2009年2月28日星期六

好多謝你呀!

        今朝教教吓琴時收到 Gordon嘅電話,佢問我係咪聽日出發去台灣,我話係,佢就同我講轉頭SMS 佢個台灣 friend 個 contact number 俾我,如果喺台北有任何突發事件要搵人幫手,就記得打電話俾佢個 friend 求救。


        雖然同佢已經分開咗,但係佢都依然咁關心我,仲慌食我老人癡呆唔記得,專登 send 埋 SMS 俾我,我果一刻真係好 warm,所以收線前同佢講咗聲多謝!


        好啦,買番份正嘢俾佢做手信先! 


雙重朱古力腰果鬆餅 Double Chocolate Cashew Muffin

        聽朝就出發去台灣喇,係第一次同Winnie、阿聰、Li Kien 佢哋三個 friend 一齊去旅行,本來都嗌埋 Gordon 嘅,不過因為佢啱先搵到份新工做,唔通一返工就請假去旅行咩!所以佢就同唔到我哋一齊去玩喇!

        平時間中都會見到 Winnie,但阿聰同 Li Kien就少啲機會見到,難得我哋四個都係埋一齊,見今日教完琴又無乜特別嘢做,所以就整定muffin 俾佢哋做早餐 ( 因為聽朝 8:00am 機,我哋個個天都未光就要起身喇,一定唔會有 mood 食早餐啦,所以去到機場先食囉 ),順便當係新春後第一次見面禮。

2009年2月25日星期三

雪裡紅百合炒鮮腐皮

        今晚煮嘅第二道素菜同樣咁簡單、快手,所以今晚都幾輕鬆,不過準備功夫都唔少,仲耐過煮呀!



材料:
鮮腐皮
鮮白合
雪菜


調味料:

素鮑汁


        鮮腐皮用水輕輕沖洗,之後就將佢撕成細塊;鮮白合洗乾淨,將啡色唔靚部份切走;雪菜要預先浸水,大約 20 - 30分鐘到啦,咁可以減低鹹味,之後洗乾淨 ( 洗完之後會見到有沙沉底 ),用較剪將佢剪碎,再用糖醃約半日。


        燒熱油,先放雪菜落鑊炒香,跟住就加入腐皮,兜兩兜後就可以加埋百合,再放調味料,快手炒幾吓就可以上碟。記得落咗百合後就唔好炒太耐,因為要保持鮮百合爽脆,煮得太耐仲會溶鬼埋 o添呀!


        雪菜鮮味,鮮百合清甜爽口,加埋鮮腐皮嘅豆香,真係味覺多層次嘅享受。如果鍾意食辣嘅話,可以爆香雪菜嘅同時加埋紅椒粒一齊炒,但因為今晚另外果碟沙茶鮮菇豆腐已經係辣 o架啦,所以呢碟唔落紅椒 lu


沙茶鮮菇豆腐

        今日係二月初一,聽到我咁講,就知道我今日會煮齋菜啦!



材料:
新鮮草菇
腍豆腐


調味料:

素沙茶醬


        草菇先洗乾淨,用刀喺菇頂切開約 1cm 深嘅十字花,然後用加有少少白醋嘅滾水汆水,去除 "up" 味。跟住過冷河備用。


        先將沙茶醬爆香,之後就加入草菇兜炒,因為草菇預先汆過水,所以唔駛炒太耐,否則就縮哂水,唔見食 o架喇!跟住就可以加埋啲豆腐落去,落埋糖,兜番熱就食得,如果唔想啲豆腐太過碎,就記得唔好猛咁炒,炒到啲豆腐爛哂,好似整蛋糕麵糊咁 fold 就得架喇


        煮呢碟餸又快手、又好食,你哋都試吓啦!如果煮葷的話,就可以先用蒜茸起鑊,再用一般嘅沙茶醬煮都得。


2009年2月24日星期二

香腸粟米忌廉長通粉


        呢個 pasta 好容易整 o架咋!


 


材料:
急凍粟米粒
香腸
長通粉
忌廉雞湯


調味料:

即磨五色胡椒
混合香草



        今次我用嘅忌廉雞湯係外國版,唔刻平時喺一般超市買到果啲香港版,係之前喺樂富吉之島超市買嘅,好仲減緊價 o添,印象中好似只係 $5.X一罐咋!


 



        呢隻特別版最好就係唔駛用罐頭刀嚟開,一拉蓋就攪掂。


 



        仲有樣特別呀,除咗招紙面度印有食譜外,喺招紙底都印咗另外 4份食譜。


 



        搣開張招紙就見到啲食譜喇。


        講番點煮先,首先煲滾水,落鹽,將長通粉烚熟,之後過冷河,備用;粟米解凍後略沖洗,然後汆水備用。燒熱油,將香腸略為煎香,盛起;倒入忌廉雞湯,加適量水將湯煮成較稠身嘅汁,之後落調味料,再加入粟米同香腸,最後加埋長通粉煮番熱就食得喇,俾咪真係好容易哩!又係懶人菜一道。


五穀健康麵包 & 芋頭雪山包

        之前喺報紙度剪咗幾張美心西餅買麵包 coupon,由於噚日係最後一日可以用 coupon,所以就買咗兩種麵包:五穀健康麵包 & 芋頭雪山包。



        睇見五穀健康麵包個 outlook 已經好吸



        包質鬆軟,仲有好多果仁喺入面 o添,包括有亞麻子、葵花籽同芝麻,所以覺得好有質感,好有果仁果種香口感,都 OK好食。



        至於雪山包就係美心西餅呢期嘅主打,睇落好吸引,真係好想食! 不過只係呢張 poster 影得靚咋,又或者係 "道具",到睇到真實個包樣時就好失望 lu!



        燈、燈、燈、凳,呢個就係 "傳說中" 芋頭雪山包個真身喇,係咪同張 poster 個樣差好遠呢!!



        裡面有嚿芋蓉餡 o架!


        雪山包個面皮其實係類似菠蘿皮或墨西哥皮之類物體,所以一定要烤番脆先至好食。之前其實已經食過流沙奶皇味,不過我個人就認為芋頭味好食啲,因為凡係整流沙餡都會落好多油去做,先至會做到流動嘅液態狀,所以係會好油膩,加上美心啲師傅 "落足本" 去整,所以鹹蛋黃味非常濃,對於鍾情清淡我就唔係咁 buy 囉!反而芋頭味比較清香啲。焗完之後外脆內軟,好有層次感,不過試過就算喇,都唔係真係咁吸引啫!可能我始終都係鍾情於歐陸麵包多過日式麵包啦。


豉椒味菜魷魚

        本來我想叫呢個餸做「豉椒味菜炒魷魚」,但係諗一諗,喺依家咁嘅經濟環境,好似唔係幾 "老捩",所以最後就將個「炒」字飛起咗喇。



材料:
魷魚
青椒
豆豉
蒜片
鹹酸菜


醃料:


胡椒粉


調味料:


生抽
紹酒


        魷魚解凍後先用水沖洗,之後用粟粉內外 "省一省",去除表面嘅潺,之後喺面切花,再用醃料醃一陣;青椒洗淨後切細塊;豆豉用水輕輕沖一沖;鹹酸菜要預先浸水約 15分鐘,咁就唔會太過鹹喇,跟住洗乾淨、切件,用少少糖醃一醃,備用。


        燒熱油鑊,將魷魚炒到半熟就即刻盛起,跟住爆香蒜片、豆豉同青椒,灒酒,之後加入鹹酸菜炒幾炒,再將魷魚回鑊,加入調味料,灒多次酒,兜兩兜就可以上碟。


豬膶瘦肉滾枸杞湯


材料:
枸杞
杞子
瘦肉
豬膶


醃料:


薑米
生抽
紹酒
粟粉


        枸杞葉摘下洗淨備用;杞子預先浸水後洗乾淨;瘦肉洗乾淨,用鹽、糖、生抽、粟粉醃好;豬膶用薑米同紹酒醃過可辟除血腥味。


        煲滾水,先放豬肉瘦肉落煲滾至出味,之後加入杞子滾兩滾,最後加埋枸杞,當菜灼熟後滾多陣就得喇。可能豬膶瘦肉落得多,估唔到啖湯會咁清甜,加埋枸杞獨有嘅香味,真係意想不到咁好!


        因為今晚我要煮豉椒味菜魷魚,所以要去豆腐檔買鹹酸菜,老闆娘見到我買咗枸杞,佢就主動同我講:「呢隻枸杞無咁好 o架,下次你買細葉、有 "勒" 果隻啦,功效好啲 o架!」


我答:「係咩?我唔知呀,我都係第一次買嚟滾湯咋!咁有咩唔好呢?」


老闆娘靜咗幾秒鐘,然後笑笑口對我講:「我都唔知呀,不過阿媽話俾我聽咋!」


        咁都有嘅!!??  枸杞有咩食療功效我就唔係太清楚喇,不過我就知豬膶補血,杞子明目,而杞子即係枸杞嘅果實,咁唔知會唔會有相同功效呢?


2009年2月22日星期日

日式咖喱蔬果

        早前喺書店 "打書釘" 時,隨手拎起歐陽應霽本《 快煮慢食  —  十八分鐘味覺小宇宙 嚟睇,揭到一頁係教整日式咖喱,於是好奇咁望多兩望,睇吓佢用嘅材料同我平時用嘅同唔同。點知一睇,果然又有得著,佢除咗用一般水果之外,仲用咗新鮮菠蘿同提子乾,於是就令我諗起雪櫃果包提子乾。其實包提子乾係我老豆之前用嚟浸酒用剩嘅,擺喺度好耐都無用到,都唔知點處理好,反正好耐都無煮過日式咖喱喇,就跟 "阿齋" 個做法去煮啦!



材料:
蘋果
南瓜
薯仔
紅蘿蔔
白洋蔥
紫洋蔥
提子乾
罐頭菠蘿


調味料:


日式咖喱磚



        我平時多數係用 S&B 嘅咖喱磚 (辛口 ),因為好味


 



        未加咖喱磚落去之前,原本啲顏色好靚 o架!


        蘋果批皮後去蒂、去核;南瓜去皮、去瓤;薯仔、紅蘿蔔刨皮;洋蔥去衣;提子乾預先浸水至軟身;罐頭菠蘿要瀝乾水份,而浸住菠蘿嘅糖水就留用。做好預備功夫後,將所有材料切丁備用。


        燒熱油,先爆香洋蔥,炒到有些微軟身就盛起;跟住就爆一爆紅蘿蔔、南瓜同薯仔,先盛起南瓜同薯仔,留番紅蘿蔔喺鑊度,之後加入水,冚蓋煮到 5成熟時,就將南瓜同薯仔回鑊一齊煮腍。當三樣材料都煮腍之後,就加埋啲洋蔥、蘋果、南瓜、提子乾同菠蘿落鑊一齊煮,呢個時候順便加埋鹽、糖落去調味,兜兩兜後就加埋咖喱磚,當咖喱磚開始煮溶時,鑊內嘅水份會即刻變到好稠,甚至會黏底,所以記得加埋罐菠蘿糖水落去,再煮多約 5分鐘,咁就 OK 啦!


 


P.S.    - 我自己就用罐頭菠蘿代替新鮮菠蘿。


           - 切好蘋果同薯仔如果唔係即刻煮,最好先浸入鹽水內,以免氧化變色。


           - 南瓜千祈唔好太早落,因為佢係最快煮熟嘅,煮得太耐就會溶哂!


           - 煮日式咖喱嘅最佳配搭係蘋果。


        


2009年2月21日星期六

銀寶無鹽牛油

        噚日行吉之島超市,發現銀寶無鹽牛油減價,只賣 $26.5,比起百佳、惠康賣 $32.5平得多,所以我都買定兩舊預備整餅同蛋糕,如果我有 J card,仲有額外 95折 o添,因為噚日係吉之島感謝日。



        原本想話俾明仔聽,等佢都去買番舊,點知佢話荃灣有間烘焙店都只係賣 $21,不過無法啦,我唔知嘛,下次先走去睇睇啦!


2009年2月20日星期五

McCafe Capuccino


        見到我呢個 cheap 精又去浦 McCafe,唔駛問就梗係又有 coupon 啦!今次我 order 嘅係 Capuccino,無論個 look 定係味道都好似之前試過Mochaccino,唯一唔同嘅係少咗份朱古力味。今次我醒目喇,唔落糖就咁飲,一來驚好似上次噉甜都嘔泡,二來我另外喺美心買咗個朱古力撻食,所以唔駛要太甜喇,反而咁樣感覺都幾好,幾清醇。


        我始終覺得佢個 Mlogo整得好靚,當個 waiter送到杯咖啡埋嚟,放枱面之後,隔離個兩個師奶即刻話:「依,都幾靚,幾過癮喎!」


2009年2月19日星期四

泰國腰果餅 & 日本蜜柑


        噚日又係去馬鞍山度教 Louisa同 Arthur,教緊 Louisa 樂理時,佢拎咗盒腰果餅出嚟食,我食過都真係幾好食噃,佢話佢識得有個 friend做 tourist guide去泰國時買俾佢嘅,佢個 friend仲話,每次都例必幫個阿婆買一箱返嚟,因為果個阿婆好得意 o架,每日都一定要食三粒,唔食嘅話就會唔舒服,仲要入院 o添啊!所以要長期有存貨喺屋企。我聽完之後仲好衰咁笑咗好耐,覺得好攪笑,我同 Louisa講,乜咁似醫生開藥嘅:每日一次,每次三粒,哈哈! 



        睇落個樣唔係太吸引,但食落口真係好好食 o架!


 


        後來我發現原來個盒係原裝,唔係 Louisa用自己嘅盒裝住,我就好奇咁問佢:「依,咁呢個盒咪應該係密氣囉!」本來諗住叫佢食完唔好掉咗個盒,留番俾我,點知我都未開口,佢就話:「你啱呀,咁你連埋啲餅成盒攞返屋企啦,我俾個盒新嘅你。」我當然唔要啦,攪到好似開口問佢嚟食咁,因為我最主要都係想要個密實盒啫,但佢話個 friend咗好多俾佢,唔緊要,你攞走啦!咁我就又再次多謝喇。       


        教完之後就例牌喺佢哋度食埋晚飯先至走,噚日 "家姐" 都嚟埋一齊食 o添,好熱鬧!食完飯,Louisa就拎啲生果出嚟食,當然梗係又阿蘇介紹果間九龍城專賣日本水果,24小時營業嘅生果舖度買 o架啦!其實我之前都食唔少佢買嘅呢啲高級日本水果,有車厘子、柑同李,當然個個都價值不菲,車厘子約幾百蚊一磅,柑就二三十蚊一個,至於梨就六七十蚊一個。不過貴還貴,其實都物有所值,事關當你一食落口便知龍與鳳,非同凡響:車厘子非常大粒、非常爽甜,佢哋形容為好似食緊蘋果仔咁;柑就最明顯,唔單止甜,仲非常軟熟,真係一啲渣都無 o架!之於日本梨就好似韓國豐水梨咁,不過當然更加甜,更加爽脆。Louisa 話俾我聽,有次佢喺公司無嘢做,住揸車去九龍城買啲水果返嚟同啲同事一齊食,點知咁啱佢又無咁多錢喺身,於是就問同事借住先:「我依家去買水果返嚟食,邊個可以借住錢俾我先呀?」


其中一個同事就好快咁話:「我有 $100,妳拎住去先啦!」


Louisa答:「$100夠鬼咩,起碼都二三千蚊啦!」


當堂全場人嘩然:「妳買咩水果呀,要買成二三千蚊!?」


        好彩其中一人有咁多錢喺身,到買嚟,唔駛幾耐,"含" 一聲就已經食哂,之後都異口同聲咁話,唔怪得之要咁貴囉!Louisa仲話依家班友仔被佢 train 到把嘴好尖,試過一次都係喺果間生果店度買啲稍為次一級嘅車厘子,擺喺度完全無人食,但所謂次一級都要成百蚊磅 o架!所以自此之後,佢哋公司班同事就成立咗一個專門要嚟買生果基金,名為「生果金」,係 no limit  o架喎,所以個個都輪住嚟 "領生果金"


        食完生果之後,Louisa 就即刻再打電話去間生果舖,睇吓有無佢想要嘅生果,當知道有之後,就立即同 Frankie 一齊揸車去買,順便車埋我同 "家姐" 到附近轉車返屋企。到咗九龍城之後,我同家姐都跟埋一齊落車,入去間生果店見識一吓,見到有個全場最貴嘅水果  —  西瓜,盛惠 $8888,真係睇到眼都突 !!!但其實只不過係夾硬將個西瓜種到幾何圖形,甚至人樣之嘛,我覺得一啲都唔值。買完哂嘢,Louisa 又送咗個日本蜜柑俾我食:



        個蜜柑色澤好靚,仲好墜手 o添,一定好多汁 o架喇!


 



        連啲柑肉都特別鮮橙色,唔似平時食開果帶白色。


 


        其實呢個蜜柑都已經非常好食,只不過比起上次果種就遜色咗少少。我俾咗半邊我老豆試,佢一食落口都話好甜、好好食,但我話俾佢聽,依個已經唔係最好食,我曾經食過一個仲甜過佢,而且一啲渣都無,唔係誇張,真係好似食緊豆腐咁樣,我咁大個仔都未食過橘科類水果係一啲渣都無 o架!今次呢個相比起上次果個就差啲,因為帶少少酸,同埋有少少渣,本來 Louisa都想買番上次果隻,不過賣哂,要遲幾日先有貨返,咁就唯有 "粗粗" 啃住呢隻先啦!


        題外話:Louisa話成日都見到阿蘇個司機揸車嚟買生果,佢真係有米,唔怪得之佢喺有線電視個「一粒鐘真人蘇」節目度都講,佢 BBQ 一次都洗成 $3000 囉!


2009年2月18日星期三

油爆紅辣椒

        屋企雪櫃長期都會擺定一樽油爆紅辣椒喺度,方便隨手就嚟煮餸,或者食湯粉麵時用。媽咪之前整落果啲已經食哂喇,所以今次我要自己親手整喇!


經典炒飯

        上次整啲叉燒未食哂,今日就用佢嚟炒飲啦!




材料:
冷飯
叉燒
雞蛋
蔥花
青椒


調味料:

生抽


        叉燒切粒,雞蛋拂打成蛋液、青椒洗淨切幼粒備用;冷飯預先打鬆。燒熱油,落蛋到鑊內,用叉不斷兜炒至熟,炒成蛋碎,跟住爆一爆叉燒同青椒,盛起備用。再次落油,落飯到鑊內炒熱,並炒至鬆散,其間可加少少水,避免炒到過乾。之後就將叉燒、青椒同蛋碎回鑊,加入調味料,最後灑上蔥花,完成。



 


2009年2月16日星期一

咖喱叻沙


材料:
河粉
炸魚片
芽菜
豆卜
青瓜


叻沙湯料:
咖喱叻沙醬
椰漿



        炸魚片同豆卜沖水洗一洗,之後將魚片切片、豆卜開邊備用;芽菜摘去根部後洗乾淨;青瓜洗淨後切片備用。


        先將芽菜拖一拖水,但切勿煮至腍身,要爽口。另外再煲滾水煮湯,加入叻沙醬同椰漿,煮滾後加入炸魚片同豆卜,轉慢火繼續煲多一陣間。跟住煮河粉,河粉本身已經煮熟,所以唔駛煮太耐,如果唔係就會過腍。將叻沙湯舀入裝有河粉嘅碗內,加入炸魚片、芽菜、豆卜同青瓜,咁就食得喇!       


        呢個係一個好傳統嘅馬來西亞地道食品,煮之前當然要請教一吓身為大馬華僑 Li Kien 啦,佢話應該用油麵嚟煮 ,雖然個叻沙醬包裝袋上面幅圖都係用油麵,不過我就唔係咁鍾意食油麵,所以就改咗用河粉囉!


煙肉粟米焗薯


材料:
焗薯
煙肉
粟米粒


調味料:
千島醬
香草
黑椒碎


        將焗薯徹底清洗乾淨,因為個皮都可以食,我自己就用牙刷洗刷,之後用抹手紙抹乾水份,喺兩側用刀輕輕切一刀,跟住就用叉喺面輕輕拮窿,方便疏氣;煙肉預先放白鑊內炒香;將煙肉、粟米粒及調味料拌勻備用。


        焗薯放入微波爐後,我就用佢內置嘅 "電腦烹調設定及菜譜" 功能,選擇 "烤土豆" 後,就自動烹調,其實佢係結合咗微波、蒸氣同烤焗 3種功能,所以即使個薯仔無預先用水烚熟都唔會變得乾身,甚至烤燶,依然好濕潤。當焗到一半時間時,微波爐會響幾聲,屏幕顯示 "Turn Over",提醒你要翻轉焗另一面,真係招呼周到。


        焗薯熟透後,就沿住之前兩側嘅切口切開兩邊,並將中間部份薯肉挖空,但記得唔好挖太深,果薯皮會易爛,將挖出嘅薯肉壓成薯茸,加入之前準備好嘅煙肉粟米千島醬拌勻後,再釀番入去薯皮度,喺表面灑上香草,放入微波爐,今次選擇 "烤焗" 功能,用 180度火焗約 8分鐘就完成。



        味道調得啱好,煙肉香口、粟米香甜,加上千島醬酸酸哋,既醒胃、又唔滯,最正就係薯皮焗到脆卜卜,唔…… 超正!


做父母的苦心

  摘自《頭條新聞》


        做人父母真係唔易,除非你係唔錫自己啲仔女啦!


        我好記得,媽咪臨走前講咗一樣嘢俾我聽,令到我好內疚,因為佢明知對自己不利,都願意犧牲自己嚟成全我,佢話只要我好就無所謂。所以我都同阿聰講過,喺呢件事上面我真正體會到母愛嘅偉大、無私,無論我有幾錫媽咪,對佢有幾好,始終唔及佢為我付出咁多,好慚愧!


自製蜜汁叉燒

        唔好以為自己整叉燒係好麻煩,其實好容易同好簡單 o架咋!我都係跟住叉燒醬個樽身包裝紙上個食譜整咋嘛!



材料:
枚頭瘦肉
蜜糖


醃料:
叉燒醬
玫瑰露酒


        首先當然要將舊豬肉洗乾淨啦,之後用醃料醃好,最好醃過夜,其間我翻過幾次,等佢可以均勻入味。用 180度預熱焗爐,將醃好嘅豬肉放入爐焗, 15分鐘後將豬肉翻轉,同樣焗15分鐘,之後搽上蜜糖,再焗多 2分鐘就得喇!



        個味道都幾似喺燒臘舖買果啲叉燒,雖然好香玫瑰露味,不過食落口就食到酒精味,唔知係咪落得太多呢,定係支玫瑰露酒 cheap 呢?我當然唔係買果隻 "豬膽樽形" 嘅經典玫瑰露酒啦,咁細支都要 $27.9,我只係買佳寶凍肉公司自家出品嘅玫瑰露酒咋,$13 一大支呀!



        呢舊雖然今晚無食到,但一睇落去就知道一定腍過今晚食果舊,根據我嘅經驗,切開後如果裡面啲肉色好白的話,咁就會韌同嚡;但如果顏色好似呢舊咁比較沉色,啲肉就一定腍滑!


2009年2月14日星期六

入爐紙杯

        星期四出去大角咀教琴前,專登提早出門口,到上海街行一趟,因為我記得之前同 Gordon 行經上海街時見到一間專賣不銹鋼用具嘅舖頭,我哋仲買咗個不銹鋼兜 o添!所以我想搵番呢間舖,吓會唔會有埋蛋糕模賣


        行吓行吓,行到近油麻地戲院附近,卒之見到有間專賣不銹鋼用具嘅舖頭喇,原來係間專賣烘焙用品嘅舖頭,仲俾我發現到荀嘢,呢兩筒入爐紙杯,每筒都只係賣 $10 咋,嘩,真係平到笑,有排用喇!!



        不過最攪笑嘅都係間舖頭原本係專賣砧板嘅,唔知點解無端端會賣埋烘焙用品呢!



        蛋糕模就反而無買到,因為有好多款式同 size 揀,又有固定模同活動模,我呢個初哥都唔知邊種好用,遲啲請教完明仔,問完佢意見先兩買過。


        買完之後,行出嚟無幾耐,又見到有幾間同類店舖,好奇咁望過去對面街,都有幾間舖都係賣烘焙用品,原來油麻地呢段上海街係烘焙用具店嘅集中地,下次預多少少時間慢慢行、慢慢睇、慢慢格價,呵呵!