2011年8月25日星期四

巴東雞球

        原來媽咪以前影印咗一份食譜,成份食譜都係教煮東南亞菜式,睇見個個餸都想試吓煮,真係唔知揀邊款好!突然見到有巴東牛肉個食譜,第一時間即刻諗起上次農曆年Louisa 屋企團拜時,佢哋個個都讚個巴東牛肉好食,我自己當然就無食到啦,唔知有幾好味,咁不如就自己用雞肉煮一次試吓味道啦!




材料:
急凍雞扒     
2
椰漿              1


醃料:


生抽
胡椒粉
紹酒


醬料:
紅辣椒           10
乾蔥頭           55  
蒜頭               38
南薑              1 湯匙
蝦膏              3/4 茶匙


調味料:
芫荽粉          1 茶匙
小茴粉          3/4 茶匙
胡椒粉          少許
                  3/4 茶匙
                  1 茶匙


- 雞扒解凍、洗淨,然後切件,用醃料醃好。


- 紅辣椒洗淨去蒂;乾蔥頭同蒜頭去衣;南薑洗淨刮皮。

- 將所有醬料材料一齊切碎,之後用石樁樁幼,拌至糊狀。


- 燒熱油,將雞肉放鑊內略煎,盛起備用。


- 加 3 湯匙油,用慢火爆香醬料,將雞肉回鑊兜炒。


- 加入調味料兜勻後,倒 1/2 杯椰漿入鑊,煮至汁將近乾。


- 再倒入椰漿及水各 1/2 杯,用慢火煮至收汁即成。



呢個石樁係老竇喺大陸買返嘅,本來都叫咗佢唔好買,咁鬼死重,都好少
機會用到,用攪拌機快手好多
。點知有一日佢同我講話實在好平,
所以都係買咗返嚟! 呢個小型石樁盛惠 $8 人仔,抵玩嗎?


 



呢個巴東汁味道其實有啲似紅咖喱,材料都差唔多,
不過就要煮到收乾汁為止,同煮咖喱唔同。


 



煮呢個巴東菜式有樣好,就係煮到收乾汁後,啲油完全留番哂喺個煲度,
咁就唔駛怕食哂啲油落肚啦!



 


Notes
- 紅辣椒用量可依個人口味增減。


- 小茴粉即孜然粉。


- 無石樁的話,可用攪拌機攪打至幼細。


- 食譜內提到一個秘技,當煮巴東牛肉或咖喱菜式時,萬一汁料過多,味道偏淡時,
  不宜用大火將汁煮乾,因為容易煮燶及黐底,此時,最好加入適量椰子粉煮一陣,
  汁料就可以收乾,保持原味嘅同時又唔會煮燶。


- 椰子粉可買現成無糖椰子粉,又或者可以自製,方法係將椰絲用白鑊慢火炒至香脆
  ,之後放入攪拌機內磨成粉即成。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2011年8月24日星期三

香橙雪芳蛋糕 Orange Chiffon Cake

        又係清蛋白、整雪芳嘅時間喇!今次專登為 Bill 整咗個香橙雪芳蛋糕,因為之前我問過佢有咩鍾意食,佢就話鍾意食橙囉,咁所以我就試吓整呢個雪芳蛋糕,星期五同佢上堂時就帶埋過去俾佢。


2011年8月22日星期一

海鮮柚子沙律

        原來入夏咁耐,今次先第一次同大家分享冷盤涼菜食譜!


        今晚呢個沙律又係清存貨嘅製作,用埋放冰格啲蜆肉;清埋之前整四川擔擔麵時買落嘅乾蔥頭同磨碎花生;仲有放喺雪櫃 N嘅青檸!



材料:
魷魚
急凍帶子
急凍蜆肉
泰國金柚
乾蔥頭
紅辣椒
金不換
炒香花生碎


醃料:

紹酒
胡椒粉


沙律汁:
青檸
魚露


- 魷魚清除內臟及軟骨,撕去表面紫色薄膜,洗乾淨後切圈。


- 帶子、蜆肉解凍後洗乾淨,略為搾乾水份。


- 用醃料將魷魚、帶子同蜆肉醃 15 分鐘,之後分別放滾水內灼熟,盛起瀝乾水份。


- 金柚去皮後拆肉,撕碎成細粒;乾蔥頭去頭尾、去衣,切圈後用凍滾水浸 10
  鐘。


- 紅辣椒洗淨後切粒;金不換洗淨後取葉部份。


- 青檸搾汁,加入糖同魚露拌成沙律汁。


- 將所有材料放入大碗內混合,拌入沙律汁即成。


- 食時候再灑上花生碎。



柚子非常清甜又多汁,味道層次豐富,酸、甜、苦、辣、鹹共冶一爐。


 


 


難得 "無牙" 嘅老竇都讚魷魚好腍,夠鮮味,好好食,梗係啦,放落滾水,
一見佢鬈起就立即撈起,前後都唔知有冇一分鐘!
 


Notes
- 醃海鮮料時只需輕輕落少少鹽,因為海產本身已經有一定鹹味。


- 灼熟海鮮料時無需太長時間,約 1 - 2 分鐘即可,太耐會變得韌之餘,味道亦會全部
  溶於水內。


- 乾蔥頭用凍滾水浸過後可減低辛辣味道。


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


鍋貼

        繼續清冰格行動,用埋之前包餃子時剩低嘅水餃皮,今次試吓整鍋貼,睇吓效果如何先!



材料:
免治豬肉
娃娃菜
薑蓉
蔥花
水餃皮


醃料:


生抽
紹酒
麻油


- 豬肉先用醃料醃好;菜洗乾淨,切碎,之後加少少鹽拌勻,靜置 20 分鐘。


- 將菜粒過水,洗去多餘鹽份後,用手搾乾水份。


- 菜粒、薑蓉同蔥花加入豬肉內,拌勻成餡料。


- 將餡料放上水餃皮,包好後放喺已灑粉嘅碟上,備用。


- 燒熱油,將餃子逐隻放入平底鑊內煎 2 分鐘。


- 之後加入水及少量白醋至餃子 1/3 高度,冚好蓋,用中慢火煮 5 分鐘。


- 打開鑊蓋,繼續煮至水乾為至。


- 當所有水份都蒸發後,乾煎至底部金黃即可。



估唔到第一次煎鍋貼都唔錯喎!


 



你睇,鍋貼個底煎到幾金黃,好香脆 o架!


 



今晚做北方人,除咗煎鍋貼,仲整咗粢飯同豆漿,全部都係自家出品哦!


Notes
- 菜粒加入鹽可將水份逼出,以免因滲水而令水餃皮濕透。


- 煮餃時加少量白醋,可以令煎好嘅鍋貼皮更加香脆。


- 乾煎鍋貼時切勿用大火,避免煎燶。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


杏仁豆漿雪芳蛋糕 Almond & Soya Milk Chiffon Cake

        嚟緊個冰格會放好多嘢,迫爆咁滯,所以呢幾日已經開始清存貨,今日就清蛋白。

        如果有蛋白剩的話,我自己就鍾意要嚟整雪芳蛋糕,因為蛋白用量係比蛋黃多,用剩出嘅蛋白整的話,咁就唔駛有蛋黃多出,超方便哦!


2011年8月16日星期二

四川擔擔麵

        之前六月阿茂聚會時,Louisa 屋企食過 Rachel嘅四川擔擔麵,味道確係唔錯,惹味之餘又有風味,今晚一於參考佢個食譜,自己加小小變化,睇吓效果會係點。



拌麵醬


材料:
薑蓉          1 湯匙
蒜蓉          1 湯匙
乾蔥茸      1 湯匙
生抽          1 湯匙
鎮江醋      2 湯匙
芝麻醬      4 湯匙
糖              4 茶匙
清雞湯      4 湯匙
紅椒油      1 湯匙
麻油          1
湯匙
花椒粉      1 湯匙
花椒油      1 湯匙


- 將所有材料拌勻即成為拌麵醬。



拌麵料


材料:
白麵條
免治豬肉
油浸辣椒乾
蝦米
炒香芝麻
炒香花生碎
蔥花


醃料:


生抽
紹酒


- 豬肉用醃料醃好;辣椒乾切碎;蝦米洗乾淨,用清水浸至軟身,瀝乾水備用。


- 燒熱油,爆香辣椒乾、蝦米,灒酒,之後加埋豬肉一齊炒熟,盛起。


- 煲滾水,放麵條入內煮熟,盛入碗內。


- 將辣椒乾、蝦米同免治豬肉放於麵條上,再淋上拌麵醬。


- 之後灑上芝麻、花生碎及蔥花,拌勻即可享用。



我就係用呢隻北京接麵嚟整 o架喇!呢隻北京拉麵一直都係媽咪嘅心水選擇,
皆因麵條非常爽口彈牙,質感幼滑,最重要係唔怕煮過火,都能
保持爽口,所以「壽桃牌」咁多種白麵條之中,
呢隻係賣最貴。


 



左邊嗰樽紅椒油係 Louisa 整俾我嘅;而右邊嗰樽就係花椒油,
Winnie 自己整時順便整多樽俾我,真係要多謝佢兩個,
咁我就慳番唔少功夫喇!


 



味道調得啱好,唔會太鹹或太甜,美中不足嘅係唔夠麻辣!


 


Notes
- 唔太食得麻辣口味的話,紅椒油、辣椒乾、花椒油同花椒粉應減少份量。


- 若想拌麵醬汁較濃稠的話,可減少清雞湯用量。


- 可參考日式芝麻醬做法步驟 1 - 4 自製芝麻醬。


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2011年8月15日星期一

法國麵包 Baguette

        好多 blogger 都話整法包好難整得好,所以我一直都無試過整,不過近排心思思想試吓整,睇吓自己會整到個包有幾樣衰!


        雖然明知自己整法包一定好樣衰,但都唔想衰到貼地,所以先跟本望落好似較為可信嘅食譜會穩陣啲。



麵種


材料:
高筋麵粉      100 克
鹽                  2 克
即用酵母      0.5 克
水                  65 克


- 將麵粉、鹽同酵母混合好,之後加水搓成麵糰。


- 麵糰放入已灑粉嘅兜內,冚好保鮮紙,室溫發酵 1 個鐘。


- 發酵好之後,將麵糰排氣、滾圓,用保鮮紙包好後放入雪櫃雪 1 - 2 日即成。



主麵糰


材料:
高筋麵粉      250 克
鹽                  5 克
即用酵母      1.5 克
麥芽糖          0.5 克
水                  約 165 克
麵種              63 克


- 先將水同麥芽糖拌勻;麵粉、鹽同酵母放入食物處理器內攪拌混合。


- 加入麵種及麥芽糖水,搓成麵糰。


- 拎出麵糰,放喺已灑粉枱面繼續摔打、搓揉成光滑麵糰。


- 將麵糰放入已灑粉嘅兜內,冚好保鮮紙,發酵 1 個鐘。


- 取出麵糰,排氣,平均分割成 份,分別滾圓後,鬆弛 20 分鐘


- 麵糰放上入爐防黏蓆上,最後發酵 1 個鐘。


- 烤盤放入焗爐內一齊預熱至 220 °C。


- 用刀喺麵糰表面割 3 條斜紋,之後連防黏蓆一齊放上已預熱嘅烤盤上。


- 用水噴濕麵糰表面,放入焗爐焗約 20 - 25 分鐘即可。


以上材料份量可做約 9 吋長麵包 3 個。


食譜出自《麵包教科書》。




        落水搓麵糰嘅時候,一下子收唔切手,倒多咗水,又好衰唔衰,包高筋粉用到無哂咁滯,剩番好少,點都要留番啲做手粉 o架,所以攪到個麵糰勁濕、勁瀉身,卒之個包咪咁樣衰囉!不過真係可以做到外脆內軟,好好食,所以呢個譜都應該靠得住,係我自己未夠班啫,如果用埋法包粉去整,應該更加正!


 



即刻將個法包切件,搽上香草蒜蓉醬,入爐再焗多 5 分鐘,
就成為咗蒜香多士喇!
 

Notes
- 原食譜係用法國麵包粉;而主麵糰材料中有加入維他命 C 溶液。


- 用剩嘅麵種可以用保鮮紙包好,放上冰格保存,用之前預先解凍即可。


- 書中提到,硬麵包要做到外脆內軟,麵糰不可過度搓揉,筋性只需達到七成即可。


- 麥芽糖所含嘅澱粉分解酵素有助於酵母菌繁殖


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


再做紅豆糯米卷

        真係捲開有條癮,捲完香檸紫菜卷之後又再捲番上次個紅豆糯米卷。

        今次將個糯米皮整薄一半之外,仲將糯米粉同澄麵嘅比較稍作調整,變成糯米粉 90 克、澄麵 2 湯匙。



比起上一次,今次效果好好多,不單只糯米皮無之前咁黏之外,
仲捲得靚仔好多,睇到中間個螺旋紋 o架!



        如果想要食譜的話,請參閱《紅豆糯米卷》,根據上面所講嘅糯米粉與澄麵用量作出調整就得 o架喇!


香檸紫菜卷

        今日係農曆七月十五,亦即係我嘅食齋日。繼之用乾腐皮整薑蔥魚肉腐皮卷,以及用枝竹整味噌枝竹南瓜炆排骨,今晚就用埋最後一樣黃豆製品作第三擊,用鮮腐皮整香檸紫菜卷。



腐皮紫菜卷


材料:
鮮腐皮          300 克
壽司紫菜      4 塊
麵粉              20 克
水                  30 克


調味料:
鹽                  2 茶匙
糖                  3 茶匙
薑蓉              1 / 2 茶匙
沙薑粉          2 茶匙
麻油             少許
胡椒粉         少許
高筋麵粉      1
湯匙


- 將鮮腐皮剪碎,加入調味料拌勻;麵粉與水混合調成麵糊,備用。


- 將腐皮碎放紫菜上面,然後慢慢捲起紫菜,收口位置搽小量麵糊黏合。


- 將捲好嘅紫菜卷放上已墊牛油紙嘅碟上,隔水蒸 10 分鐘。


- 紫菜卷攤凍後就可以切件上碟。



青檸芥末醬汁


材料:
青檸              1 個
英式芥末      2 茶匙
糖                  1 湯匙
白醋              2 茶匙
水                  1 湯匙
粟粉             適量
檸檬葉          1


- 除檸檬葉之外,將其餘材料倒入碗內拌勻,之後放入微波爐內加熱至糖溶。


- 將檸檬葉洗淨、剪成幼絲,放入醬汁內即可。


以上材料份量可做紫菜卷 4 條。


食譜出自 Alfalfa 嘅《素食可餐》。




原本食譜係教蒸好之後就煎番香佢嚟食,但因為我懶洗鑊,所以就咁
蒸好就算,點知原來老竇都 prefer 蒸多過剪,真係錯有錯著。 


 



不單只紫菜卷惹味,就連個青檸芥末醬都非常好味,酸酸甜甜好開胃。


Notes
- 原食譜係用鮮腐竹。


- 因為我無沙薑粉,所以就用咗鹽焗雞粉代替,不過鹽就要減至 1 茶匙。


- 紫菜卷捲好之後,如果腐皮餡容易跌出的話,我同樣用麵糊將頭尾黏合好。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


自家製日式芝麻醬

        平日食開嗰隻日式芝麻醬最近好似無得再賣,好彩之前有諗過嘗試自己整,所以一早已經睇過吓個材料成份,噚日晏晝比較得閒,卒之 "的" 起心肝做實驗。




材料:
花生                
60 克
芝麻                180 克
橄欖油             60 克
糖                    15 - 20 克
白醋                 2 湯匙
柚子醋              2 湯匙
鰹魚冷麵醬汁   2
湯匙
味醂                  適量
水                      適量

- 花生略沖洗,之後放白鑊內烘至乾身後去衣,再回鑊炒至金黃色。

- 芝麻洗乾淨後放白鑊內炒至乾身及香味出。

- 將炒香花生及芝麻放入乾磨器內打碎,直至接近糊狀為止。

- 之後倒入食物處理器內,加入橄欖油攪拌。

- 當橄欖油與花生芝麻完全混合後,再加入糖、白醋、柚子醋及冷麵醬汁一起攪拌。

- 所有材料均勻混合後,最後加入適量味醂及水,攪拌至適合濃稠度,完成。
 


我仲專登買定個番茄返嚟準備試味 o架,味道調到同我之前
食開嗰隻非常接近,老竇試完味都讚好香濃啊!




Notes:
- 加入花生可令芝麻醬更香濃。
 

- 如果無冷麵醬汁的話,可用日式醬油或生抽代替。

- 當花生炒到乾身後,用手執起一小撮,於掌內互相磨擦,花生衣就好容易脫落。

 

2011年8月14日星期日

HP Deskjet 1050

        舊拍擋一句說話都無講,就咁就走,明明之前你都仲好哋,安然無恙,點知想再搵你幫手時,你已經毫無氣色。立即幫你搵醫生 check check,點知淨係見醫生都要收 $400,醫務所個 reception 仲話你年事已高,根本無藥可救,check 完都係得個桔,香港根本再無藥幫到你!咁我就唯有物色新戰友。


        適逢一年一度嘅嘉年華,睇新戰友編號 1050 只需俾 $249 中介費用,就可以即刻上工,真係抵到爛,無他,皆因都係內地工人!



新戰友套軍裝特別型仔,又醒目,不過可惜效率始終唔及舊拍檔,
如果要搵番同舊拍檔一模一樣嘅效率,
中介費用要高出一陪!


 



舊拍檔,你唔好怪我唔再要你呀,因為我都想再同你並肩作戰,但可惜根本無藥
可醫治你,而且新戰友又實在抵用,迫於無耐之下,我先至唯有咁做!
不過,你捐贈出嘅器官可以移植到 Winnie 親戚家中嘅工人身上,
算係可以幫到你延續你嘅使命吧!



        舊拍檔 F380,再見吧!


2011年8月10日星期三

Eau de Rose Savon

       知道個法文係咩意思嗎?查實個意思係玫瑰水肥皂 ( Rose Water Soap )。



        真係無諗過自己都會有「Crabtree & Evenlyn」嘅產品,因為好多時經過店舖門口都會俾佢嘅香味嚇怕,可能係因為成間店貨品太多,所以味道特別濃烈,有時仲會聞到 "打乞嗤" o添!咁點解我都會有呢個 product 呢?查實係 Keith嘅禮物嚟 o架!


        同 Keith 雖然已經識咗一段時間,但係星期一我哋先至係第一次見面。最初係Rachel 個 blog 度識到 Keith 嘅,後尾發現原來大家都係演藝學院嘅校友,不過我係讀西樂,佢就讀中樂,所以大家都會有共同話題。直至到大約半年前度,大家MSN 度傾傾吓,先發覺原來佢都識 Miss Cheng,Keith 當年嘅畢業 concert 就係由 Miss 幫佢做伴奏。我同 Keith 講起 Miss 最近開咗間音樂中心,問佢有無興趣上去睇睇,順便探Miss,於是大家就約好咗星期一見面。



仔細咁睇清楚,原來盒面上嘅玫瑰圖案係 Keith 好鍾意嘅包心玫瑰呀!


 



喺浴室都隱約聞到淡淡嘅玫瑰香,明符其實嘅滿室幽香。


 


        諗番起上嚟,人與人之間嘅關係真係好奇妙,同 Keith 嘅關係由最初blog 友變成校友,由校友變成朋友,話唔定遲啲仲可能由朋友變成同事 o添呀,哈哈!