宇治綠茶粉,右邊係
台灣綠茶粉,色澤真係差好遠呀!


        其實之前我一早已經 pre-bake 過一次呢個蛋糕 o架啦,見當時好成功,所以今次先放心用貴嘢整咋!上次用右邊果隻台灣綠茶粉試整,落3 茶匙都唔係好綠,而且味道比較淡,呢次用靚貨係唔同啲,用量少一半都已經好香、好綠。



切開蛋糕裡面,顏色仲靚呀!


 



今次做咗兩個蛋糕,一個係俾 Louisa 試吓,因為我知佢會飲綠茶之餘,
仲好鍾意食合桃蛋糕 o添!另一個就送俾佢同事 Stephy,
因為上次幫 Winnie 整椰香班蘭雪芳蛋糕
要麻煩佢拎啲班蘭葉俾我呀!




Notes:
- 抹茶粉份量可根據自己口味增減。


- 合桃亦可用其他果仁代替。


- 為方便大家清楚容易明白混合蛋白霜同粉類嘅步驟,現將之縮寫成流程圖:
  1/3 份蛋白霜  —  1/2 份粉類  —  1/3 份蛋白霜  —  1/2 份粉類  —  1/3 份蛋白霜


- 如果要有靚靚割紋的話,當蛋糕入爐焗到表面開始乾身時,就將佢拎番出用刀
  喺蛋糕正中割 1 吋深坑紋,之後再繼續焗,而之前 blog 友 Kelly 亦教我可以喺坑
  紋上倒少油,咁就可以做到更加 "四正" 嘅割紋喇!



   
        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


雜菜照燒雞扒丼

        上次整完親子丼之後,覺得效果唔錯,老豆都讚好食,所以噚晚又玩日式丼飯,雖然都係用雞扒整,不過今次就用照燒汁,一樣好味。




材料:
急凍雞扒
椰菜花
紅蘿蔔
玉豆
蒜蓉
珍珠米


醃料:
日本醬油
清酒


調味料:
雞粉


照燒汁:
日本醬油
清酒
味醂
冰糖


- 雞扒解凍後洗乾淨,切去多餘脂肪,醃好。


- 椰菜花洗淨後切件;玉豆洗乾淨,撕去兩邊嘅根,之後切段;紅蘿蔔刨皮後略沖
  水、切塊,之後汆水。


- 珍珠米煲熟成飯。


- 燒熱油,將雞扒兩面煎至金黃色,上碟後切件,備用。


- 另起油鑊,爆香蒜蓉,將三種蔬菜一齊放入鑊炒,灒酒,加入調味料,兜勻之後
  加少少水,冚蓋煮一陣至蔬菜稍腍身就可盛起。


- 將照燒汁材料全部落鑊煮,煮到冰糖完全溶解,汁料變得濃稠即可。


- 裝好飯,放上雞件及雜菜,淋上照燒汁即成。




哋有冇覺得熟口熟面呢?呢個咪就係 A 貨吉野家煎雞飯囉!
我都有落埋七味粉呀!


 



是晚日式定食:雜菜照燒雞扒丼加洋蔥番茄麵豉湯。


 



呢碗大大碗,食到我好飽、好滿足呀!


 



前兩日老豆去深圳灣時,喺大形超市度咗椰菜花同番茄嚟,雖然
價錢唔係平過香港好多,但係就又靚、又新鮮過街市
賣果啲好多囉!


 


Notes
- 煎雞扒時,只需落少少油,然後先煎雞皮果面,煎雞油就足夠煎埋另一面
  而唔駛再額外落油煎。


- 用冰糖整照燒汁可以令到個汁比較 "令" 身,有光澤,而且味道亦清甜


- 紅蘿蔔汆水後先炒,可縮短時間煮至腍身。



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


Ryan 送嘅掛飾

        上星期五去教 Ryan 時,上上吓堂佢突然間叫我落咗堂之後唔好走住,因為佢有嘢要送俾我,初時我仲以為講吓咋,點知原來真係買嘢送俾我喎,就係呢個掛飾喇!



        Ada 話俾我聽,原來佢學校果日有活動教學,老師帶學生出去書局度買嘢,咁 Ryan 總共買3 樣嘢,有送俾我呢個掛飾啦、送俾佢媽咪嘅十字架襟針、同埋買咗本書自己睇。咁跟住我就同 Ryan 講,咁你無買嘢送俾姨姨咩,喺果一刻,佢反應都好快,即刻走去同姨姨講,叫佢同媽咪 share 個襟針一齊用! 哈,好攪笑,我同 Ada 聽見即刻瞪大眼,O 哂嘴,小朋友真係好天真可愛!於是我同 Ryan 講,不如將我個掛飾先送俾姨姨啦,叫佢下次先再買過第二樣嘢俾我。不過姨姨話唔好,送咗俾人嘢唔可以攞番,叫佢唔好問我拎番喇,攪到我都唔好意思 o添,我係外人反而有禮物收。


        好啦,見你咁乖,下個月送番份禮俾你啦!



 

你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


糖漬柑桔

        早前老豆拎咗好多柑桔返嚟,真係好多呀,成大盆筲箕呀!我當口果咁食,間唔中食一粒,食到依家都未食得哂,中途已經有部份發咗霉丟咗,見剩番低果啲又開始縐皮乾身喇,都唔知點處理好,又唔可以食得多喎,話哂都係酸 o架嘛!


        咁啱得閒時拎起早前買果本《我愛和風洋菓子》嚟睇,發現有教整蜜漬柑桔喎,咁就啱哂啦,醃製之後放入雪櫃度,可以擺耐好多,又唔駛嘢啦!



材料:
柑桔        1 份
糖            1/2 份  (
份量以重量計算 )


- 柑桔去蒂、洗乾淨,之後用竹簽表皮拮窿。


- 將柑桔放入煲內、加水,煲滾後繼續煲多 3 分鐘,之後盛起、瀝乾水份。


- 將柑桔再放番入煲,加入啱蓋過面嘅水,再加入糖,煲滾。





- 之後用一個比原裝煲蓋較細 size 嘅蓋,直接放上金桔面,用慢火煮多 20 - 30 分
  鐘。


- 熄火後將柑桔連糖水放入玻璃樽內,攤凍後放入雪櫃保存。



Notes:
- 玻璃樽需事前經過消毒處理,方法請參閱【玻璃樽消毒方法】。


- 煮好柑桔之後,剩低柑桔糖水可以用嚟沖水飲,唔單只有淡淡柑桔香味,飲落
  仲好潤喉、好舒服。




        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans